الاثنين، 20 أبريل 2009

يالا على لانشون الفراخ!!!

اللانشون اللى بنشتريه من السوق تقريبا مافيهوش لحمه سواء كانت فراخ او لحم بقرى..ده فيه هبااااااااااابه..على رأى مش عارفه مين..يعنى لحسة لحمه و الباقى خدااااع بصر و خداع لحاسة تذوق المستهلك المسكين....انا توصلت لطريقه لعمل شبيه للانشون الفراخ....هيعجبكم ..جربوه و ولادكم هيحبوه جدا..كمان العجيب انه لانشون فراخ و كمان معمول بالفراخ...ههههه
يالا على المقادير يا كتاكيت
نص كيلو صدور فراخ بصله كبيرة بيضه كبيرة كوب بقسماط 2 ملعقه كريمه لبانى توابل..قرفه ,قرنفل ,جنزبيل.فلفل ابيض.جوزة الطيب..و طبعا ملحطيب فيكى تنوعى ممكن ,اعشااب ..ممكن بابريكا ممكن مستطردة..حسب النكهه اللى بتحبيها ..اخترعى يا ستى نكهه خاصه بيكى و سجلى ليها براءة اختراع..ما المصانع كل يوم بتتحفنا بس الفرق انك لما تحطى اعشاب هتحطى اعشاب مش "طعم اعشاب مضاهى للطبيعه"...هكذا يكتبون على منتجاتهم و المستهلك الغلبان مش فاضى يقرأ ..بياكل و خلاص.طيب افرمى لحم الدجاج كويس و ضيفى عليه البصل و كله فى المفرمه و اديها و ابدئى ضيفى باقى المقادير لحد ما تتشكل عندك العجينه.شيليها من المفرمه..او الفوود بروسيسور.و انا هنا خلطت عليه شويه زيتون اسود...مفصص طبعا ماحدش يحطه ببذره...ههههههنشكل اسطوانه و نقفل عليها كويس بالفويل.نغلى حله ميه و نحط فيها مكعب مرقه بس للتنكيه مش اكتر و ننزل فيها القالب بتاعنا... و نتركه يستوى.بعد تلت ساعه او نص كل حاجه هتكون تمام.طيب ..بعد ما خلص سيبته يبرد كويس و قشرت الورقه من عليه...و حبيت اديله نكهه مدخنه....و ده علشان اقوم بالواجب معاكم رغم ان الطبيب محذرنى لأنى يا حلوين مريضه بالربو و الحساسيه..يعنى اى صنف حساسيه تلاقوه عندى.. و الدكاتره بيقولولى :انتى كل المنهج اللى خدناه فى الكليه...هههه يالا بلاش رغى...المهم حضرت عده التدخين...فى صينيه اى صينيه...افرشى فويل و حطى عليه..شويه شاى و سكر و قرفه خشب و ملعقه عسل اسود..و حطيت شبكه و حطيت عليها اسطوانه الانشون..و غطيتها بفويل و ولعت النارو عينكم ما تشوف الا النور هتشوفوا بث حى دلوقتى...عادى يا بنات ..بس لا انصح ضعاف القلوب و ضعاف الصدور بخوض تلك التجربه...طبعا اخد قالب اللانشون لون جميل و ريحه مدخنه حلوة... و بس خلاص ,,,شيليه فى التلاجه و قطعى و اعملى سندوتشات و ابقى ادعيلى و فهمى عيالك أو كل حبايبك اللى هيدوقوه ان ده هو اللانشون و ان اللى بيعمله المصنع "ضحك على الدقون"...ابقوا اسألوا عليا فقد اتعرض للاغتيال فى أى لحظه.....الحقووووووووووووووونى!!!!!يالا على الصور


يالا مين هيتطوع و يعمل السندوتشااااااااات...اه يااااانى....و أشوفكم المره اللى جايه يا حلوين...استنووووووونى و ما تمشووووش...بنات ان شاء الله ارد اكيد على اسئلتكم بخصوص الجبنه...بس اروح اخد البخاخه...ههههههه
ملحوظه هاااااامه....أرجو الحفاظ على حقوق الملكيه الفكريه....

هناك 8 تعليقات:

Mony يقول...

بلوج ممتاز يا شهيرة

و خصوصا انه قائم علي دراسة
مش تجارب يا نجحت يا فشلت زي حالاتي

انا شفت البوج كله
و رأي انه ممتاااااااااااااااز
بالذات طريقة اللانشون و البسطرمة
عجبوني موووت

طيب لي شوية سؤالات بأه:

اللانشون:
انت قولتي مقادير الفراخ بس ماقلتيش اد ايه بهارات
يعني مثلا ملعقة صغيرة من كل بهار ولا ايييه؟؟
انا ماعنديش السلك اللي حطيتي عليه رول الانشون علشان تدخنية
مافيش اي طريقة حاجة تانية مفتكسة احط عليها الرول علشان التدخين

البسطرمة:
انا بجيب الدوباردة و احطها في خلال العرق كله من النص ولا في الطرف اللي فوق بس؟؟
معلش هو سؤال غبي شوي
بس انا بحب الوصف الدقيق جداً

المارشميلو:
بنحط الجيلاتين و الماية الباردة في العجانة ساعة زمن..يعني اد ايه؟؟ولا لما يوصل القوام لاييه؟؟
و بنحط علي المقادير بتاعته ديه اد ايه نكهة و اد ايه لون(لو سايب او بودر)

معلش استحمليني:)
اخر حاجة
الساليزون:
ممكن حضرتك تتكرمي علينا و تحطيلنا الطريقة بعد ما سيلتي ريقنا
:)


معلش يا جميل علي الازعاج و علي التعليق الطويييييل
بس بصراحة البلوج ما يتفوتش

Mony يقول...

معلش نسيت

ممكن احط لينك ليكي عندي في المدونة
علشان الفايدة تعم

نكهة مغربية يقول...

ماشاء الله عبيك يا أختي
بموت في الانشون مدخن بس للاسف مقدرش أسويه في البيت بالشكل ده علشان الدخان
في طريقة تانية من فضلك ؟؟؟؟؟؟؟؟؟؟ظظ
بحبو جداا شكرا أختي يا ربي يكون مروري خفيف و لطيف
شكرا

Arlette يقول...

Hello,
Next week I am goig to try your Martadella, and taste this delicious meat!! let you know
thanks for sharing

Unknown يقول...

ماشاءالله والله تسلم ايدك واكثر شي عجبني طريقة تعليقك ودمك الخفيف اثناء شرح الوصفة.

غير معرف يقول...

eh 5afet el dam deh hhhhhhhhhhhhh :p

شيماء يسرى يقول...

بجد ياشهيرة انت زى العسل وحبيتك اوى انا اول مرة افتح صفحتك انت فينك من زمان وانا قولت لكل اللى اعرفهم عليكى وانت بجد دمك خفيف اوى ووصفاتك مش معقدة ونتمنى منكى المزيد وكلنا هندعيلك

نبض الكلمات يقول...

طريقة سهلة وجميلة .شكرا لكِ

ممكن كمان تعجبك المواضيع دى...يالا بينا ...

Related Posts with Thumbnails