أول معرض لمنتجات خريجات كورسات مطبخ شهيره...المعرض هيكون فى اسكندريه و بالتحديد فى سموحه..و هيبقى تجمع لناس جامده جدا جدا.....توتا و مروه و هديل و شيماء و علا و بسنت و سناء و انا و لسه البقيه تأتى......
كل المخبوزات و الاصناف من وحى المنهج اللى درسوه و طبقوه بنجاح....الدعوة عامه للحضور.....هتتعرفوا على اشطر و اجدع ستات و بنات.
مضيفه الحدث هتكون مدام فاطمه البربرى مصممه ازياء المحجبات الاولى فى مصر و الشهيره بتوتا هههههه...توتا هتستضيف المعرض باعتبارها كمان خريجه شطورة من الكورسات.
يا ريت تشرفونا علشان نتعرف بيكم و تتعرفوا بينا عن قرب.
ادعوا لنا بالتوفيق :)))

نااااا ناااا يموووو..... تحدى الشهر للديرينج بيكرز !!

تحدى الشهر ده من كنكااااا...قصدى كندا....كندا هتستضيف الشهر اللى جاى او الشهر ده مش داريه دورة الالعاب الاوليمبيه الشتويه ...كندا ترحب بزوارها..ده ان عرفوا يروحوا اصلا...ههههه

المهم احتفالنا هيكون من خلال طبق او نوع حلوى مشهورة جدا جدا فى كندا زى العسليه عندنا كده و كعاده الحلوى الامريكيه و الكنديه فهى حلوى دسمه و تقيله و ده كان رايى فيها اول يوم تانى يوم ...حسيت انها عاااادى...تالت يوم قلت انها خفييييفه..

و هو ده التعاطى...هههههه

المهم يا حلوين الوصفه كانت متوجهه بالتحديد و متضبطه علشان تناسب مرضى السيلياك او الناس اللى مش بتتقبل بروتين الجلوتين و لا بتهضمه فى معدتها و بالتالى كانت الوصفه اشبه بروشته طبيب السبب ايه ان كل انواع الدقيق التى لا يحتوى على الجلوتين غير متوفره فى مصر نهائيا و كأن مصر بلد الاصحاء, المشكله دى فجرتها من فتره قريبه و سعيت و ربنا شاهد عليا انى اجلب بعض انواع الدقيق دى من الخارج بس انتو عارفين لو عملت نسناس...مفيش فايده... المشكله كمان ان النوعيه دى من الاكل بتساعد الاطفال مرضى الاوتيزم لانه ثبت علميا تحسنهم مع اتباع نظام غذائى نباتى و نظام خالى من عنصر الجلوتين اللى بيضايقهم و بيمثل عبء اضافى عليهم و على صحتهم.

طيب ..الوصفه هترجمها بالدقيق بتاعنا علشان كلنا نقدر نعملها...

اولا كان لازم اعمل نوع بسكوت اسمه جراهام كراكرز و ده بيدخل فى نوع الحلوى دى و عملته و كانت وصفته كالتالى

2 و تلات ارباع كوب "معيارى " من الدقيق

كوب سكر بنى

م.ص بيكنج صودا

ذرة ملح

7 م.ك زبده طريه

تلت كوب عسل ابيض

3 م.ك لبن

ربع ملعقه فانيليا

نفرك الزبده فى الدقيق بعد ما يضاف له السكر و البيكنج صودا و الملح و الفانيليا و بعد الحصول على مزيج اشبه بالرمل بنضيف اللبن و العسل و نعجن و نشيل فى التلاجه.. و بعد ساعه و علشان نعرف نتحكم فيها لانها بتكون طريه بنفردها بالنشابه على دقيق و نقطع دوائر او مستطيلات زى ما نحب و ممكن نديها رشة قرفه و سكر كريستال على الوش....اه... نسيت لازم تتخرم زى شكل بسكوت الميرى كده ...فاكرينه؟؟.. و تتخبز فى فرن سابق التسخين على 180 درجه.

طيب ندخل على النانايمو بارز او اصابع النانايمو...

تلات طبقات

الطبقه الاولى او الارضيه

نص كوب زبده

ربع كوب سكر

5 ملاعق كاكاو "نوع كويس"

بيضه كبيره

1 و ربع كوب بسكوت جراهام كراكرز مفتفت...يعنى هنعمله علشان نفتفته "قله ادب مش كده؟؟"

نصف كوب لوز مطحون او سودانى علشان الميزانيه

كوب جوز هند

الطريقه

فى حمام مائى دوبى الزبده و السكر و الكاكاو و ضيفى عليهم البيضه و قلبى لحد ما يتخن المزيج...شيليه من على النار و ضيفى عليه فتافيت البسكوت و اللوز و جوز الهند . و بعدين فى صينيه بايركس بجوانب عاليه اكبسى الخليط و ساويه كويس و دخليه التلاجه استعدادا للطبقه التانيه.

الطبقه التانيه:-

المقادير

نص كوب زبده

3 ملاعق كريمه لبانى

2 ملعقه كبيره بودرة كريم باتيسيير

كوب و نص سكر بودرة

الطريقه..كله هيضرب بالمضرب جامد مع بعضه لحد ما لونه يفتح و يتفرد على الخليط اللى كان فى التلاجه و يخش التلاجه و لما يجبدأ يجمد...ندخل على المرحله التالته..يا مصبر العباد يا رب ....

الطبقه التالته:-

المقادير

125 جرام شيكولاته خام

2 ملعقه كبيره زبده

الطريقه :-

فى حمام مائى و اديها و انزلى بيها بعد ما تهدا حرارتها شويه على الخليط اللى كان فى التلاجه و بعد ما يجمد كله فى التلاجه قطعيها لصوابع...العيال هيحبوها جدا...

طيب دى الطريقه بتاعة بلدها....

و ده شكلها الاصلى

انا بقه شقلبت حالها شويه علشان اجدد فيها.. و اتفزلك حبتين...قدمتها كده

و كمان عملت بالفوندان التمائم الثلاث لدورة الالعاب الاوليمبيه الشتويه و اسمهم اسم النبى حارسهم

كواتشى "انعم و اكرم"

ميجا "ما شاء الله"

سومى "ربنا يخلى"

استمتعوا بالوصفه و كل تحدى و انتوا طيبين.

فين الوصفه ؟؟؟؟

عائده و ربنا يثبتنى..لا أظن ان فى حد منكم ممكن يتخيل ازاى كانت العودة صعبه عليا...بعد انشغال فى ميت الف موال وجدت انه لزاما على و اؤكد هنا على الالتزام و الشعور بان فى ناس تانيين مستنيننى ...مش عارفه ده صح الى اى حد ؟؟ بس السؤال عليا كتر...انا فين و بعمل ايه و ما بكتبش ليه... اسئله كتيره و اجابتها تنحصر فى الانشغال...فى الفتره السابقه كنت اعد لكتابى الاول ..او كتيبى الأول و باقى بالفعل رتوش صغيره و ينتهى و كله برضه متوقف على سرعة انجازى انا ..لأنى من الاخر برضه انا اللى هشيل الشيله ....

و قبل الكتاب كان شغلى مع مستر بيتر رينهارت و ده عالم فذه فى مجال الخبز و عملى و نشاطى معه كان تطوعى بحت و كان بهدف اختبار وصفات كتابه قبل ان ينزل الى الاسواق و لم اكن وحدى بل كان فريق عمل كبير يضم ناس من خيرة الخبازين حول العالم و الصراحه ان المجهود الضخم الذى كنت اقوم به كان خير عون لى على التعرف على انواع و تكنيكات جديده فى مجال الخبز ده طبعا بالاضافه الى التعامل مع هذا الرجل العظيم اللى بحبه جدا و بحترمه و اللى كرمنى و شرفنى بكتابه اسمى فى كتابه الجديد و شكره لى من ضمن فريق العمل الكبير اللى اخرج كتابه الجميل الى النور.

غير شغل بيتر كنت بتعلم التصوير و لا زلت ...كنت حابه انى صورى اللى احطها لا تكون اقل من اى صور بتتحط على مواقع اجنبيه...حابه اكلى و حابه اصوره بشكل جميل...

طيب انهارده مش هكتب وصفات و ده لأن كل صور المخبوزات اللى هحطها كل وصفاتها من كتاب مستر بيتر..بس ان شاء الله اول ما ينزل تحدى الديرينج اخر الشهر "عصابة الخبازين " اللى حكيت لكم عنها قبل كده...اول ما ينزل التحدى هنزله على طول مترجم على البلوج العربى يعنى مش هكتفى بس بكتابته على البلوج الانجلييزى و ذلك حتى تعم الفائدة...ده غير ان شاء الله النشاط اللى بنقوم بيه فى جروب وليمه.

طيب الصوره الاولى هتكون للبريوش و البريوش التقليدى و اللى على اصله ينقسم الى ثلاثه انواع و التمييز كان بناء على نسبه الدسم و المتمثل فى الزبد المضاف للعجينه...فانقسمت انواعه الى

بريوش الرجل الفقير او الطبقه الفقير

بريوش الطبقه المتوسطه

بريوش الرجل الغنى او الطبقه الارستقراطيه

و طبعا كل ما بنتغنى بنزود زبده و بنتخن و بنروح للدكتور علشان نخس :)))

ما علينا..بريوش انهارده كان بتاع الطبقه المتوسطه و يا وعدى على كميه الزبدة..خليتنا افزع من مجرد فكرة انى اعمل بريوش الطبقه الغنيه..البريوش من اكتر المخبوزات صعوبه فى عمله و التقليدى منه محتاج اكيد عجان لا محاله.

الوصفات قلت وصفات الكتاب و من غير الاخلاقى انى انشر وصفات الكتاب و احرق للراجل شغله و ده طبعا انا لا ارضى انه يحصل لى لما ينزل الكتاب بتاعى .

الصوره التانيه لصنف بريوش حادق و محشى سلامى و سجق ايطالى.

الصورة التالته للسينامون رولز و اللى عامل هلع للناس اليومين دول...:))

بس خلاص ..اتمنى انى اكون افدتم بشكل او بأخر... و ما كانش موضوعى من غير لازمه.....:)))

انتظرونى فى تحدى الشهر للديرينج بيكرز....حاجه حلوة اوى هتعجبكم كلكم :)))

أنا جيت....نورت البيت؟؟

عموما هنشوف.....سأعود بعد انقطاع....أتمنى أن يكون عودا أحمد ....
برضه هنشوف :))

ااااخر الافتكاسات

أتمنى ان تنال اخر افتكاساتى اعجابكم و شكراااااااااااااااااااااااا

سااااااااامحونى

سامحونى..ايوه كلكم سامحونى...كنت متغيبه و سأظل متغيبه يمكن كمان شهر
ادعوا يكون أقل
اسفه لكل واحد دخل البلوج و كان عايز يشوف حاجه جديده و انا جبت له احباط
اسفه اسفه
هذه الفتره كنت بتعلم تصويرو لا زلت و كمان فى مفاجأة حلوة.انا بحضر لاول كتاب ليا...ممكن نقول انه كتيب من 60 صفحه.. و محتواه ايه؟؟ لا دى بقه لما ربنا يكرمنى و ينزل...انا بعمل فيه مجهود كبير و يا رب يطلع زى ما انا حابه انه يكون....علشان افضل دايما عند حسن ظنكم.
ان شاء الله الفتره المقبله...شكل البلوج هيتغير و محتواه هيبقى افضل بكتير و هحاااول انى اخصص له وقت زياده شويه
دعواتكم و كل سنه و انتوا كلكم طيبين :)))

عمر ماكويين !!!

يا ترى مين عمر ده ؟؟؟

عمر ده طفل لذيذ و قمور و بيسمع الكلام " و بزياده شويه الاسبوع اللى سبق يوم الاحتفال بيه" :)))

عمر ابن بسنت صاحبتى كانت مامته عامله له احتفال لأنه ولد شاطر و بيسمع الكلام... و ده طبعا علشان تشجعه يكمل مسيرة الادب و الاخلاق العاليه. عمر بيعشق كل العربيات و بالذااات عربيه "lightening macqueen" و العربيه دى من شخصيات ديزنى و اللى ظهرت من خلال فيلم " cars".

لو رحتوا زرتوا عمر هتلاقوا فى اوضه نومه بوستر للعربيه ..حتى ادوات مدرسته و شنطته كمان للعربيه دى بالذات و مامته علشان تكرمه زياده حبتين طلبت منى انى اعمل لعمر تورته على شكل العربيه.....شغلت الفهامه و حبيت ان التورته تكون ثلاثيه ألأبعاد يعنى مجسمه مش مجرد رسمه على تورته او شكل للعربيه مسطح... و كانت اول مره اعمل حاجه كده يعنى شغاااله عميانى و من قالب كيك ضخم و مستطيل كانت المهمه انى انحت العربيه بكامل انحناءاتها و ابعادها و النت شغال طول الوقت و متثبت على صوره العربيه و امكانيه لفها 360 درجه علشان اشوفها من كل الزوايا و حاولت على اد ما اقدر انى احاكى الشكل الاصلى و كانت مهمه صعبه لانى للاسف ما اديلكمش اماره فى اى ماركه عربيه خااالص و لازم اسأل حد معايا عن ماركه اى عربيه معديه هى ايه دى او نوعها ايه و يعنى سعرها يطلع بكام كده يعنى... من الاخر عندى جهل تااام بالعربيات رغم انى بسوق مثلا من 6 سنين الا ان اخرى عربيتى حبيبتى 127

اصيله و الله...ههههههه

المهم التورته اتعملت و نالت اعجاب عمر باشا و كل المدعوين... و عقبال كل سنه يا عمر ..انت تعقدنا بعربياتك و انا اجرب ايدى فى كل الماركات و اهى منها ثقافه برضه.....هههههه

و كل سنه و انت طيب و مؤدب و شاطر و حلو و تسمع كلام ماما على طوووووووووول "فاكرين انتوا طبعا برامج الاطفال العتيقه و المقولات المأثوره بتاعتها"" هيييه كانت ايام !! القناه الاولى و التانيه من امامكم و الملل من وراءكم فكنا بنستسلم و ليس لنا خيار اخر :)))

هسيبكم مع الصور يا حلوييين.....

و العجله اهه يا عم كمان منفوخه و متظبطه على الاخر...:))))

خارج الخدمه
خارج الخدمه
خارج الخدمه

عيد ميلاد يشار و محمد ..لا محمد و بعدين يشار !!

ميكى و مينى فى نزهه خلويه و المكان...نقول فى حدائق المنتزه.....!!!

مينى بتخرج مع ميكى علشان بتحبه و فاكره انه هيجوزها !!!

بس فى الحقيقه ميكى مش بتاع جواااز خاالص و فيه ميت الف حاجه فى دماغه..يعنى ميكى بتاع خروج و بس....

مينى مش مستوعبه الفكره دى و لسه بتحبه و هتفضل تحبه..بس لحد امتى؟؟؟ لازم الصابونه هو اللى يديهالها......لازم فيها عرق مصرى !!!

ميكى مفيش فى دماغه غير حاجه واحده بس و كلنا عارفينها و هى...عينيها مغميه و مش شايفه حاجه غير انها برضه بتحبه !!!

جاتها خيبه..بصوا بتبص له بهبل ازاى؟؟؟.... مينى يا حبيبتى ...ميكى مش سرحان فيكى ده بيفكر ازاى يلاقى " الموسكاداة الغامضه" يعنى من الاخر ميكى مقضيها موسكاداوات......

فهمتوا حاجه ..اتفرجوا على ديزنى شانيل و انتوا تفهموا و تقدروا حجم المأساه

ده صنف حادق لزوم العيد ميلاد و اسمه كاسادييلو...ايطالى يا مرسى و محشى سلامى و جبنه شيدر.

اه عاجبانى الارضيه حبيت افرجهالكم !!

أول حاجه هتتسائلوا يعنى ايه يشار و ده السؤال اللى سألته لمامتهم بعد ما عملت التورته طبعا ..لأن مامتهم طلبت التورته قبلها بيومين و لما اعترضت.....قالت لى ايه يا شهيره؟؟؟ ..دى تورته!! و كأنى اضربها فى الخلاط و تطلع تورته...هههه و بما انها صاحبتى فى المدرسه يعنى معرفه كده ييجى من.....سنه علشان بس ما تعدوش ورايا..مارضيتش اكح معاها و توكلت على الله !!

مامتهم كانت معايا فى نفس المدرسه و فى نفس الفصل يعنى ابو زمل فطبعا ماقدرتش اكح معاها ..بس اعلنت الطوارئ و طبقت 48 ساعة و انا صاحيه..علشان انجز المهمه لأن كان فى تورته تانيه كمان.

تورته محمد و يشار او يشار و محمد من احلى التورت اللى عملتها و انا شخصيا عاجبانى رغم انى صعب ارضى عن حاجت و اللى عجبنى فيها ان الكاراكتر طلعوا بالضبط الكراكترز الاصليين و الاهم انى عملتهم بدون اى استعانه بكتب او اى ماده علميه لان كتاب علشان يتعمل و يعلم فيه طرق كراكترز شخصيات ديزنى لازم تكون شركة ديزنى تحديدا هى اللى عاملاه و الا يصبح تعدى على الملكيه الفكريه ليهم مش السطه اللى عندنا و اللى مخليانى اتردد الف مره من اصدار كتاب و ده لانى عارفه مصيره هو التداول المجانى على الانترنت و تضيع حقوق الناس اللى طلع بوزها علشان تعمله..المهم خلينا فى العيد ميلاد ..يشار يعنى يحى او عائشه باللغه التركيه..يالا اتثقفوا بقه.. ...كل سنه و محمد و يشار طيبين و عقبال تورتة الفرح!!!

....................................................................................................................................................................................................................................................................

طيب خلاصة القصه يا حلوين و السؤال اللى بيطرح نفسه ..هل مامت مينى كانت عارفه انها خارجه مع ميكى و الا العمليه كلها فى الخباثه و انا بالصور الخطيره دى أكون عكيت الدنيا ؟؟؟؟؟؟؟

أستر يا رب....

أنا مش قصدى غير كل خير والله !!!

أه أنا قلت تورته تانيه...ثانيه واحده أجيبها و أجى ماتمشوش يا حلوين.....

بس خلاص !!!

كل سنه و انتى طيبه يا جنا !!

عيد ميلاد جنا...

مامة جنا كانت عايزة تورتة كريمه و كمان كاب كيك شوكولا بالفوندان مخصوص علشان جنا...

و حبيت اشارككم بالصور و حبيت مخصوص اهنى جنا الصغيره جدا بعيد ميلادها .

تحدى يونيو لوليمه...يالا بينا !!

تحدى الشهر ده قصدى اللى كان ده ...متأخره يومين بقه و مش طايقه نفسى..يالا سماح النوبه.

تحدى الشهر كان عن البحرين..و طبعا احنا احتفالنا بيبقى بطبق...طبق المره دى كان سمك..هو فى الحقيقه كان فيه اختيارين..طبق سمك و طبق تانى اسمه خبيصه..الصراحه و رغم جرأتى فى خوض تجارب مطبخيه جديده الا انى مش عايزة اعمل الخبيصه و لو فى حد يقدر يقنعنى بالعكس فليبدأ بالمحاوله و انا اسيب له نفسى خاااالص ....هههه ...خبيصه يا جماعه ..دى مش اى حاجه ...

المهم عملت طبق السمك و كان حلو بس اللى غاظنى فيه و اللى بيغيظنى فى اى مطبخ هندى او ايرانى هو احتقارهم للملح و الفلفل ..معرفش ليه..يعنى يولعوا الدنيا ب ييجى خمسين نوع تابل و ييجوا عند الملح و الفلفل ..لا طب بلاش الفلفل ..الملح يا جماااعه ؟؟ فين الملح؟؟؟

المهم الطبق المره دى طبقى يعنى طبقى و انا حرة فيه ..طبقى أغسله و أكويه..فطبعا حطيت ملح و لزوم الانحراف كمان حطيت فلفل ..بس ابيض علشان ماحدش يا خد باله...ششششش ..سر ..ماشى؟؟

من الكلام كده و الخلاصه عايزة اقول ان المطبخ البحرينى و بحكم موقعه متأثر كتيير بالمطبخ الهندى و الفارسى و مطبخ منطقة الخليج العربى ببهاراته و توابله المشهورة !!

وصفة السمك...

المقادير:-

1 م.ص من الكركم

2 م.ك زيت نباتى

1كيلو سمك فيليه..انا اخترت سمك لوت من ولاد عم الوقار كده

2 وحدة فلفل اخضر حار او ممكن حلو زى ما تحبه

1 م.ك من الجنزبيل الطازج

4 فصوص توم

2 حبه بصل

2 حبة طماطم

1و نص م.ص مسطرده

مرقه سمك او ماء فقط حوالى 2 كوب

الطريقه:-

نخلط الكركم مع الزيت و نتبل بيه السمك طبعا فى هذه اللحظه الحاسمه اضفت الملح و الفلفل فى الخباثة و من غير ما حد يشوفنى من الاخوة اهل البحرين..ههه

حطيتهم فى طاجن و دخلته الفرن على حراره عاليه علشان يتحمر و فى هذه الاثناء..ضربت باقى المكونات فى الخلاط.. و فى طاسه و بملعقه زيت كثفتهم لحد ما بقوا زى الصوص التقيل شويه ..حطيتهم على السمك و سيبته يكمل سوى, بس خلاص...قدمت الاكله مع الرز البسمتى بالشبت و السلطه الخضراء كمان .

و بالهنا و الشفا... جربوها و لن تندموا .

استنونى الشهر ده ..التحدى هيبقى من المطبخ المصرى.. و هنولع فى البلوجات بتاعة وليمه كلها باذن الله ......هههههه

يا ترى عندكم اقتراحات ايه؟؟؟؟؟

نديها كشرى و الا ممبار و الا كوارع و الا محشى و الا فته و الا مسقعه و الا بصاره

دبرنى يا وزييييير !!!!

أشوفكم على خير ان شاء الله مع يوم مصر الشهر القادم .

علاء الدين و المصباح السحرى !!

علاء الدين و المصباح السحرى !! بس خلاص !!

بسسسسسس خلااااااااااااااص !!!

قصة الأمير الضفدع !! مين عارفها؟؟؟

The Princess and Frog

There was once a princess who had a golden ball. She loved to play with her ball near a pool in the garden.في قديم الزمان كانت هناك أميرة لديها كرة ذهبية تحب أن تلعب بها قرب بحيرة الحديقة.One day, the ball bounced into the pool and sank in to the bottom. She started to cry.في احد الأيام تدحرجت الكرة إلى البحيرة و غرقت إلى أسفل و أصبحت الأميرة تبكي.Suddenly, she heard a voice saying, "why are you crying, dear princess? " she look up and saw ugly frog.فجأة سمعت صوتا يناديها لماذا تبكي أيتها الأميرة ؟! فلتفتت الأميرة لتجد أن الذي يخاطبها لم يكن الا ضفدعا قبيحا .She told hem about her ball. The frog said, "I can get it for you if you grant me my wish."روت الأميرة للضفدع سبب حزنها فقال: لها الضفدع سيحضر لها الكرة إن هيحققت له أمنية."What do you want from me?" she ask, "my jewels or my crown?"سالت الأميرة: ماذا تريد مني هل تريد مجوهراتي ؟ أم تاجي الذهبي ؟"No dear princess," said the frog, "I only ask you that you let me eat with you and sleep in your bed."اجب الضفدع لا أيتها الأميرة كل ما اريدة أن تدعيني أكل معك و أن أنام في فراشك.The princess thought the frog was joking, so she said, "Yes, I promise."ظنت الأميرة أن الضفدع يمزح معها فأجابت : نعم أعدك بذلكThe frog dived into the water and soon come up with the golden ball. The princess it and ran a way.غطس الضفدع في البحيرة وسرعان ما عاد بالكرة الذهبية. أخذت الأميرة الكرة وفرت هاربة.The frog called out, "Wait, take me whit you!" She did not even look back at him.صاح الضفدع: انتظري خذيني معك؟ ولكنها لم تلتفت إلى الوراء! .That evening, when she was having dinner with her father, there was a knock at the door. She opened the door and there was the frog!وفي المساء عندما كانت تتناول العشاء مع والدها سمعت طرقا على الباب. فتحت الباب فإذا بها تجد الضفدع !!.She quickly shut the door but the king asked about the visitor. She had to tell him what happened that.أغلقت الباب بسرعة , ولكن والدها الملك تساءل عن الضيف فاضطرت لاخبارة بماحدث لها ذلك اليوم! ."You must keep your promise," said her father. "Let him in."فقال لها والدها: عليك أن تحفظي وعدك ! و ادخليه إلى الداخل .The frog followed her to the table and ate from plate!تبعها الضفدع إلى الطاولة و أكل من طبقها .After that, she took him to her bed. As he touched the pillow, he changed into a prince!بعد ذلك أخذته إلى فراشها و ما أن لمس الوسادة حتى تحول الضفدع إلى أمير وسيم الشكل! .He said an evil which had cast a spell on him; witch only a king*s daughter could break granting him his wish.واخبرها أن ساحرا قد سحرة على هيئة ضفدع وانه يمكن لابنة الملك أن تعيده إلى حالته أن هي حققت له امنيتة.He ask her to marry him and they lived happily ever after.طلب منها الأمير أن تتزوجه فوافقت وعاشا في سعادة و هناء.

كل سنة و أحمد و سنا طيبين...و عقبال مئة سنه !!

كل سنه و انتى طيبه يا منه !!!

تورته منه بنت تامر ...كل سنه و انتى طيبه يا منه.. و ربنا يتمم شفاكى على خير ,,,منه حبك معاها الجديرى يوم عيد ميلادها..يالا يا منه علقه تفوت و كلنا اخدنا الدور ده...كل سنه و انتى طيبه

Waffles , esp. For Nancy !!

وصفة الوافلز اهداء لنانسى اللى صبرت معايا كتييير....معلش يا نانسى...أنا وحشه..يالا زغرطى بقه !!

انا عملت وصفتين الأولى اهه:-

المقادير:-

2 بيضه

نص كوب زيت نباتى او زبده مذابه

كوب و تلاته ارباع لبن

ملعقه كبيره سكر او ملعقتين حسب الرغبه

4 ملعقه صغيره من البيكنج باودر

ربع ملعقه صغيره ملح او اقل حسب الرغبه

الطريقه:-

يضرب البيض بالمضرب حتى نحصل على رغوه

تضاف باقى المقادير و تقلب حتى التجانس ...نبدأ نشتغل بيه او نستنى ساعتين ..أنا افضل الانتظار

تسخن ماكينة الوافلز حتى نرى النور الاخضر. و نصب الوافلز و نتركه 5 دقايق فى المكنه بتاعتنا هيطول شويه يا نانسى.

قدميه مع العسل أو المربى و الزبده او مع فروت سلاد او ايس كريم او حتى مع فسيخ لو حبيتى ...ههههه

ملحوظه خاصه بنانسى..علشان الدقيق بتاعنا و الجلوتين اللى فيه قدامك حل هو انك تقللى مقدار الدقيق اللى فى الوصفه يعنى هتنزليه لكوب و نص.. أو انك تستخدمى دقيق متعدد الاغراض العادى اللى فى السوق

او الدقيق بتاعنا كوب و نص و تحطى له ملعقه نشا.

يالا اعملى و و رينى الانتاج و ان حصل عطل هاجى اعمله بنفسى و اريحك و ارتاح و ترتاح البشريه كلها الى الأبد ...هههههه

و فى وصفه تانيه عند ليلى ..أنا جربتها و طلعت حلوة اوى ..ده لو بتحبى جوز الهند.... وصفة ليلى هنا

http://lailablogs.com/?p=823&lang=ar

بالتوفيق نانسى هاااانم !!