الثلاثاء، 30 ديسمبر، 2008

انتاج المحاضرة اللى فاتت.. برافو بنات!!


بس المرة اللى جايه مش هحط ايدى خااااااااااااااااااااااالص!!!!!
يا سلام على الالوان المطرقعة...
كل سنه و كلكم طيبين
...

أول تحدى لى فى منظمة "Daring Bakers"تحدى الخبازين اللى مبيخافوش من حاجة!!!


Details on:-
www.chahirakitchen.blogspot.com

الخميس، 25 ديسمبر، 2008

Red Velvet Cake






أو الكيك الاحمر المخملى .. لسه مخلصاها ... و الكيك ده بلده امريكا أو الولايات المتحدة الامريكية .. و تحديدا جنوب الولايات ... طبق حلو خاص جدا بالجنوب و ليه حكايه هحكى لكم عليها بكره لما ارتاح...



سلام مؤقت.....
تانى يوم!!!
طيب يا ولاد ,, ارتحت خلاص و خدت نفسى .. ما اعتقدش بس برضه الوصفة اهه علشان اللى يحب يعملها اول حاجة نحضر المقادير:-
2و نص كوب دقيق
1 و نص كوب سكر
1 م.ص بيكنج صودا
1م.ص كاكاو
1 و نص كوب زيت نباتى
1 كوب لبن رايب
2 بيضة كبيرة
2 ملعقة كبيرة ملون طعام احمر سائل
1 ملعقة صغيرة خل
نص ملعقة صغيرة فانيليا
و للحشو و التزيين :- كريمة الجبنه و مقاديرها 100 جرام زبدة .. حوالى 2 كوب كريم شانتى و 200 جرام جبنة كريمة و سكر حسب الرغبه.
طيب قبل ما نبدأ فى التنفيذ نسخن الفرن على درجة حرارة 180
و نبدأ الشغل , نحضر اناءين واحد للمواد الجافة و واحد للمواد السائلة و الجافة ننخلها و السائلة نضربها على خفيف و بعدين نخلط المزيجين معا و نصبهم فى قالب كيك مقاس 20 او 22 و يدخلوا الفرن و بعد 30 دقيقة هيطلع لنا احلى كيك.
و بالنسبة للكريمة تخفق كل المقادير السابقة مع بعضها بالمضرب الكهربائى و لازم تكون كلها فى درجة حرارة الغرفة.
و نبدأ نقطع الكيك نصين ده طبعا بعد ما يبرد تماما و بعدين نحشى بالكريمة و نزين بيها كمان من الخارج و كل واحد طبعا و ذوقه..
طيب انا استخدمت فى التزيين شويه Pecan nuts و ده نوع مكسرات امريكى من فصيلة عين الجمل و طعمه كتييير متقارب ..كمان الكاكاو اللى يستخدم انصح انه يكون من النوع الفاتح حتى لا يتأثر لون الكيك الاحمر .. كذلك يفضل انتقاء ارقى انواع الالوان الطبيعية لضمان الحصول على لون احمر جميل...بس كده!!!
طيب ايه حكايه الكيك ده .. الكيك ده من تراث المطبخ فى جنوب الولايات المتحدة الامريكية و يقال ان العبيد الزنوج فى الجنوب هم اول من ابتكروه و كانوا يعدوا هذا الصنف فى المناسبات و الولائم اللى كان يقيمها اسيادهم البيض!!!
اياااااااااااام زمااااااااااان ... أيام فاتت! الله ما يرجعها!!!
يالا حماس عايزة اشوف حد يقول هطبق الوصفة!!!

الأربعاء، 24 ديسمبر، 2008

انتاج محاضرة انهاردة!!







انهاردة كان فيه محاضرة "تارت" عملنا العجينة الرئيسية للتارت و الباى الحادق و الحلو و المحايد و حبيت اشارككم فى صور الانتاج .. يا رب تعجبكم!!!!

اعضاء منتخب الدورة بتاعة الاتنين و الاربعاء"علا,هديل,و مامة هبه"!!

يالا ربنا يوفقهم و يتخرجوا!!!!





الثلاثاء، 23 ديسمبر، 2008

ادحرج و اجرى يا رمان!!!

أغنيه من الذاكرة ... مرة حضرت فرح جماعة فلاحين و انا صغيرة و كانوا بيزفوا العروسة و يغنوا ... ادحرج و اجرى يارمان وتعالى على حجرى يا رمان !!!!
يعنى ايه علاقة الرمان بالعروسة و العريس ؟؟ مش عارفة و لو حد يعرف يا ريت يقول لى و يعمل معروف....

طيب ايه علاقة اغنية الفرح باللى بعمله او بكتب عنه ... الاغنية افتكرتها و انا غرقانه فى المطبخ وسط الرمان و خايفة مووووت يوسخ مريلة المطبخ المفضلة عندى.... سيبت الاغنية و قعدت اصور بذور الرمان الجميلة .. لا يسعك فى هذه اللحظة الا انك تقول .. سبحان الله !!!!

خلق كل حاجة جميلة و خلق الانسان ليعمر الارض بس افسدها و دمرها و اخل بتوازنها .. يعنى تبص من الشباك و الا تمسك ثمرة رمان احسن و تتأمل فى بديع صنعه؟؟؟؟




طبعا ثمرة الرمان .. يالا بينا على الصور...

اهداء الى اليمان!! صديقتى السوريه!!!

صديقتى اليمان السوريه .. و اللى احب اعرفكم عليها ... شخصية محترمة و نشيطة و غايه فى الذكاء و لديها مواهب متعددة.. يعنى هانم من هوانم الزمن القديم... لأتى بشوف ان اى ست فى بيتها بتنتج و ترعى اهل بيتها و دايما تتعلم جديد علشان تعود بالفايدة على اهل بيتها... بشوفها هااااااااااااااااااااانم و تستاهل لقب باشا بجدارة!!!


اليمان أولا بتعمل حاجات حلوة اوى مخبوزات و اكل شامى حكايه ,, هى هنا جربت وصفة الكيك بتاعى و عجبتها و انا الصراحة عجبنى تطبيقها جدا و علشان كده حبيت اشارككم بالصورة بتاعتها ده بعد اذنها طبعا!!



كمان عملت فطيرة الخاتم بس على حادق يعنى حشيتها جبنه و زعتر و سبانخ.... يمى يمى يمى!!!



يالا نسألها عملتها ازاى؟؟؟
الصور حكاااااااااااااااااية !!مش كده؟؟؟؟











البطاطس دى فيها ايه ؟؟؟ ايه الحكمة يعنى من الصورة !!مسابقة كله يدخل و يجاوب!


البطاطس دى فيها ايه؟؟؟
و ليه مصوراها؟؟؟
و اللى عارف منى شخصيا قبل كده ما يسيحش يعنى ما يقولش و يدى فرصة لاخواته يجاوبوا... يالا يا ولاد و يالا يا بنات و اللى هيجاوب صح , ليه جائزة قيمة







الاثنين، 15 ديسمبر، 2008

لأول مرة بالاسكندرية!!مدرسة لتعليم فن الطهى و الخبز بس !!!

بسم الله الرحمن الرحيم
- دورات المطبخ المتكاملة تشتمل على سبع دورات:-الاولى:دورة هاى تى.
الثانية:دورة المخبوزات.
الثالثة:دورة سهل /صحى/سريع.
الرابعة: دورة طهى للمبتدئين.
الخامسة: دورة طهى متقدمة.
السادسة:دورة هديتك من مطبخك.
السابعة:دورة مطبخ للاطفال.
أولا:- دورة high tea
الموضوع:- اعداد بوفيه كامل للمناسبات المختلفة يشمل حلو و حادق.
عدد المحاضرات:-5 محاضراتالاولى: الاسفنجية + التغطية
الثانية: الكيك بأنواعه + Quick bread
الثالثة:التارت ( حادق ساليزون + حلو)
الرابعة: الشو (حادق ساليزون + حلو-بروفيترول,اكلير,كروك اون بوش)
الخامسة:بسكويت و كوكيز (حلو و حادق)عدد الساعات:- 3 ساعات لكل محاضرة باجمالى 15 ساعة للدورة .
ثانيا:- دورة المخبوزات :-
الموضوع:- التدرب على الخبز عن طريق ممارسة تكنيك العجن و الخبز أكثر من مرة عمليا.
عدد المحاضرات:-4محاضرات.
الاولى: خبز فرنسى .
الثانية:بريوش.
الثالثة: دانش.
الرابعة:بيتزا و فطائر.
عدد الساعات:- 3 ساعات و نصف لكل محاضرة.
ثالثا:- دورة سهل / صحى / سريع :-
الموضوع:- مع وقع الحياة المتسارع ، تنامت الحاجة الماسة لدى ربة المنزل فى إختصار الوقت الذى تقضيه فى المطبخ و على الرغم من ذلك ترغب فى إعداد وجبات صحية متوازنة لأبناءها ، هذه الدورة تحقق هذه المعادلة الصعبة .
عدد المحاضرات:-4محاضرات
الاولى: مكرونة و أرز
الثانية: سلطة .
الثالثة: لحمة .
الرابعة: دجاج .
عدد الساعات:- 3 ساعات لكل محاضرة.
رابعا:- دورة طهى للمبتدئين:
-الموضوع:- هذه الدورة تخاطب أى انسان لديه الرغبة فى الالمام بأصول الطهى الأساسية و تقترح مفردات عديدة بغرض اعداد مأدبة أنيقة و راقية تمثل وجبة متكاملة و متوازنة .
عدد المحاضرات:-5 محاضرات.
الأولى:- سلطات.
الثانية:- شوربات.
الثالثة:- لحم و دجاج.
الرابعة:- أرز و مكرونة.
الخامسة:- مأكولات بحرية.
الساعات:-3 ساعات لكل محاضرة.
خامسا:- دورة طهى متقدمة:
-الموضوع:- خلال المحاضرات سنقوم بجولة حول موائد العالم ,نعد معا أشهر أطباقها.
عدد المحاضرات:- 4 محاضرات.
الأولى: مقتطفات من المطبخ اللبنانى ,
الثانية: مقتطفات من المطبخ الأمريكى و المكسيكى ,
الثالثة: مقتطفات من مطبخ البحر المتوسط ,
الرابعة: أسيوى.
عدد الساعات:-3 ساعات و نصف لكل محاضرة.
سادسا:- هدية من مطبخى:
-الموضوع:- مشكلة دائما ما نواجهها ألا و هى البحث عن فكرة لهدية جديدة , هذه المشكلة سوف تنتهى تماما . اصنع هديتك فى مطبخك و قدمها بشكل أنيق و متفرد.
عدد المحاضرات:-4 محاضرات
الأولى:كيك أنيق و مبتكر+ طريقة انيقة للتغليف و التقديم.
الثانية:truffes + طريقة تغليف و تقديم .
الثالثة:نوجة و توفى راقى مع التقديم و التغليف.
الرابعة: مربى و مارملاد رائع من مطبخك.
عدد الساعات:-3 ساعات لكل محاضرة.
.سابعا :-دورة مطبخ للأطفال:
-الموضوع:- المطبخ ايه؟ معمل كيمياء, يعنى ممكن نعمل اختراعات و نبتكر. ممكن نبسط العلوم فى المطبخ ! و ننمى قدرات أولادنا الجسمانية و الذهنية و نعلمه ازاى يشغل مخه مع ايديه .
عدد المحاضرات:-4 محاضرات.
الأولى : فراشات و ورود.
الثانية:shake the milk+jello fruit salad
الثالثة: chocolate honey bees
الرابعة:snowy men
ملحوظة: تدرس المحاضرات باللغات الانجليزية أو الفرنسية أو العربية حسب رغبة الوالدين.
- هذه المحاضرات موجهة للأطفال من سن 8 الى 12 سنة يتم تعريف الأطفال من خلالها على أصل الخامات المستخدمة , التعريف بكيمياء الخبز , فائدة الطعام الصحى المتوازن بالاضافة الى تناسق الألوان و توزيعها فى طبق التقديم.
- عدد الساعات:- 3 ساعات لكل محاضرة.
ملحوظات هامة:-
- كل دورة تتعرض فى المقدمة الى اجراءات الأمن و السلامة الواجب اتباعها بالمطبخ .
-على المتدربين الالتزام التام بمواعيد المحاضرات لأنها تبدأ تماما بالموعد المحدد.
- على المتدربين احضار apron أو المريلة الخاصة بهم.
شهيره داود

السبت، 22 نوفمبر، 2008

تطبيقات , تطبيقات ,تطبيقات,,ااااه يا ايدى!!!!!كييييييك و بس!!!















































































و لا كلمة ششششش , صور و بس...

الكيك الليلة , الليلة , الليلة , ليلة عيده!!!!!ترالا ترالا ترالا


بنات ,, ولاد ... كله يجمع انهاردة محاضرة ,, بقالنا كتير بنرغى ,, يالا بقه نخش فى الجد ...
الجايه دى محاضرتى فى الكيك هنزلهالكم مجانا و exclusive على رأى عمرو أديب باشا...فلما تلقونى قلبت لغة عربية مش عايزاكم تتخضوا لأنها محاضرة و زى ما انتوا عارفين لازم نلم الدور , يالا بينا...
الوصفة الأساسية للكيك البسيط:-
المقادير:
- 3 كوب دقيق متعدد الإستخدام
- 1 كوب: زيت / سمن + زيت / زبد + زيت / زبد
- 4 بيض أحمر / أبيض أو 5 بيض بلدى
- 1باكو B.P. (Baking Powder )
- 3 /4 1 كوب سكر بودرة أو 2 كوب حسب الرغبة
- 1 كوب لبن /لبن + عصير برتقال /عصير برتقال
- بشر برتقالة كاملة
الخطوات:
- يجب قبل البدء مراعاة أن تكون كافة المكونات بدرجة حرارة الغرفة / نخل الدقيق و إضافة الB.P. عليه ،تسخين الفرن قبل وضع الكيك ب 10 دقائق.
- يضرب الزبد مع السكر البودرة حتى يصبح الخليط كالكريمة و فاتح اللون
- يضاف البيض بيضة تلو الأخرىمع الضرب جيدا
- تضاف الفانيليا + بشر البرتقال مع أخربيضةلإضفاء نكهة للكيك
- يضاف 1/2 مقدار الدقيق يليه1/2 مقدار اللبن(السائل) و يقلب بملعقة معدنية حتى يتجانس
- يضاف النصف الأخر من الدقيق و اللبن و يقلب الخليط مرة أخرى
- يتم تبطين القالب بدهنه جيدا بالزيت أو السمن و رشه بالدقيق
- يصب الخليط على ألا يتجاوز 2/3 حجم الإناء
- يدخل فى فرن درجة حرارته 180 o م سابق التسخين
تنويعات:
1- شكل الكيك:
يمكن التنويع فى شكل الكيك حسب شكل الإناء قد يكون مستدير ring mould أو قالب pound cake أو قوالب فردية cup cakes و يوجد أشكال أخرى فى السوق


2- الطعم و النكهة:
- نكهة البرتقال و الليمون و نحصل عليها من خلال بشر قشرة الثمرة و إضافة عصيرها مع الإلتزام بالمقادير السابقة
- فانيليا / كاكاو حيث يضاف الفانيليا على العجينة الأساسية أثناء ضرب البيض وبعد الإنتهاء من خلط الدقيق تقسم العجينة إلى قسمين ،قسم يخلط ب 2 م.ك كاكاو غامق أو حسب الرغبة مع إضافة م. ك لبن إضافية للخليط المضاف له الكاكاو و تصب العجينتين بالتوالى و يمكن تبديل الكاكاو بالقهوة سريعة الذوبان
- القرفة وتضاف أثناء خفق الزبد مع السكر حوالى 1 م.ك قرفة
- عين جمل مطحون / أو بندق لكيك الشيكولاتة
3- الشكل و الطعم:
وذلك بإضافة شكل جديد من خلال مكونات فرعية تعطى طعم مختلف فى كل مرة مثل :
الشيكولاتة الحرارية chocolate chips ،الزبيب ،الكريز المسكر ،الفواكه المسكرة المشمشية و القراصيا، المكسرات المجروشة خشن.
يراعى قبل وضع هذه الإضافات رشها بالدقيق و نخلها للتخلص من الدقيق الزائد و تضاف مع الدقيق و فى هذه الحالة يراعى التقليب برفق حتى لا تهبط المكونات أسفل القالب.

وصفة ال Olive Quick Bread :
وهى وصفة مبتكرة لكيك حادق يصلح للإفطار أو كصنف حادق على بوفية شاى High Tea .
المقادير:
- 315 جرام دقيق - 2 م.ك B.P - 2 م.ك سكر
- ذرة ملح - 2 بيضة كبيرة - 170 مل لبن
- 2 م.ك نعناع طازج أو مجفف مطحون - 90مل زيت نباتى
- 155 جرام زيتون أسود شرائح أو (50 جرام زيتون أسود + 50 جرام بسطرمة أو سلامى مقطع رفيع جدا + 50 جرام رومى مبشور)
الخطوات:
- ينخل الدقيق و يضاف له ال B.P و السكر و الملح و تقلب المكونات
- نعمل حفرة فى الوسط و نضيف البيض و اللبن و الزيت ثم نقلب مع إضافة الزيتون
- تصب فى قالب الكيك المبطن و تدخل فى الفرن سابق التسخين 180 o م.

ملحوظات هامة:
- لا يفتح الفرن اطلاقا أثناء عملية طهى الكيك
- للتأكد من تمام نضج الكيك نضع Skewer أو سكين إذا خرج نظيفا يكون الكيك قد نضج
- يترك الكيك ليبرد بعد خروجه من الفرن حوالى 5 دقائق ثم يقلب على الwire rack شبكة لكى يبرد
- يمكن حفظ الكيك فى علبة محكمة داخل الثلاجة لفترة طويلة
- يمكن حفظ الكيك فى الفريزر بلفه فى ورق فويل و وضعه فى كيس محكم حتى لا تتسرب له أى روائح أخرى.


مدام شهيرة عبد الفتاح

يالا محاضرة ببلاش , استغلوا الفرصة و ذاكروا كويس و اعملوا ال !!!Devoir

فى البوست اللى جاى مفيش غير صور تطبيق الكيكة دى ,, يالا كله يدخل فورا!!!

ايه حكايه شهيرة الخبيرة دى؟؟؟؟؟

انا يا جماعة شهيرة الخبيرة و الخبيرة دى والله مش انا اللى اطلقتها على نفسى ,, يعنى مش فذلكة و غرور و العياذ بالله ,, انا كنت اتقدمت لمسابقة ستار شيف العرب على قناة فتافيت و تم اختيارى ضمن التوب 22 مش دى القضية ,القضية هى ان المذيعة الله يعزها كانت بتقول عليا و تعلق و تأكد :"شهيرة الخبيرة " و من ساعتها و عيالى بيزفونى " شهيرة الخبيرة , شهيرة الخبيرة " و لزق اللقب يا جدعان.انا ست بيييييت مصرية و بركز اوى على ست بيت دى , لأنى اعلن الان و على الملأ انى قررت ابقى ست بيت و اتكلم بلسان حال ست البيت و ادافع كمان عن حقوق ست البيت , و ست البيت اللى بكلم عنها مش الهانم اللى بتروح للكوافير كل يوم و شغلها الشاغل ضافرها اللى اتقطم ,,لا انا بتكلم عن ست البيت اللى انضربت بالرصاص!!!!انا و خلال كل الفترة اللى فاتت و هى تقريبا 10 سنين , بحاول و بحاول , كان هدفى انى اساهم فى دفع عجلة التنمية , بس للأسف طلعت التنمية مالهاش عجلة و كأنى كنت بفحت فى الرملة,, اتخرجت من كليه الاقتصاد و العلوم السياسية و ومعايا درجتين بكالوريوس , و بتكلم تلات لغات بطلاقة" الفرنسية , الانجليزيه و اليابانية" اه والله يابانى , بس للأسف لابسة ايشارب و الله بس ايشارب و كمان فيا عيب تانى , متجوزة و عندى عيلين و العيب الأسوأ ان عندى طموح و دى طبعا كارثة تانية... خلاص هفضل ست بيت و ابقوا افتكرووووونى!!!







وابقى افتكرها يا أوباما !!!!!!من عند خالد الصاوى!!!!!!

وابقى افتكرها يا أوباما !!!!!!
أسوان بتنده ع المنياوالندهة واصلة لآخر الكون.
وبيرقصوله قوي ف كينيا مستبشرين بسمار اللون.
حاسيينه حيداوي المطحون.
وتبقى بَرْداً وسلاما
الناس أهِه.. حابّاك بجنون.
وعشمانين خير يا أوباما------
--بيقولوا: "صح ديمقراطي وواد جدع صاحب صاحبه.
بيحب عمرو دياب وشيرين .
ولو تعاشره حتحبه واكمنه راضي عليه ربّه.
خلصنا من بوش الواطي الناس أهِه.. حابّاك بجنون وعشمانين فيك يا أوباما-------
--قعدت شارد ومسهّم تقول يا واد ولا تخبي؟؟
ساكت وسري المتلجم بيفط من عيني وغلبي لا تقوللي أسمر ولا أبيض.
ده لو ملاك بجناح أبيض وحلّ في البيت الأبيض لازم حيكشفلك نابُه .
ومهما حط احمر وابيض في الجد.. راح يقفل­­ بابه ويسوق عليك كل كلابه ويحرمك من أسلابه ويهَمَّلك برضه جنابه..
لا حيلتك اسود.. ولا أبيض وان طيروا ألف يمامة وان فرقعوا مليون بمبة.
وان فرقعوا مليون بمبة
والله لناخد فيك بمبة وابقى افتكرها يا أوباما

يا جماعة كرهت السياسة و كرهت الفن.... ايوه كرهت الاتنين ,, بيخلوك تحلم و توصل لأعلى سما.... فوق , فوق , فوق....
و فجأة تلاقى نفسك تحت ... يقولوا بنتجمل , يقولوا بنتمكيج!!!! تجميل ايه و مكياج ايه؟؟؟ اخلاق ايه , مثل ايه و بالذات السياسة ,, اه و اه من السياسة , و الكلام ده من واحدة متخرجة من الكليه اليتيمة" الاقتصاد و العلوم السياسية", لو عملنا احصائية شفنا كده كام واحد اتخرج من السياسة و اشتغل بها ..... قله قله... و ذوى مواهب خااااصة جدا....
سبت السياسة لناسها المتفصلين عليها و على اخلاقها.... و دخلت المطبخ.... لو عندى شحنه غضب .... هقولكم سرى و امرى لله ... بطلعه فى شويه دقيق و ميه و خميرة و لما يطلع الانتاج من الفرن ... الاقيه بيضحك لى و يقولى " ايوه يا شهيرة ,, من جد وجد ,, تعبت معايا و طلعت لك احلى عيش ,, احلى ثمرة لأحلى شغل" 10 سنين و انا و الدقيق و المطبخ و المذهل انى انا ست البيت صاحبة الهوايه اصبح لى و الحمد لله شعبية بين اهل الهوايه و كأن شغل ايدى بيقولى " من جد وجد" و بيأكد عليا ,, و كل ده و انا ما طلعتش من بيتنا,,, ما دفعتش تمن اخلاقى علشان ابقى ,, ابقى على الاقل راضية عن نفسى.....
عارفين خالد الصاوى , الفنان ,, بحبه والله , بحس فى عينيه معاناة ,, حاسة فيها بواحد شايل هم , بس اللى كان بالنسبة لى اكتشاف هو انه كمان بيفرج عن همه و بيحكى و بيكتب , خالد , اكتشفت انه شخصية ظريفة ,, عنده بلوج و كمان اصحاااب كتير من Bloggers , و لما زرت مدونته لقيته كاتب كلام جميل و رغم ان بلوجى اكل و طبخ و خبز مع شويه اسقاطات الا انى حبيت احط شعره او نثره او سموه زى ما انتوا عايزين ,, كلامه جميل بيعبر عن لسان حالى ,, بس خالد ... يا رب اوباما يكبسنا احنا الاتنين و يبقى اول خروج عن القاعدة ,, و تدمع عينينا لما نشوفه فى اول زيارة ليه فى المنطقة و نستناه بالورد على باب المطار و اول ما نشوفه نهتف و نقول"yes, we can"
فيلم حلو و لا حلم حلو؟؟؟؟مش كده !!!!
خالد بحبك بس بكره السياسة و الافلام و كمان الاحلام!!!!
جماعة , مدونة خالد عنوانها اهه.....
زوروها فهى حقا حلوة تستحق الزيارة.......





عيش من القرع العسلى؟؟!؟؟!؟ اوعى وشك!!بوووووووم!!!!!

ايه الأخبار ؟ عاملين ايه ؟ وحشتكوا و لا زهقانين منى !!!!
ماشى نخش فى الموضوع.....اليوم هحكى ليكم قصتى مع الخميرة ,,
-بينى و بين الخميرة غرام و حكايات من 15 سنة من يومى و انا فى مطبخ امى اعجن و ابوظ و اجرب تانى لحد ما انجح و طبعا كله على دماغ بابا و ماما و الشغالة "و هنا احب اقولكم ان احنا كان عندنا شغاله -كان-.
بينى و بين الخميرة عشرة طويلة و احترام متبادل ,, هتقولوا عليا مجنونة ؟؟؟ ماشى انا مبسوطة ,, حكايتنا زى اسطورة The beauty & the beast بس احنا لينا اسم تانى و هو The beauty & the yeastشايفاكوا بتضحكوا !!! ماشى !!المهم يعنى بكلمها و بتكلمنى و قد ما بديها بتدينى ,, فيه علاقة فى الدنيا احلى من كده؟؟؟؟
يالا نخش على المفيد.أنا جهزت القرع العسلى ,قطعته و شويته فى الفرن و صفيته كويس علشان ينزل الميه اللى فيه , و بعدين عملت بوريه من القرع علشان استخدمه فى الوصفة دى !!!!
الوصفة دى سهلة جدا و نتايجها مش معقولة و مقاديرها بسيطة للغاية :-
يالا بينا-قطعة خميرة فى حجم عين الجمل او ما يوازيها بالخميرة البودرة " لا استخدمها نهائيا علشان بكرهها".
- ربع كوب ماء من الماء الناتج عن تصفية القرع.
- م. ص سكر.- م. ملح
-4 الى 4 و نص كوب دقيق مخبوزات منخول
- كوب من بيوريه القرع " اليقطين" .
-من ربع الى نص كوب من ماء القرع او ماء عادى .-بيضة مخفوقة.
- قلب لب القرع .

يالاااااا على الطريقة:-و دى مرحلة" تربية الخميرة"و ده تعبير امى و جدتى !! , ايوه بنربيها بنأكلها سكر و نشربها ميه و ندلكها و نغطيها زى ما هتشوفوا,









و ده علشان تنام و تكبر و تعطينى احلى خبز.اكلت السكر و مبسوطة و دلوقتى هتنام!!!!!شششششش نايييمة!!!بعد 5 دقائق !!! ما شاء الله !!

كبرت و بقت عروسة.











فى هذه الأثناء , حضرت اناء العجن و حطيت فيه الدقيق و الملح و اليقطين و ايه تانى الميه ,, فى حاجة تانية ؟؟؟ لأ لألأ كله تمام .









و نبدأ نعجن و بعدين نلت العجين 10 دقائق يعنى نخدمه كويس.و نلتها حتى نحصل على عجينة ملساء زى بشرة البيبى .











هنا دهنتها بشوية زيت خفيف علشان ما تلزقش فى طبق العجين.













و هغطيها!!!!ششششششش !!! نايمة.















"ما شاء الله عليكى يا حلوة , كبرتى يا قمرة و نورتى .










نيجى للتشكيل .....دهنت صينية sponge cake بشوية زبدة على الخفيف و رشيت شوية دقيق درة أصفر, و حضرت لعيشى أحلى سرير.














حطيت العجينة , بس مش كلها , احتفظت بجزء صغير فى حجم كرة الجولف و دهنت الجزء ده .واضحة الصور يا بنات و يا ولاد؟؟

و عملت عقدة!!!!!! يا ساتر يا رب !!!

















و دهنتها كمان بالبيض و رشيت عليها قلب البذر و سيبتها تخمر نصف ساعة .














كله يوعى وشه هتنفجر دلوقتى و أنا مش مسئوله عن النتائج!!





و ده شكلها قولوا بسم الله و جاهزة تدخل الفرن على درجة 200 .يا سيييدى ايه الجمال ده !!!بعد الخبز ...... كان ده شكلها,,,بسم الله و ده شكل تانى:-و خلااااص كل خبزة و انتوا طيبين , يالا قولولى تسلم ايدك يا شوشوالعيش جميييييل اوى و هش بشكل رهيب.يالا عليكم انتوا بقه الأجبان و المشروبات , كفاية عليا انا كده.سلااام و أشوفكم فى حكاية جديدة بكرة مع القرع العسلى








ممكن كمان تعجبك المواضيع دى...يالا بينا ...

Related Posts with Thumbnails