السبت، 22 نوفمبر، 2008

ايه حكايه شهيرة الخبيرة دى؟؟؟؟؟

انا يا جماعة شهيرة الخبيرة و الخبيرة دى والله مش انا اللى اطلقتها على نفسى ,, يعنى مش فذلكة و غرور و العياذ بالله ,, انا كنت اتقدمت لمسابقة ستار شيف العرب على قناة فتافيت و تم اختيارى ضمن التوب 22 مش دى القضية ,القضية هى ان المذيعة الله يعزها كانت بتقول عليا و تعلق و تأكد :"شهيرة الخبيرة " و من ساعتها و عيالى بيزفونى " شهيرة الخبيرة , شهيرة الخبيرة " و لزق اللقب يا جدعان.انا ست بيييييت مصرية و بركز اوى على ست بيت دى , لأنى اعلن الان و على الملأ انى قررت ابقى ست بيت و اتكلم بلسان حال ست البيت و ادافع كمان عن حقوق ست البيت , و ست البيت اللى بكلم عنها مش الهانم اللى بتروح للكوافير كل يوم و شغلها الشاغل ضافرها اللى اتقطم ,,لا انا بتكلم عن ست البيت اللى انضربت بالرصاص!!!!انا و خلال كل الفترة اللى فاتت و هى تقريبا 10 سنين , بحاول و بحاول , كان هدفى انى اساهم فى دفع عجلة التنمية , بس للأسف طلعت التنمية مالهاش عجلة و كأنى كنت بفحت فى الرملة,, اتخرجت من كليه الاقتصاد و العلوم السياسية و ومعايا درجتين بكالوريوس , و بتكلم تلات لغات بطلاقة" الفرنسية , الانجليزيه و اليابانية" اه والله يابانى , بس للأسف لابسة ايشارب و الله بس ايشارب و كمان فيا عيب تانى , متجوزة و عندى عيلين و العيب الأسوأ ان عندى طموح و دى طبعا كارثة تانية... خلاص هفضل ست بيت و ابقوا افتكرووووونى!!!







هناك 4 تعليقات:

انا يقول...

اول حاجة عجبتنى وصفة الكيكة جدا

تانى حاجة عايزة نصاااااااايح لكيفية التعامل المستقبلى مع الحقيقة الى بتقول ان هينتهى امرى ست بيت
لان للاسف الطموح والتفوق والدراسة واللغات مش كافيين عشان بنت تحقق احلامها فى وطننا العربى المبارك

توتا وميرو يقول...

بجد المدونه بتاعتك يا شوشو جميله جدا

وشكلها رقيق عاجبني ماشاء الله

منتظراك دائما بجديدك

وفي تقدم دائما يااااارب

والطموح مطلووب مادام لا يطغي علي اسلوب حياتك

توتا من منتدي لك ..،،،،

finereem يقول...

السلام عليكم يا شهيرة يا خبيرة :)

مش قادرة افهم ايه مشكلة الإيشارب؟ هههه
قصدك انه منعك من الشغل؟
طيب انا لابسة نقاب و لم يمنعنى من الشغل
ممكن تقولى فى ضوابط و لكن ليس موانع

انا مهندسة ديكور اسكندرانية و مهتمة جدا بالمطبخ لأنه فى رأى الخاص أحد الفنون

تحياتى و تسلم ايديكى ..بلوج اوريجنال خالص

شهيره يقول...

ميرسى يا بنات..الله يخليكم و لريم...عايزة اقولك ان مفيش ضوبط خااالص
و ان اللى واجهته معوقااات

ممكن كمان تعجبك المواضيع دى...يالا بينا ...

Related Posts with Thumbnails