ياسين عجبه توستر ديزنى!!! ايوه توستر لما تحط فيه شريحة التوست تطلع لك مطبوع عليها رسمة شكل ميكى ماوس!!!!
نقدر نقول انه استطاع ان يثبت لى ان ابن الوز عوام!!!!
ليله عيد ميلاده أخبرنى برغبته بالأحتفال بعيده بين اصحابه فى المدرسة,, يعنى التحدى كان تحضير 55 واحدة كاب كيك" و هقولكم ليه اخترت الكاب كيك", بالاضافة الى تحضير صنف حادق محبب للاطفال و هو طبعا البيتزا!
ده غير ان كان لازم انى اعمل تورته الاحتفال الخاصة بالبيت.
طيب يعنى الدنيا اتقلبت فوق دماغى و عندى بقه شغل فظيع!!! طبعا اتوترت و كنت بتخانق مع دبان وشى و ده حتى الانتهاء من المهمة. اللى نرفزنى اكتر هو انى كنت بشتغل بالفوندان و عجينة اللوز , المفروض ان مفيش مشكله فى كده , بس الفوندان كان بيسيح بسرعة و كانت السيطرة عليه غايه فى الصعوبه, بس الحمد لله خلصت المهمة و رحت المدرسة و انبسطوا الولاد و المدرسين و المهم و قبل كل شئ انبسط ياسين , بس عارفين رد فعله كان ايه لما شافنى انا و باباه داخلين عليه الفصل؟؟؟؟ بكى ؟؟!!؟!؟ تصورورا و الله بكى , و كأنه كان بيبكى من الفرحة او المفاجأة مش عارفة, يالا ادعوا لى ربنا يهديه هو و اخته و يخليهم و يبارك فيهم يا رب.
و يا
لا على الصور!!!!
لا على الصور!!!!
ياسين و هو محرج فى الفصل!!! ليه معرفش؟؟؟؟؟و الصورة كمان لأصحابه الحلوين و المؤدبين!!!!
هناك 5 تعليقات:
كل سنة وياسين بالف خير يااحلى شهيرة وعقبال مية سنة يارب
ياستي ايه الجمال ده كله روعة التورتة وروعة كل حاجاتك بس ياريت تحطي كل الوصفات اللي في البلوج الانجليزي هنا كمان عشان يعني نستفيد من غير ترجمة ههههههه
هو سؤال ياقمر:
التغطية دي على التورتة كانت بعجينة اللوز ولا الفوندان؟وازاي بتلمع كده وممكن المقادير..انابعمل عجينة الفوندان اللي ببياض البيض والسكر بتبقى طعمها غريب وكمان ناشفة خالص طيب ايه السبب بقى
مستنة ردك ياجميل
عرفتيني......
ام يمنى وهاجر من منتدى لك
اهلا بيكى و نورتى البيت يا جميلة: بصى يا ستى التغطيه البيضاء كانت فوندان و الورد و النحل من المارزبان او عجينة اللوز, و و بتلمع علشان هو ده من خصائصها
كمان الفوندان جاهز بس البيتى بيبقى احلى هبقى اعمل طريقته و انزلها, ايه تانى
اه بخصوص الوصفات انا والله هركز اكتر بعد الكورس , عندى كورس اليومين دول و باقى محاضرة و يخلص, و هركز و هنزل وصفات و كمان 2 فيديو , واحد ميلفاى, واحد كرواسون , تابعى البلوج علشان تكونى اول المتفرجين و المطبقين ان شاء الله.
ميرسى يا قمر و منورة البلوج, و هزعل منك لو ما جيتيش على طول.بوسة كبيرة منى ليكى!!
حبيبتي شهيرة مرسي اوي ياقمر على ردك السريع
ربنايوفقك يارب في كورساتك ويبارك فيكي لانك بتفيدينافعلا يااحلى شهيرة
ودمك اللي زي الشربات ده والله
مستنية وصفاتك الجديدة على احر من الجمر وانا اصلا متابعاكي من زمان هنا وفي المنتدى
بالنسبة للعجينة بقى ياريت فعلا تنزليها لاني بعملها بس بتكون بتلمع بس في البداية وبعد ماتنشف تبقى زي الطوب ناشفة خالص وكمان طعمها لاذع
ان شاء الله متباعاكي على طول
كل سنه وانت طيب يا سنسن يا سنسن يا قمر
عيد ميلاد سعيد وعقبال مية سنه
التورته عجبتنى اوى والكب كيك يجنن وطبعا البيتزا مفيش كلام عليها
تسلم ايدك يا شوشو
;'lkjhgfdsaSDRFGH
إرسال تعليق