الأحد، 12 سبتمبر، 2010

باستا فلورا بالاسكندرانى !!


باستا فلورا اختراع سكندرى مستوحى و محرف من الاختراع الايطالى الاصل "pasta frolla و بالدراسه و البحث و التقصى رغم ان اختكم نص نص فى الايطالى لقيت ان الباستا فرولا هى نفسها عجينه الشورت بريد او التارت بالايطالى طيب ايه حكايه الباستا فلورا الاسكندرانى دى و اللى لا هى كيكه و لا هى تارت.....يعنى حاجه وسط بين الاتنين..الاسكندرانيه الافذاذ لما نقلوها من طنط ماريا الايطاليه غيروا مكان الحرف من باستا فرولا الى باستا فلورا... لا كمان تخنوا الكراست لدرجه تجعله ينتقل من مجرد انه تارت او كراست لتارت الى انه يكون شئ اشبه بين الكيك و كمان التارت...طيب خدوا المقادير دى و جربوا و افردوا العجينه رفيع..هتحصلوا على عجينه تارت....طيب افردوا تخين اوى هتطلع المخلوق السكندرى اللى اسمه باستا فلورا..بحثى وراها كان لسبب وجيه انى حبيتها و حبيتها اوى و اعتقد مش انا لوحدى دليل طلبات الناس ليا دايما انى انزل طريقتها....
المقادير
2 كوب دقيق
2 بيضه
نص كوب سمن او زبد
من نص الى تلات ارباع كوب سكر بودره
2 م.ص بيكنج باودر
فانيليا
نضرب السمن او الزبد مع السكر حتى يصير كريمى القوام..يضاف البيض بيضه بيضه بالتناوب مع الفانيليا او بشر الليمون او البرتقال او القرفه حسب نوع المربى اللى حابه تضيفيها
كونى مبدعه حيث لم ينزل فى الكتب السماويه اننا نعملها بمربى مشمش او حتى فراوله..ممكن توت ..ممكن تفاح ممكن برتقال و جزر و ممكن كمان بلح انتى او انت و دماغك العاليه و نكهه العجينه كمان مخمخ لها.
هنضيف الدقيق المخلوط و المنخول مع البيكنج باودر. و نخلط هنلاقى عجينه دبقه ممكن نشكلها بايدينا....نحط تلتين العجينه فى صينيه و نفرشها بايدينا و ننزل عليها المربى و نحط تلت العجينه الباقى فى قمع و نعمل الاشكال اللى حابينها ممكن تتخنى العجينه باضافة المزيد من الدقيق لها و تتلجيها و تبشريها على الوش..يعنى افكار كتير و انتى برضه و دماغك العاليه.
تخبز فى فرن متوسط الحراره 180 حتى تاخد لون دهبى متميز.
بس خلاص "أسوة بالمعلم شعبولا"
و كل سنه و انتم طيبين يا كتاكيت.
أرجو منكم ترك تعليق علشان احس انى مش بهاتى لوحدى...مجنونه يعنى و علشان اقدر اقدر مين اللى بيقرا و يستفيد .
أرجو منكم الدعاء لى كمان بالشفاء العاجل علشان صحتى فسكانه اليومين دول و وعد منى انى لما هخف هفترى...ههههه
اشوفكم على خير قريبا ان شاء الله.
شهيره داود

هناك 8 تعليقات:

Rosa's Yummy Yums يقول...

Une superbe tarte!

Bises et bon début de semaine,

Rosa

Chahira Daoud يقول...

Merci Ma rosa...vous etes la bienvenue dans mon blog arabe
Bisous
Chahira

غير معرف يقول...

ما شاء الله شغل مميز وذوق عال
امنياتي لك بالشفاء وراحة البال

غير معرف يقول...

تصدقى بالله انى انهاردة ناوية اعملها ومطلعة المكونات برة علشان تكون بحرارة الغرفة
وبحثت وبحثت وبحثت وكاتبة الطريقة بس لما شفت صورتها عندك قلت اكيد انتى هتجيبى الخلاصة وبالصدفة انهاردة قلت اعمل سيرش كدة يمكن تكونى نزلتى طريقتها وقد كان تسلمى يا قمر يا قمر والف سلامة عليكى

Chahira Daoud يقول...

اهلا بيكم و شكرا ليكم جدا على التفاعل..دايما منورين البلوج

jojo يقول...

انا عملتها يا قمر روووووووووووعة بس انتى عملتيها بمربى ايه انا عملتها بالمانجو واااااااو
بس التانية دى اللى فى الصورة تارت ؟

انا اللى رديت وقلت انى كنت هعملها انهاردة

heba يقول...

انا عملتها وحطيت تفاح مبشور مع قرفة على مربى التفاح وكانت تحفة
عل فكرة اسلوبك يجنن فكرتينى بمصر واهل مصر
الف سلامة وشكرا ليكى
ممكن تقولى لى طريقة عمل الجبن الابيض من اللبن المبستر
باي يا قمررررررر

غير معرف يقول...

جزاكى الله كل خير و شفاكى و عفاكى انا نفذت البستا فلورا و طلعت اكتر من رائعة ,,,انا عملتها كتيرررر قبل كدة دايما تكو فيها غلطة ناشفة او وحشة ،،،بس طرقتك طلعت جميلة جدا شكرا للامانة فى المقادير و للمشاركة بافكارك الجميلة

ممكن كمان تعجبك المواضيع دى...يالا بينا ...

Related Posts with Thumbnails