الخميس، 25 ديسمبر 2008

Red Velvet Cake






أو الكيك الاحمر المخملى .. لسه مخلصاها ... و الكيك ده بلده امريكا أو الولايات المتحدة الامريكية .. و تحديدا جنوب الولايات ... طبق حلو خاص جدا بالجنوب و ليه حكايه هحكى لكم عليها بكره لما ارتاح...



سلام مؤقت.....
تانى يوم!!!
طيب يا ولاد ,, ارتحت خلاص و خدت نفسى .. ما اعتقدش بس برضه الوصفة اهه علشان اللى يحب يعملها اول حاجة نحضر المقادير:-
2و نص كوب دقيق
1 و نص كوب سكر
1 م.ص بيكنج صودا
1م.ص كاكاو
1 و نص كوب زيت نباتى
1 كوب لبن رايب
2 بيضة كبيرة
2 ملعقة كبيرة ملون طعام احمر سائل
1 ملعقة صغيرة خل
نص ملعقة صغيرة فانيليا
و للحشو و التزيين :- كريمة الجبنه و مقاديرها 100 جرام زبدة .. حوالى 2 كوب كريم شانتى و 200 جرام جبنة كريمة و سكر حسب الرغبه.
طيب قبل ما نبدأ فى التنفيذ نسخن الفرن على درجة حرارة 180
و نبدأ الشغل , نحضر اناءين واحد للمواد الجافة و واحد للمواد السائلة و الجافة ننخلها و السائلة نضربها على خفيف و بعدين نخلط المزيجين معا و نصبهم فى قالب كيك مقاس 20 او 22 و يدخلوا الفرن و بعد 30 دقيقة هيطلع لنا احلى كيك.
و بالنسبة للكريمة تخفق كل المقادير السابقة مع بعضها بالمضرب الكهربائى و لازم تكون كلها فى درجة حرارة الغرفة.
و نبدأ نقطع الكيك نصين ده طبعا بعد ما يبرد تماما و بعدين نحشى بالكريمة و نزين بيها كمان من الخارج و كل واحد طبعا و ذوقه..
طيب انا استخدمت فى التزيين شويه Pecan nuts و ده نوع مكسرات امريكى من فصيلة عين الجمل و طعمه كتييير متقارب ..كمان الكاكاو اللى يستخدم انصح انه يكون من النوع الفاتح حتى لا يتأثر لون الكيك الاحمر .. كذلك يفضل انتقاء ارقى انواع الالوان الطبيعية لضمان الحصول على لون احمر جميل...بس كده!!!
طيب ايه حكايه الكيك ده .. الكيك ده من تراث المطبخ فى جنوب الولايات المتحدة الامريكية و يقال ان العبيد الزنوج فى الجنوب هم اول من ابتكروه و كانوا يعدوا هذا الصنف فى المناسبات و الولائم اللى كان يقيمها اسيادهم البيض!!!
اياااااااااااام زمااااااااااان ... أيام فاتت! الله ما يرجعها!!!
يالا حماس عايزة اشوف حد يقول هطبق الوصفة!!!

هناك 3 تعليقات:

غير معرف يقول...

ماشاء الله يا شوشو تحفه بجد
عجبتنى جدااااااااااا
تسلم ايدك على الجمال ده

غير معرف يقول...

نسيت أسألك هى مفيهاش باكينج باودر؟؟

Unknown يقول...

حلوة ناويها اطبقها
بس عندي سؤالين
الاول صح مافيهاش بيكنج باودر ؟؟
التاني الكريم شانتي اللى تقصديه بودره او سائل؟
ارجو الرد وشكرااا

ممكن كمان تعجبك المواضيع دى...يالا بينا ...

Related Posts with Thumbnails