الجمعة، 3 يوليو، 2009

تحدى يونيو لوليمه...يالا بينا !!

تحدى الشهر ده قصدى اللى كان ده ...متأخره يومين بقه و مش طايقه نفسى..يالا سماح النوبه.
تحدى الشهر كان عن البحرين..و طبعا احنا احتفالنا بيبقى بطبق...طبق المره دى كان سمك..هو فى الحقيقه كان فيه اختيارين..طبق سمك و طبق تانى اسمه خبيصه..الصراحه و رغم جرأتى فى خوض تجارب مطبخيه جديده الا انى مش عايزة اعمل الخبيصه و لو فى حد يقدر يقنعنى بالعكس فليبدأ بالمحاوله و انا اسيب له نفسى خاااالص ....هههه ...خبيصه يا جماعه ..دى مش اى حاجه ...
المهم عملت طبق السمك و كان حلو بس اللى غاظنى فيه و اللى بيغيظنى فى اى مطبخ هندى او ايرانى هو احتقارهم للملح و الفلفل ..معرفش ليه..يعنى يولعوا الدنيا ب ييجى خمسين نوع تابل و ييجوا عند الملح و الفلفل ..لا طب بلاش الفلفل ..الملح يا جماااعه ؟؟ فين الملح؟؟؟
المهم الطبق المره دى طبقى يعنى طبقى و انا حرة فيه ..طبقى أغسله و أكويه..فطبعا حطيت ملح و لزوم الانحراف كمان حطيت فلفل ..بس ابيض علشان ماحدش يا خد باله...ششششش ..سر ..ماشى؟؟
من الكلام كده و الخلاصه عايزة اقول ان المطبخ البحرينى و بحكم موقعه متأثر كتيير بالمطبخ الهندى و الفارسى و مطبخ منطقة الخليج العربى ببهاراته و توابله المشهورة !!

وصفة السمك...
المقادير:-
1 م.ص من الكركم
2 م.ك زيت نباتى
1كيلو سمك فيليه..انا اخترت سمك لوت من ولاد عم الوقار كده
2 وحدة فلفل اخضر حار او ممكن حلو زى ما تحبه
1 م.ك من الجنزبيل الطازج
4 فصوص توم
2 حبه بصل
2 حبة طماطم
1و نص م.ص مسطرده
مرقه سمك او ماء فقط حوالى 2 كوب

الطريقه:-
نخلط الكركم مع الزيت و نتبل بيه السمك طبعا فى هذه اللحظه الحاسمه اضفت الملح و الفلفل فى الخباثة و من غير ما حد يشوفنى من الاخوة اهل البحرين..ههه
حطيتهم فى طاجن و دخلته الفرن على حراره عاليه علشان يتحمر و فى هذه الاثناء..ضربت باقى المكونات فى الخلاط.. و فى طاسه و بملعقه زيت كثفتهم لحد ما بقوا زى الصوص التقيل شويه ..حطيتهم على السمك و سيبته يكمل سوى, بس خلاص...قدمت الاكله مع الرز البسمتى بالشبت و السلطه الخضراء كمان .


و بالهنا و الشفا... جربوها و لن تندموا .
استنونى الشهر ده ..التحدى هيبقى من المطبخ المصرى.. و هنولع فى البلوجات بتاعة وليمه كلها باذن الله ......هههههه
يا ترى عندكم اقتراحات ايه؟؟؟؟؟
نديها كشرى و الا ممبار و الا كوارع و الا محشى و الا فته و الا مسقعه و الا بصاره
دبرنى يا وزييييير !!!!
أشوفكم على خير ان شاء الله مع يوم مصر الشهر القادم .

هناك 3 تعليقات:

Arlette يقول...

OMG.... Can I come for dinner..
Bishahi Ya Madame,,,, Jidan Jidan Jidan....
I am with you my dear, Food without Salt is like life without a heart.
Sahtein Ya Chahira... I am glad you did use salt and Pepper... and enjoyed another good recipe....
We are waiting for your surprise !!!!!!!!!!!!!!!!!!!!!!!!!

غير معرف يقول...

تسلم ايديك يا مدام شهيرة
سهل ممتنع وسريع وبسيط ومع الملح والفلفل
مش هاوصيكى على الاكلة المصرية
عاوزين كوارع وفتتها يا ريس
الوزير
منذر

ام رقيه يقول...

تسلموا اديكى يا رب على الاكلات الحلوه دى
انا بعت ليكى ايميل على الايميل اللى حضرتك حطاه على البلوج
ممكن تقريه وتردى عليا علشان على اساسه ارتب حالى
شكرا ليكى كتير وربنا يكرمك يارب

ممكن كمان تعجبك المواضيع دى...يالا بينا ...

Related Posts with Thumbnails