تحدى يونيو لوليمه...يالا بينا !!

تحدى الشهر ده قصدى اللى كان ده ...متأخره يومين بقه و مش طايقه نفسى..يالا سماح النوبه.

تحدى الشهر كان عن البحرين..و طبعا احنا احتفالنا بيبقى بطبق...طبق المره دى كان سمك..هو فى الحقيقه كان فيه اختيارين..طبق سمك و طبق تانى اسمه خبيصه..الصراحه و رغم جرأتى فى خوض تجارب مطبخيه جديده الا انى مش عايزة اعمل الخبيصه و لو فى حد يقدر يقنعنى بالعكس فليبدأ بالمحاوله و انا اسيب له نفسى خاااالص ....هههه ...خبيصه يا جماعه ..دى مش اى حاجه ...

المهم عملت طبق السمك و كان حلو بس اللى غاظنى فيه و اللى بيغيظنى فى اى مطبخ هندى او ايرانى هو احتقارهم للملح و الفلفل ..معرفش ليه..يعنى يولعوا الدنيا ب ييجى خمسين نوع تابل و ييجوا عند الملح و الفلفل ..لا طب بلاش الفلفل ..الملح يا جماااعه ؟؟ فين الملح؟؟؟

المهم الطبق المره دى طبقى يعنى طبقى و انا حرة فيه ..طبقى أغسله و أكويه..فطبعا حطيت ملح و لزوم الانحراف كمان حطيت فلفل ..بس ابيض علشان ماحدش يا خد باله...ششششش ..سر ..ماشى؟؟

من الكلام كده و الخلاصه عايزة اقول ان المطبخ البحرينى و بحكم موقعه متأثر كتيير بالمطبخ الهندى و الفارسى و مطبخ منطقة الخليج العربى ببهاراته و توابله المشهورة !!

وصفة السمك...

المقادير:-

1 م.ص من الكركم

2 م.ك زيت نباتى

1كيلو سمك فيليه..انا اخترت سمك لوت من ولاد عم الوقار كده

2 وحدة فلفل اخضر حار او ممكن حلو زى ما تحبه

1 م.ك من الجنزبيل الطازج

4 فصوص توم

2 حبه بصل

2 حبة طماطم

1و نص م.ص مسطرده

مرقه سمك او ماء فقط حوالى 2 كوب

الطريقه:-

نخلط الكركم مع الزيت و نتبل بيه السمك طبعا فى هذه اللحظه الحاسمه اضفت الملح و الفلفل فى الخباثة و من غير ما حد يشوفنى من الاخوة اهل البحرين..ههه

حطيتهم فى طاجن و دخلته الفرن على حراره عاليه علشان يتحمر و فى هذه الاثناء..ضربت باقى المكونات فى الخلاط.. و فى طاسه و بملعقه زيت كثفتهم لحد ما بقوا زى الصوص التقيل شويه ..حطيتهم على السمك و سيبته يكمل سوى, بس خلاص...قدمت الاكله مع الرز البسمتى بالشبت و السلطه الخضراء كمان .

و بالهنا و الشفا... جربوها و لن تندموا .

استنونى الشهر ده ..التحدى هيبقى من المطبخ المصرى.. و هنولع فى البلوجات بتاعة وليمه كلها باذن الله ......هههههه

يا ترى عندكم اقتراحات ايه؟؟؟؟؟

نديها كشرى و الا ممبار و الا كوارع و الا محشى و الا فته و الا مسقعه و الا بصاره

دبرنى يا وزييييير !!!!

أشوفكم على خير ان شاء الله مع يوم مصر الشهر القادم .