يالا على لانشون الفراخ!!!

اللانشون اللى بنشتريه من السوق تقريبا مافيهوش لحمه سواء كانت فراخ او لحم بقرى..ده فيه هبااااااااااابه..على رأى مش عارفه مين..يعنى لحسة لحمه و الباقى خدااااع بصر و خداع لحاسة تذوق المستهلك المسكين....انا توصلت لطريقه لعمل شبيه للانشون الفراخ....هيعجبكم ..جربوه و ولادكم هيحبوه جدا..كمان العجيب انه لانشون فراخ و كمان معمول بالفراخ...ههههه
يالا على المقادير يا كتاكيت
نص كيلو صدور فراخ بصله كبيرة بيضه كبيرة كوب بقسماط 2 ملعقه كريمه لبانى توابل..قرفه ,قرنفل ,جنزبيل.فلفل ابيض.جوزة الطيب..و طبعا ملحطيب فيكى تنوعى ممكن ,اعشااب ..ممكن بابريكا ممكن مستطردة..حسب النكهه اللى بتحبيها ..اخترعى يا ستى نكهه خاصه بيكى و سجلى ليها براءة اختراع..ما المصانع كل يوم بتتحفنا بس الفرق انك لما تحطى اعشاب هتحطى اعشاب مش "طعم اعشاب مضاهى للطبيعه"...هكذا يكتبون على منتجاتهم و المستهلك الغلبان مش فاضى يقرأ ..بياكل و خلاص.طيب افرمى لحم الدجاج كويس و ضيفى عليه البصل و كله فى المفرمه و اديها و ابدئى ضيفى باقى المقادير لحد ما تتشكل عندك العجينه.شيليها من المفرمه..او الفوود بروسيسور.و انا هنا خلطت عليه شويه زيتون اسود...مفصص طبعا ماحدش يحطه ببذره...ههههههنشكل اسطوانه و نقفل عليها كويس بالفويل.نغلى حله ميه و نحط فيها مكعب مرقه بس للتنكيه مش اكتر و ننزل فيها القالب بتاعنا... و نتركه يستوى.بعد تلت ساعه او نص كل حاجه هتكون تمام.طيب ..بعد ما خلص سيبته يبرد كويس و قشرت الورقه من عليه...و حبيت اديله نكهه مدخنه....و ده علشان اقوم بالواجب معاكم رغم ان الطبيب محذرنى لأنى يا حلوين مريضه بالربو و الحساسيه..يعنى اى صنف حساسيه تلاقوه عندى.. و الدكاتره بيقولولى :انتى كل المنهج اللى خدناه فى الكليه...هههه يالا بلاش رغى...المهم حضرت عده التدخين...فى صينيه اى صينيه...افرشى فويل و حطى عليه..شويه شاى و سكر و قرفه خشب و ملعقه عسل اسود..و حطيت شبكه و حطيت عليها اسطوانه الانشون..و غطيتها بفويل و ولعت النارو عينكم ما تشوف الا النور هتشوفوا بث حى دلوقتى...عادى يا بنات ..بس لا انصح ضعاف القلوب و ضعاف الصدور بخوض تلك التجربه...طبعا اخد قالب اللانشون لون جميل و ريحه مدخنه حلوة... و بس خلاص ,,,شيليه فى التلاجه و قطعى و اعملى سندوتشات و ابقى ادعيلى و فهمى عيالك أو كل حبايبك اللى هيدوقوه ان ده هو اللانشون و ان اللى بيعمله المصنع "ضحك على الدقون"...ابقوا اسألوا عليا فقد اتعرض للاغتيال فى أى لحظه.....الحقووووووووووووووونى!!!!!يالا على الصور


يالا مين هيتطوع و يعمل السندوتشااااااااات...اه يااااانى....و أشوفكم المره اللى جايه يا حلوين...استنووووووونى و ما تمشووووش...بنات ان شاء الله ارد اكيد على اسئلتكم بخصوص الجبنه...بس اروح اخد البخاخه...ههههههه

ملحوظه هاااااامه....أرجو الحفاظ على حقوق الملكيه الفكريه....

التلاجه من غير بسطرمه مالهاش لازمه !!! صح و لا لا؟؟؟

طيب يا كتاكيت هنبدأ فى البسطرمه بس قبل ما ندخل عايزاكو برضه تطلعوا على موضوع ام مريم العراقيه بمنتدى لكى و اللى اتكلمت باستفاضه عن الجبنه ..موضوع فعلا قيم و لو افردنا للجبنه ملف خاص هنحتاج لمجهود كبيرفخلونا نحطه فى خطه العمل القادمه و نبدع و نطلع موتزاريلا و جبنه كريمى و و فيتا كمان...
يالا بسطرمه
Pastrami او بسطرمه نوع من انواع اللحم المقدد و تختلف طريقه تصنيعه بين الغرب و الشرقيعن البسطرمه على الطريقه الغربيه غير الطريقه الشرقيه اللى اتعودنا عليها و على ريحتها الحلوة .فى مصر ..وطنى و موطنى و همى الاكبر....بنموت فى البسطرمه و بنحب دايما ان تلاجتنا ما تفضاش منها...و الان و رغم اسعرها اللى اصبحت تطاول العناء بنروح برضه و نشترى حتى و لو تمن كيلو ..الكيلو يا حلوين وصل الى 87 جنيه...اه ياااانىو البسطرمه ليها طرق كتير للتقديم و بنحب ناكل البيتزا بيها و يا سلام على طاسه بيض بالبسطرمه ..الصبح أو بالليل ..كله حلو و رغم تعدد طرق طهيها الا انى لن اخفى عنكم سراااااااانا عندى حته بسطرمه محترمه و نيه من غير تجهيز او طهى فى رغيف عيش فينو مقرمش و سخن ..الفيلم ده بالنسبه لى قمه المراد..و مش عايزه اقولكم الادمان و بالذات و انا حامل و طبعا مش المفروض انى اكل اى حاجه نيه فكنت بحمرها و بنفرد بيها لوحدى.طيب بنعمل بيها ايه...بيض بالبسطرمه ..بيتزا و كمان عيش بالبسطرمه و اصناف ساليزونات لا اول لها من اخر.
طيب ندخل على الطريقه الشرقيه للبسطرمه
قطعه لحم من عرق التلبيانكو ""بتاع الروزبيف و اللحمه البارده" ووزنه طبعا بيكون لحد 3 كيلو انا عملت قطعه وزنها 2 كيلو .نص كيلو حلبه حصى4 رؤؤس ثوم.4 ملاعق كبيره بابريكا او فلفل بقالى ملح للغرض الذى سوف اذكره فقط الطريقه..اولا تغسل قطعه اللحم بس لا تغالى فى الغسل مجرد شطف..ضعى قطعه اللحم على شبكة و نشفيها بفوطه نظيفه ..انا استخدمت فانله قديمه من بتوع زوجى ههههههه اسرااااار عائليه نشفى قطعه اللحم جيدا و غطيها بقطعه قماش اخرى جافه..و بعد ساعه كده هاتى ملح كتيييير و ابدئى دلكى قطعه اللحم بها جيد و رشى ملح كويس على كل الجهات...غطيها بحته تل... و حطى عليها الهون او تقل اى تقل حتى و لو حله مليانه ميهسيبيها يوم...هتلاقيها بتنزل ميه لونها روز شويه صفيها ..المرحله دى تستغرق يومتانى يوم قومى بغسل العرق الفلتو.... و نشفيه كويس و غطيه و هو برضه على شبكه يوم كمان....ما تخافوش مش هتشموا اى روائح و لا العمليه دى فيها اى حاجه تقرف او تضايق...بعد مرور اليومهتاخدى الحلبه و تطحنيها ناعم او لو قدرتى تشترى الحلبه مطحونه يبقى اسهل لك...طيب الحلبه بودرة و عليها التوم الطحون او المدقوق ناعم جدا و عليهم البابريكا و بس مش مطلوب و لا ملح و لا شطه و لا اى اضافات تانيهو اعجنى المكونات بشويه ميه لحد ما تحسى ان المزيج ده تقدرى "تجبسى " بيه عرق اللحمه...هههههههكان نفسى ابقى دكتوره و فشلت... هههههههه..انا بهذر مش بقدر حتى اشوف الدم... ركيكه المشاعر.ماشى جبسوا اللحمه و تعالوا بعد التجبيس اعملوا خرم او فتحه فى اعلى العرق و دخلوا جواها دباره لو عندك ابره منجد تقدرى تعملى الشغلانه دى...و ده علشان نقدر نعلقها يا حلوين.طيب لا انصح ابدا بغسل اليدين بعد هذه المرحله ..روحى و بمنتهى الرقه حطى ايدك على انف زوجك و اللى نايم غلبان ان ما قام مذعور ما بقاش انا شهيره....ههههههههه...و يا سلام الجيران هيحسوا ان فيه بقال فتح فى العمارة او ان معمل بسطرمه برضه فتح تحت العماره..مالهاش حل يا نااااس ريحه حلوة انا بحبها..طيب هنعلق العرق جنب الشباك فى المطبخ و بعد اسبوع....اعزمى العيله و عيلة العيله و اختارى ضيف شرف يقص الشريط ههههههه و بألف هنا و شفا...يالا على الصور يا كتاكيت..



.تمت و كمان كام يوم لما تستوى هنقطع و نذوق و نفرق كمان على الحبايب ..ههههه...انا هنا استخدمت سمانه علشان مالقيتش عرق فلتو و كله ماشى بس انا بفضل العرق ...يالا اشوفكم على خير يا كتاكيت.

ليه نشترى بقاله لما ممكن نعملها فى البيت؟؟؟متجدد مع Chahira!!!

صديقاتى العزيزات .و أصدقائى الاعزاء.عاملين ايه؟؟؟؟عملنا عيش كتييييير ..تيجوا بقه نعمل ستندوتشات او حتى نغمس بيه..... البقاله بمفرداتها من الحاجات اللى بنصرف عليها كتير...يعنى ندخل و نطلع و احنا دافعين بالمئات...طب ليه ما نحاولش نعمل البقاله دى فى البيت.. و البقاله عاده بنفطر و نتعشى بيها...زى ايه؟؟؟جبنهفوللانشونمربىزبده فول سودانىكورن فليكسبسطرمهالخ الخ الخطيب هحاول فى الملف ده انى استعرض طرق ناجحه لبعض مفردات البقاله...حاجات لو عملتوها فى البيت مش هتتعبوا اوى و كمان هتحسوا الفرق فى الجودة من اول مره.هبدأ انهارده بالجبن الابيض على طريقتى....و الجبنه يا كتاكيت من الحاجات اللى لما تدرسيها تحتارى فى امرها...يعنى مكونات واحده تقريبا فى كل مره بس الفرق فى التكنيك و الخطوات هو اللى بيفرق انواع جبن لا اول لها من اخر و اللى سافر فرنسا بلد الجبن و شاف هذا القدر الهائل من التنوع و تمعن فى الامر هيلاقى انها كلها بتصب فى مكونات واحده لا تتغير..لبن و منفحه و ملح و دى مكونات اساسيهانا اليوم سوف اتعرض لاسهل طريقه جبنه..مافيهاش اختراعات...بس فيه تنبيه هام ....اعملى حسابك انك لو دقتى طعم الجبنه دى مش هيرضيكى اى جبنه تانيه بتشتريها من عند البقال...يالا بيناالمقادير1 كيلو لبن سايب من عند البقال او من الجاموسه او البقره مباشرة""ملحوظه هامه لبن الشتاء احلى من لبن الصيف و بينتج جبنه اكتر"تلت ملعقه منفحه سائله و ملعقه صغيره خلمكعب تلجملح حسب الرغبهقرن فلفل حامىالطريقهفى اناء معقم يسخن اللبن حتى درجه 40 يعنى فاتر تقدرى تتحملى حرارته لو وضعتى اصبعك فيهفى طبق خارجى اذيبى مكعب التلج فى تلت ملعقه المنفحهو نزليهم فى اللبن و قلبى كويس جدا و غطيه... و حطيه فى الفرن و معاه حله ميه سخنهو بعد ساعه كده افتحى و اضغطى عليه بايديك ..هتلاقيه لازم يكون تجمد.بالسكينه اقطعى فى عمق القالب و هو فى الاناء على شكل خطوط متقاطعه و سيبيه قد 5 دقايق هتلاحظى ظهور اثر لمياه.افرشى دانتيل او قطعه تل او قماش قطن مسامه واسعه الى حد ما فى مصفاه و صبى فيه مكعبات الجبن و لازم يكون طبعا فى اناء تحت حتى تتلقى السائلهذا السائل او الشرش ممكن تعملى بيه حاجات كتير...عملت بيه كيك و عملت بيه بشاميل كمان هنستخدمه لعمل محلول ملحى نخلل و نحفظ فيه الجبنه.السائل ده سائل غنى جدا بالعناصر الغذائيه فياريت محدش يرميه و يحاول يحطه فى اى اكل بيعمله ممكن كمان ندخله فى شوربه مع الكريماطيب بعد ساعتين كده هتتصفى كل المياه من الجبنه و الوقت بيتوقف على مدى مساميه قطعه القماش اللى استخدمناها...طبعا فى معدات تانيه خاصه زى "السده" و الحصر و الباقوطى...لما نتوسع افرجهم لكم.ناخد الجبنه و نحط عليها ملح و نسيبها فى التلاجه ليله من غير غطاءتانى يوم نغلى السائل مع شويه لبن و شويه ملح و قرن فلفل حامى مشقوق و نصب المزيج و هو ساخن على الجبنه و تحفظ بالتلاجه بعد ما تبرد.. و انصح بتناولها بعد 3 ايام حتى تتجانس كل النكهات و تكتسب من الفلفل طعمه الجميل...يالا بقه على الصور اللى هتشرح احسن منى....الصورة الاخيره بتوضح قالب الجبن اللى صنعته باستخدم قالب من الخوص و يعمل ايضا بمثابه مصفاه لتكوين الجبن و بيعطى زركشه جميله للقالباسمه الباقوطى و تعرفت عليه من خلال ام واحده جارتى من محافظه كفر الشيخ و بيستخدموه لصناعه جبن بيطلقوا عليه جبنه بخيره... و طبعا لو لفينا محافظات مصر كلها هنتعرف على ادوات مختلفه كانت بمثابه دهشه كبيره بالنسبه لى و ده بسبب التنوع العجيب و الاختلاف فى الادوات و الغريبه ان و لا محافظه عندها فكره عن اسلوب المحافظه الاخرى حتى و لو كانت جارة ليه ...امنيه حياتى الف مصر و بلادها كلها و استكشف طرق الخبز و العيش و ده لانى طول عمرى عايشه فى المدن الكبرى بلعناتها و رتابتها سواء كانت القاهره او الاسكندريه.يالا مين هيستضيفنى و ينظم لى رحله كلها تراث؟؟؟؟؟

عايزه تعملى مارشماللو فى البيت؟؟؟؟ يالا بينا !!

المارشماللو أو حلوى الخطمى...هههههه...حلوة الخطمى دى..ولادى بيسألونى علشان بيسمعوها فى أفلام الكارتون..أقوله هو المارشماللو يا مامى...ههههه

طريقته سهله بس..لازم يكون عندك ميكسر او عجانه عفيه علشان تقدر توصل لنتيجه مرضيه.

يالا على الطريقه و المقادير ...فى العجانه بنحط نص كوبايه ميه بارده مع 3 ملاعق كبار جيلاتين باودر.. و نسيبهم ساعه من الزمن.

و فى حله و على النار بنحط كوبايتين سكر و تلاته ارباع كوب من الكورن سيرب و نص كوبايه ميه و ربع ملعقه صغيره ملح و نسيبهم يغلوا لحد ما يوصلوا لدرجة حرارة 117 درجه مئويه..و هنا يتطلب ايضا انه يكون عندكم ترمومتر للسكر.و بسرعه و بخفه نصبه على الخليط اللى فى العجانه. و نشغل العجانه على اقصى سرعه لمدة عشر دقايق.

و فى اخر لجظه هنضيف النكهه اللى عايزينها و كمان اللون.

و نصبه فى قالب مبطن بفويل و مرشوش بنشا.و نتركه لمدة 12 ساعه و بعدين نبدأ نقطعه..سهل مش كده؟؟

انا هنا اديته نكهة الفراوله و تناولت اللون الازرق بدل الاحمر..كنت عايزاه وردى بس النصيب و القسمه طلع اللون الازرق فى ايدى..مش مشكله ازرق ازرق بس نعيش.

و طلع حلو اوى و جميل!!!

الوصفه دى اهداء لنسرين ...صبرت معايا كتييييير.

نسرين صبرتى و نلتى و عقبال......لسه فاكره والله .

C'est bon, rien que du bonheur

C'est bon... Rien que du bonheur... que du bonheur... Lalalalalalalalalalalalalala... Lalalalalalalalalalalalalala ! Des p'tits bisous au réveil Des mots tendres à mon oreille Un câlin quand on s'éveille Et la caresse du soleil C'est bon ! Un bonjour et un sourire Un regard et un fou-rire C'est bon ! Un pardon que l'on partage Comme le bleu après l'orage C'est bon ! C'est rien, c'est rien, mais après tout C'est tous ces riens qui font un tout C'est bien, c'est rien, rien que du bonheur (x2) Etre attendu quelque part Le sentir et le savoir C'est bon ! Rouler libre, cheveux au vent, oh ! Etre fou et insouciant C'est bon ! Laisser les aiguilles du temps Faire des tours sur le cadran C'est bon !

كل سنه و انتى طيبه يا ملوووووكه !!!!

عيد ميلاد ملوكه كان يوم 31 مارس بس نظرا لاصابات تعرضت ليها "اصابات عمل تعرضت ليها و مش متأمن عليا علشان أنا ست بيت"..ما علييينا...اضطرينا نأجل عمل التورته و بالتالى الاحتفال.

و لما ربنا سهلها و عرفت أشتغل توكلت على الله...و كان الوحى و الفكره اللى كانت بتلح عليا اوى...هى شخصيه كارتونيه لذيذه أوى اسمها "Charlotte de fraises" أو بالانجليزى "strawberry shortcake" و هحط ليكم فيلم فيه الشخصيه دى علشان تعرفوا ازاى هى اوحت لى بالفكره و التصميم بتاع التورته.

مليكه كانت عندها رغبه شديده بالاحتفال بعيد ميلادها فى المدرسه يعنى برضه بتصعب عليا المهمه....لأنى كده سوف اضطر اعمل كميات تكفى الفصل..ماشى يا ستى.. و بدأت الشغل ..أول حاجه عملتها كانت الكيكه الاسفنجيه المطلوبه للتورته و كان اختيارى كيكة شوكولا ..."مين ما بيحبش الشوكولا؟؟؟" و بعدين تانى يوم عملت الفوندان و المره دى عملت فوندان من حلوى المارشماللو..و بما انى بعمل المارشماللو فى البيت فعملت مارشماللو علشان اعمل الفوندان...و بدأت ألون.....أأأأأأأه يانى !!! و الاصابه حصلت لى و انا بعمل المارشماللو ايدى انقطعت بالسكينه و لم اشعر و لقيت منظر مش قادرة اوصفه...خط احمر قاتم الاحمرار يسيل على لون المارشماللو الابيض والله كان منظر عايز يتصور ..بس ايدى كانت بتشر دم يا جماااعه هصور ازاااى؟؟؟

تالت يوم ..بدأت ازين التورته و طبعا حشيت طبقاتها بجاناش بالكراميل و الفروستينج كان" mousseline buttercream" و بدأت احط تغطية الفوندان و كل ده أخد منى 9 ساعات شغل متواصل لما رقبتى اتلوحت بجد .و خلصت التورته بعد محاولات جهيده من ياسين و مليكه للتسلل الى المطبخ و اصراار تام من لحس بواقى الكريمه مباشره من وعاء الميكسر..قلنا مااااشى..هو أنا عندى اختيار تااانى؟؟؟و اعداد التورته اخد منى كل الوقت ده لأنى بصراحه مش كل يوم بعمل تورته و ده اللى بيخلينى بطيئه شويه.. و كمان رغبتى فى انى اعمل كل حاجه و ما اجيبش مثلا الفوندان الجاهز اللى ما لهوش و لا طعم و لا ريحه ..سكر و بس.

و أدى التورته اهه جهزت..و معاها شارلوت....

و كان فاضل أعمل حاجه حادقه...فعملت ساليزون من القنافد..يا حلاوتهم يا جمالهم...

و غزت القنافد مطبخى !!!

لا و ايه عامله معركه!!!

بس فى وسط الزحمه ..اتولدت قصة حب....!!!

ياترى كانوا بيقولوا ايه؟؟؟؟؟
و لبست القنافد كلها و اتشيكت علشان تروح مدرسة مليكه و تحتفل...
و أدى مليكه فى الفصل بتطفى الشمع و اصحابها بيغنولها....



و كمان مع المدرسه....مدام أمانى و مادموازيل ساره.... و خلاص خلص اليوم و أدى حال المطبخ بعد ما اتنضف ييجى خمس مرات و فى الاخر سيبته و نزلته و ده كان لاااازم و الا كنتم هتلاقونى فى المرستان. لأن زى ما اليوم خلص أنا كمان خلصت ..... يالا كل سنه و انتوا و احنا طيبين !!!

اه نسيت احط شكل التورته يعد التقطيييع...طعمها كمان كان زى شكلها ..حلو اوى "راضيه عنها انا المره دى "هههههههه

يا فرااااو لااااتك يا شوشو...هههههه...بشجع نفسى ""أمراض نفسيه بقه بعيد عنكم"" !!!!

أهه أغنية Charlotte اللى كتر خيرها جانى منها الوحى..يالا علشان تتسلوا شويه بعد القصه الطوييييله العريضه دى.....

http://www.youtube.com/watch?v=HuHv12mMu3E

لما تنزل اسكندريه !!!

لما تنزل اسكندريه....اكيد اكيد لازم تعدى على مطعم سمك و تتغدى...فيه ناس بتروح بحرى و ناس بتاكل فى المكس او حتى أبو قير....أنا بقه بحب مطعم واحد بس و ده ببساطه لأنه محافظ على جودة أطباقه و كمان الخدمه اللى بيقدمها.

مطعم و أنا باكل فيه بحس ان اللى طابخ ..طابخ بنفس و حابب شغله..مش بس طابخ و السلام .

"بلبع" من أكتر المطاعم اللى بحب اكل فيها. و اللى كان بالنسبه لى اكتشاف هو مطعم السمك "فى الدور الفوقانى"..و على ما اعتقد الناس دى بتحتكر شراء احلى سمك من البحر علشان تقدمه على موائدها...و طبعا بعد ما كلت فيه..كرهت البورى و البلطى.. و عملت حالة تمرد على السمك.

ربنا يصلح حالى يا رب و أرجع اشترى سمك من السوق و أطبخه.

اخر مرة رحت صورت صور كتييير و حابه نتفرج عليها سوا ...يالا بينا

ده بقه يا حبايبى ..تعبان البحر و طبعا ده بالنسبه لى للتصوير ليس الا...شوفوا براءته !! يا سبحان الله !!

و الراجل الأمير ده ..من عمال المطعم حب ياخد صورة تذكاريه هو و ياسين و كمان هذه السمكه المسكينه""سمكة موسى"و التى سوف تلقى مصيرها المحتوم باعتبارى مدمنه سمك موسى "حاله مستعصيه".

و ده صورة الجندوفلى بعد ما استوى..و كان ياعينى فى الصورة الاولى مبسوط و مزقطط وسط صحابه و نازل رش فى ميه عليا و انا بصوره...بس الانتقام كان سريييع و وصل الطبق فى اقل من ربع ساعه.و دى بقه يا حبايبى صورة...بس صورة للاستاكوزا..العيال اصروا يصوروها...مع انى والله لم أجرؤ حتى انى اسأل سعرها كام..الضغط بيعلى و كنت عايزة اليوم يعدى بسلام...عموما أهو برضه معرفه الاستاكوزا كنوز .

و كل مره و انتوا و انا طيبين...بس مش عايزاكوا تاخدوا على كده...من بكره هنطبخ تاااانى و نخبز تالت و نوسخ مواعين رابع و نغسل خاااامس لما تطلع عينينا و عين...و ربنا معانا و مع الغلابه اللى زينا..ههههههههه

سلاااااام !!!

شهيره قاعده بتاكل حلاوة المولد...استر يا رب !!!

ازيكم يا حلوين بقالى كتير ما زهقتكمش....على العموم انا جييييييييييييت !!!

السنه دى ما اشتريتش حلاوة المولد و حتى الحلاوة اللى جاتنا شحاته....مافيهاش ملبن...طبعا زعلت جدا لأنه الحاجه الوحيدة اللى باكلها فى كل الفيلم ده...

طيب دخلت المطبخ و عملته و لو تعرفوا الوصفه منين؟؟؟؟ من كتاب عندى فرنساوى عبارة عن موسوعه لموائد العالم و لقيته فيها يا حلاوته...اسمه يا جماعه بالفرنساوى "loukoums" و بالانجليزى "lokoms" و ده تحريف للكلمه العربيه حلى الحلقوم او بالتركى لقم بضم اللام و القاف...طيب ندخل على الطريقه...يالا بينا

المقادير:- بشر برتقاله

بشر ليمونه

ربع كوب عصير برتقال

2 ملعقه كبيره من عصير الليمون اللى يفضل يكون اضاليا

3 كوب سكر

نص كوب ماء

2 ملعقه كبيره جيلاتين بودره

تلتين كوب من النشا

من 3 الى 4 نقاط من ماء الزهر

لون حسب الرغبه

نص كوب سكر بودرة للتقطيع

نضع فى حله السكر و القشر المبشور و العصير و كمان الميه.

نقلبهم على نار متوسطه حتى الذوبان...و بعد كده مانحطش فيهم الملعقه...نتركهم يغلوا 5 دقايق حتى يصلوا الى مرحله الشريط و دى مرحلة من مراحل غليان السكر و نستدل بيها لما ناخد ملعقه من السكر و نحطها فى كوب ماء بارد لو نزل الشربات فى الكوب زى الشريط يبقى هو ده اللى عايزينه

نيجى على جنب ندوب مقدار الجيلاتين فى نص كوب ماء و ندوبهم على حمام ميه... لحد ما يدوبوا خالص...و كمان ندوب مقدار النشا فى نص كوب ميه

و نضيف الاتنين على الشربات اللى عملناه و نقلب لحد الغليان..هنا بنضيف النكهه اللى حبينها و كمان اللون ..بنقفل النار و نصبه فى قالب مربع مقاس 17 و جنابه تكون عاليه.

و ندخله بعد ما يبرد التلاجه للصبح..اه نسيت اقولكم ان القالب لازم يكون مفروش بالفويل و مدهون بالزبده.

و الصبح ننزل القالب على الرخامه بعد ما نرشها و نقطع...

و بالهنا و الشفا و المره اللى جايه هعمل التقليدى...اللى بعين الجمل و ماء الزهر.

و اشوفكم البوست اللى جاى ان شاء الله .

تحدى الحب فى عيد الحب لل DB..عصابه الخبازين العالميه!!!

و احتفلنا بعيد الحب...فى الحقيقه مش انا اللى احتفلت...دى عصابه الDaring bakers صحابى يا جماعه اللى حكيت عنهم قبل كده .

و كان شهر ما يعلم بيه الا ربنا...حبيت بس اوريكم طبقى و هو متكون من كيكه شيكولاته بس من غير اضافه اى دقيق .

المهم يعنى و الصراحه تتقال انا ماعجبتنيش الوصفه و بالذات ان احنا فى مصر ماعندناش شيكولاته طبيعيه مصنعه من زبدة كاكاو طبيعيه.

المهم..قصر الكلام لو الطبق كان مهرجل و شكله مش و لابد...فده ببساطه لأنه بيعكس مزاجى اللى كان برضه مهرجل...يالا سمعونى الانتقادات اللاذعه !!!

اه نسيت اقولكم انى قدمته مع ايس كريم مانجو و كمان فانيليا بالفراوله .

هعوضها لكم ان شاء الله المره اللى جايه.