تطبيقات تانى لوصفه الTuiles تحدى الDaring bakers !!!

تانى تحدى لى فى Daring bakers !!!!

ايوه منظمه الخبازين اللى ما بيخافوش من حاجه ....أبدا!!!

وصفه المرة دى سهله جدا جدا هى عبارة عن وصفه بسكويت زى بسكويت الجوفريت او السيجار بالشوكولا او بسكوت الايس كريم ...الفكرة فى التشكيل و الابداع فى العرض و كانت المهمه اننا نقدمه مع طبق حلو قائم على الفواكه و الكاسترد ...

محسوبتكم طقت فى دماغها الفكرة ...عملت طبق رز بلبن و نكهته بالمستكه و ماء زهر البوصفير و كمان بالحبهان و على الوش زينت بالفاكهه ..اناس و كيوى و فراوله مع رشه عسل ابيض و كمان بوله ايس كريم فانيليا و فراوله....يعنى اقدر اقول ان الطبق ده تزاوج فى النكهات ما بين الشرق و الغرب.حاجه كده full option !!!!

شفتوا بقه احلى من كده ..؟؟؟ نيجى للبسكويت ..طبعت رسمه حشرة طائرة اسمها dragonflyو اسمها بالعربى تقريبا ابودقيق و ممكن برضه لو فى حد بيطرى او زراعه يكون عنده رأى تانى.. طبعت الورقه و فرغت الرسمه على ورق ستنسيل و و فرشت فيه العجينه اللى بتبقى شبه سايله على لوحة السيليكون و خبزتها و اول ما طلعت تنيتها علشان تاخد شكل الحشرة...

و عملت اشكال تانيه كتير هتشوفوها فى الصور.الفكرة انى مش قادرة ابطل لعب بالخامه دى...لسه فى ابتكارات كتييييير فى دماغى عايزة اعملها...

يدينى و يديكم طولة العمر .

خبزة يوم الجمعه !!! انجاااااااز!!!

اللهم صلى على سيدنا محمد ...يالا ادخلوا برجلكم اليمين....

مخبوزات ...مخبوزات...هتجننى المخبوزات...ربنا يستر....

اهداء !! للراجل اللى بحبه !!!!

زوجى الحبيب .... كل سنة و انت طيب و بألف خير.
..شكرا ليك...شكرا ليك لأنك ببساطة مستحملنى.
التيراميسو اللى طلبته وصل يا باااشا !!

أمى على خط الحدود ( مصر/ فلسطين) !!!!

أمى على خط الحدود (مصر/فلسطين)!!!
هذه قصة كأى قصة .... بس حبيت احط هذه القصة لتعد رسالة ...رسالة بسيطة لكل من يزايد ...او بتعبير المصريين "يصطاد فى الميه العكرة"أمى ست كبيرة تجاوزت الستين من عمرها عاشت حياتها فى القاهرة بس فى الصيف كانت بتروح هى و عائلتها للعريش امها اصولها من العريش ,, لهم بيوت و مصالح فى العريش و الانتقال دائم بين القاهرة و العريش ... و العريش او سيناء هى قطعه من قلب جدى و جدتى ..جدى و كان طيار فى الحربية المصريه ..كانوا بيطلقوا عليه لقب " مجنون فلسطين "" شارك فى الحروب و النكسات .. جمع مكتبه ضخمه تبحث فى اصول و عراقة هذا البلد ...ذكرياتى عنه تصوره فى مخيلتى زعيم سياسى ..كل احاديثه كانت فى النهايه تصب فى موضوع واحد ...ألا و هو القضيه..المهم اتأثرت كتير بجدى و كان دايما يوجهنى و يقول لى انتى هتطلعى صحفيه و تدافعى عن القضيه .. و دخلت سياسة و درست سياسة و المحصلة ...ثورة احباطات مالها حدود .. السياسة,, اللعبة القذرة زى ما بيقوله.اعتزلت السياسة او حتى التفكير فيها و تجنبت حتى الخوض فى مناقشات عامة تزيد من احباطى و من الاحوال التى الت اليها الثقافة العربية و الامة العربية بشكل عام.بس حركتنى حكايه ماما.ماما اتصلوا بها مجموعة من الناس نظموا مسيرة دعم معنوى و مادى لأهل غزة...طلبوا منها مرافقتهم فى الرحلة و كان ...قضت ماما 3 ايام على خط الحدود حتى يتمكنوا من تمرير السيارات التى توجهت من الاسكندريه الى رفح على خط الحدود ..تحملوا مماطلات لا اول لها من اخر حتى يتمكنوا من تمرير الرسالة.قد تكون لا شئ ,بس لأ صحابها هى كل شئ.حكت لى حكايه ادمعت عينى.. تقول:- فى طريقنا كنا ننتظر اى سيارة تابعة للقافلة حتى نسير سويا فلا نضيع من بعضنا.. و اذ فجأة و اثناء مرور جرار زراعى بجانب القافلة لمحوا رجل عامل بسيط متشبث فى الجرار من الخلف "وسيلة مواصلات مجانية" يلجأ لها الناس البسيطة عندما لا يملكوا حتى ثمن مواصله تقلهم من العمل الى البيت ..المهم تفاجأ اهل القافلة بالرجل الذى قفز امام السيارات و هى فى طريقها للتحرك بشكل انتحارى .. و قالهم ..بالله عليكم انتوا رايحين فلسطين؟ ... ذهلوا منه و من سجيته و هو العامل البسيط الذى يرتدى ملابس بالكاد تستره ... فأجابوه نعم ...فادخل يده فى جيبه و اخرج "3بيضات مسلوقة " و من الجيب الاخر كيس فيه حوالى ربع كيلوسكر, 5 جنيه .. و حلفهم بالله ان يوصلوا الامانه ..فهذا كل ما لديه, بكى الرجال ,,كما لم يبكوا من قبل .و اخر فى الطريق ..ليس افضل حالا من العامل الذى سبقه ,,خلع سترته لكى يرسلها لاخوانه على خط الوطن من الناحية الاخرى .تعلو اصوات البعض من الاخوة بانهم ليسوا فى حاجة الى طعام و لا كسوة و انهم فى حاجة الى سلاح ...نعم و اقدر موقفكم بس ... رسالة من مواطن بسيط لا يملك حتى قوت يومه ... 3 بيضات و ربع كيلو سكر و 5 جنيه و هذا هو كل ما يملك..رسالة بتقول أنا أفضلك على نفسىوعلىاهل بيتى. فى زمن لا يرحم الفقير .نحن لا نملك الاهذا ,عيون تدمع لحالنا جميعا و 3 بيضات و ربع كيلو سكر!!!فقد نجحت محاولاتهم ... ان نظل فى دائرة الجوع و الفقر و الجهل و المرض و رغم كده ...لسه الدنيا بخير!!ربنا معكم و معنا ...ربنا يرفع غضبه و مقته عنا ,امين يا رب العالمين.أصيلة رغم الزمن و الظروف يا مصر!!!!

فطيرة الدجاج ..وصفة حلى قهوة و تطبيق و لمسات شهيرة !!!

فى "لك" نظمت مشرفه قسم المخبوزات الجميلة "ام البنات" مسابقة جميلة فى المخبوزات و المعجنات فكرتها ظريفة ...بين المشرفات و العضوات ..عملنا فرق ثنائية ..كل فريق عبارة عن عضوة و مشرفة ..المشرفة تجيب وصفة اى وصفة سواء طبقتها قبل كده و لا لا و العضوة :اللى الله يكون فى عونها ..عليها ان تخرجها و تطبقها فى احلى صورة و اتفتح الاستفتاء على الاعمال المشاركة و لسه شغاااااااااال ..ادعوا لفريقى انه ينجح ..

بس انا هنقل لكم ..الوصفة علشان تطبقوها و تفرحوا بيها زى ما فرحت ...يالا بينا...

السلام عليكم ورحمة الله وبركاته
chahira.حلى قهوه
فطيرة الدجاج بالخضر!!وصفة الاخت المشرفة حلى قهوة.لمسات و تطبيق Chahira .

وصفة حلى بالنص:-
فطيرة الدجاج

[ 1 ]3 كاسات دقيق 7 ملاعق حليب بودرهملعقة ونص خميرة فورية 1/2 كأس زيت كأس ونص ماءا فنجان قهوه سكر
تخلط جميع المقادير مع بعضها جيداً عدا الدقيق يضاف الدقيق وتعجن حتى تتكون عجينة متماسكة وتترك ساعه تقريباً حتى تخمر

[ 2 ] دجاج مسلوق ينزع منه العضم وينتف او يفرمبصل مقطع قطع صغيره بقدونس مفروم جزر مبشور فلفل رومي مقطع قطع صغيرهملح / بهارات يحمس البصل مع قليل من الزيت .. ثم يضاف عليه الفلفل الرومي والبقدونس والجزر ويقلب على النار ثم يضاف اليه الدجاج والملح والبهارات
[ 3 ] الوجه علبة قشطة 3 ملاعق جبن كاسات ملعقة مايونيز
احضري الصينيه .. وادهنيها بزيت ورشيها بالزعتر افردي العجينة في الصينية فوق الزعتر ثم اضيفي خلطة الدجاج ثم خلطة الوجه وادخليها للفرن من تحت حتى تنضج العجينه عند تقديمها قطعيها مثلثات مثل البيتزا او مربعات حسب الرغبه وبالعافيه ^^و هذا كان نص الوصفة الاساسية للأخت المشرفة "حلى قهوة"
اما التعديلات التى ادخلتها كانت بالنسبة للعجينة انا عملت نفس المقدار بس قللت شويه فى نسبه السكر حيث وضعت ملعقتين كبيرتين فقط كمان اضفت 2 ملعقة كبيرة زعتر جاف.وضعت ذرة ملح.استخدمت قطعة خميرة بيرة فى حجم قطعة البندق"بقشرة".و قللت الزيت فكان تلت كوب معيارى .. انا هنا استخدمت الملاعق و الاكواب المعيارية. و هى توازى 250 مل اى ما يعادل ماج الشاى عندما تملأيه بالماء يعنى زى ما بتقدميه لحد بتملى مش للاخر .طيب بالنسبة للطريقة للعجينة ربيت الخميرة مع ملعقة صغيرة سكر و 2 ملعقة كبيرة ماء و تركتها 5 دقائق حتى بدأت تفور و يظهر فيها فقاقيع الهواء.و اضفتها على الدقيق المنخول و المضاف له مسبقا باقى المقادير.تركتها تخمر و بدأت فى اعداد الحشو حتى تكون باردة نسبية عند اضافتها للعجينه.طيب شويه صور للتوضيح...
الصور بتوضح المقادير و كمان الادوات التى تم استخدامها لعمل الفطيرة.
الحشوة:-فى طاسة واسعة " زى الووك الصينى " وضعت قطعة زبد حوالى 50 جرام مع 2 ملعقة كبيرة زيت زيتون, و كنت قد قطعت نصف كيلو دجاج نى الى شرائح رفيعة مثل الشاورما.و لما سخنت الزبد مع الزيت نزلت فيها قطع الدجاج .ملحوظة: يجب ان يكون الدجاج مصفى جيدا من اى ماء تبقى اثناء غسل الدجاج .. كما ينصح بغسله قبل تقطيعه حتى لا تتشرب انسجة الدجاج بمياه الغسيل.قمت بتشويح الدجاج على درجة حرارة عالية, هذه العمليه تسمى sealing و الهدف منها غلق المسام الخارجية لقطع الدجاج و حبس سوائل و عصارة اللحم داخل الانسجة حتى لا نحصل فى النهاية على نتيجة غير محببة " بنقول عليها بالمصرى : ان اللحمة متفلة" اى انها مثل فتل الخيط ..و بعد تشويح الدجاج على العالى و السريع نزلت بحوالى 100 جرام فاصوليا خضراء مقطعة صغير و دخلت مع الدجاج فى التشويح و بعدين نزلت 1جزرة كبيرة مبشورة و بعدين بطاطس" 2 حبة صغيرة و كملت التشويح و بعدين بصلة كبيرة و بعدين فص توم .. بين كل اضافة و التانية بحاول من خلال طهى الخضار انه يدخل فى مرحلة التدبيل " او الذبول" و بعدين 3 حبات فلفل صغيرة اخضر و احمر وأصفر و اخيرا اتبل بالملح و الفلفل الابيض و اضيف البقدونس " حزمة حلوة" و على طوووول اطفى النار.خمرت العجينة فقمت بتقسيمها التلت و التلتين.
و دى صورة كمان بتوضح شويه الخطوات.
اخذت مقدار التلتين و قمت بفرده على الرخام بمقدار يساوى قطر قالب التارت و زيادة عليه جوانبه.و قمت بوضعها بعد الفرد فى قالب تارت قاعدته متحركة مقاس 30و بعد دهن قالب التارت نزلت فيه العجينة بتاعتى .و صبيت الحشو بتاعى بعد ما برد.تحذير :- لو الحشو لسه سخن لا تضعيه فى القالب حتى لا يتسبب فى قتل الخميرة انتظرى حتى يبرد .و عملت التغطيه و كانت كالتالى 5 ملاعق جبنه كريمى+ 2 ملعقة مايونيز + علبه قشطة او علبه sour cream +ملعقة صغيرة مسطردة و ملح خفيف جدا و فلفل ابيض.تم الخلط يدوى على شرط طبعا أن تكون كل المكونات بدرجة حرارة الغرفة.تفرد على الحشوة على ان تغطيها .
صورة توضيحيه كمان!!!
و فردت الجزء المتبقى من العجينة و مشيت عليه بالرول الموضح فى الصورة ادناه و اغلقت به وجه الفطيرة.و دهنت الوجه بالبيض المربوب.و تترك لتخمر قليلا حوالى نصف ساعة.
يسخن الفرن على درجة حرارة 250 لمدة ربع ساعة قبل دخول الفطيرة .تدخل الفطيرة النار لتخبز و تخرج بعد ان ياخذ وجهها اللون الاحمر المحبب.ملحوظة : كاى فطيرة سوف تبدأ الاطراف باكتساب لون اسرع من المنتصف لذا يمكنك الحفاظ عليه بتحضير شريط من ورق الفويل مسبق لتغطيته الاطراف لهذا الغرض.
تخرج من الفرن بعد تمام النضج و نخرجها بعد ان تدفأ قليلا بحرص من القالب.ملحوظة هامة: لا تنتظرى حتى تبرد تماما و الا ابتلت من بخار الماء التى تحدثه بعد الخبز "تبتل من عرقها".و تقدم و هى باردة مع سلطة خضراء و بس و يمكن ان تقدم وحدها بمصاحبة مشروب خفيف.
و ادى صور للانتاج النهائى!!!
أول طلعة!!
تانى طلعة!!!جربوها هتعجبكم جدا جدا..
.شكرا لحلى قهوة ... أطلعتنى على طبق جميييييل جنن كل الناس اللى داقوه.

منتدى "لكى"...بيت الأمه!!

منتدى لكى ...منتدى عربى غااااايه فى الروعة ..اشتركت فيه منذ عدة سنوات لكن مشاركتى الحقيقية كانت عندما تم اختيارى ضمن التوب 22 فى مسابقة ستار شيف العرب على قناة فتافيت ... شاركت فعلا بهدف حشد المزيد من الاصوات ...و من ساعتها مش عايزة اخرج ...تجمع رائع للنساء العربيات ...مجتمع عربى جميل ...يجمعنا الحب و المودة و تكسرت بداخله كل البوابات اللى على الحدود...بنسهر نضحك مع بعض..سوريات "احلى سوريات" , مغربيات ,ليبيات , نساء خليجيات ,كمان فلسطينيات و عراقيات و لبنانيات ..يعنى جامعة دول عربية نسويه ...مش فشنك زى جامعة الدول العربية.. لغتنا واحدة و كلنا فاهمين بعض كويس و اللغة اللى جامعانا ..العامية المصريه ...مفيش حد مش فاهمنا ...ندخل مسابقات و نتنافس على احلى الاطباق و هاتك يا ضحك و روح حلوة نفتقدها فعلا هذه الايام.
المتأمل للوضع يلاقى ..ان احنا كشعوب و بالذات " العنصر النسوى" و اللى بيربى الامه ...ما عندناش اى ضغائن و لا احقاد ضد بعض ..بالعكس بنتعاون و بنعمل حاجات حلوة كتيييير ,,ما بيقدرش الزعماء العرب يعملوها و الروح السائدة ..مش هتصدقوها الا لما تدخلوا و تتفاعلوا وهتلمسوها بايديكم ..
سبحان الله ...ما يجيبها الا ستاتها....حتى و لو على مستوى المطبخ ...يعنى اتفقنا ووزعنا ادوار و انجزنا مهمات ...عجزوا الساسة الافاضل ان يصنعوا و لو واحد على عشرة مما صنعناه...
ربنا يزيد المودة بيننا ... و يجعله عاااااااااااااامر "زى ما المصريين بيقولوا".
و ل "لك" يا رب من تقدم الى تقدم .
ادعوا كل النساء و كل البنات ..اللى بيشتكوا من الفراغ او حتى المشغولات ان يتفاعلن على "لك" هيفيدوا لأن اكيد عندهم موهبة و علم قيم ..و كمان هيستفيدوا ..لأن على "لك" فطاااااااااااااحل فى كل المجالات.
رابط المنتدى اهوه و عيشووووووووووووووووووووووووا !!!!!!!!!!!!
http://www.lakii.com/vb/index.php

انتاج المحاضرة اللى فاتت.. برافو بنات!!

بس المرة اللى جايه مش هحط ايدى خااااااااااااااااااااااالص!!!!!
يا سلام على الالوان المطرقعة...
كل سنه و كلكم طيبين...

أول تحدى لى فى منظمة "Daring Bakers"تحدى الخبازين اللى مبيخافوش من حاجة!!!

Details on:-
www.chahirakitchen.blogspot.com

Red Velvet Cake

أو الكيك الاحمر المخملى .. لسه مخلصاها ... و الكيك ده بلده امريكا أو الولايات المتحدة الامريكية .. و تحديدا جنوب الولايات ... طبق حلو خاص جدا بالجنوب و ليه حكايه هحكى لكم عليها بكره لما ارتاح...

سلام مؤقت.....

تانى يوم!!!

طيب يا ولاد ,, ارتحت خلاص و خدت نفسى .. ما اعتقدش بس برضه الوصفة اهه علشان اللى يحب يعملها اول حاجة نحضر المقادير:-

2و نص كوب دقيق

1 و نص كوب سكر

1 م.ص بيكنج صودا

1م.ص كاكاو

1 و نص كوب زيت نباتى

1 كوب لبن رايب

2 بيضة كبيرة

2 ملعقة كبيرة ملون طعام احمر سائل

1 ملعقة صغيرة خل

نص ملعقة صغيرة فانيليا

و للحشو و التزيين :- كريمة الجبنه و مقاديرها 100 جرام زبدة .. حوالى 2 كوب كريم شانتى و 200 جرام جبنة كريمة و سكر حسب الرغبه.

طيب قبل ما نبدأ فى التنفيذ نسخن الفرن على درجة حرارة 180

و نبدأ الشغل , نحضر اناءين واحد للمواد الجافة و واحد للمواد السائلة و الجافة ننخلها و السائلة نضربها على خفيف و بعدين نخلط المزيجين معا و نصبهم فى قالب كيك مقاس 20 او 22 و يدخلوا الفرن و بعد 30 دقيقة هيطلع لنا احلى كيك.

و بالنسبة للكريمة تخفق كل المقادير السابقة مع بعضها بالمضرب الكهربائى و لازم تكون كلها فى درجة حرارة الغرفة.

و نبدأ نقطع الكيك نصين ده طبعا بعد ما يبرد تماما و بعدين نحشى بالكريمة و نزين بيها كمان من الخارج و كل واحد طبعا و ذوقه..

طيب انا استخدمت فى التزيين شويه Pecan nuts و ده نوع مكسرات امريكى من فصيلة عين الجمل و طعمه كتييير متقارب ..كمان الكاكاو اللى يستخدم انصح انه يكون من النوع الفاتح حتى لا يتأثر لون الكيك الاحمر .. كذلك يفضل انتقاء ارقى انواع الالوان الطبيعية لضمان الحصول على لون احمر جميل...بس كده!!!

طيب ايه حكايه الكيك ده .. الكيك ده من تراث المطبخ فى جنوب الولايات المتحدة الامريكية و يقال ان العبيد الزنوج فى الجنوب هم اول من ابتكروه و كانوا يعدوا هذا الصنف فى المناسبات و الولائم اللى كان يقيمها اسيادهم البيض!!!

اياااااااااااام زمااااااااااان ... أيام فاتت! الله ما يرجعها!!!

يالا حماس عايزة اشوف حد يقول هطبق الوصفة!!!

انتاج محاضرة انهاردة!!

انهاردة كان فيه محاضرة "تارت" عملنا العجينة الرئيسية للتارت و الباى الحادق و الحلو و المحايد و حبيت اشارككم فى صور الانتاج .. يا رب تعجبكم!!!!

اعضاء منتخب الدورة بتاعة الاتنين و الاربعاء"علا,هديل,و مامة هبه"!!

يالا ربنا يوفقهم و يتخرجوا!!!!

ادحرج و اجرى يا رمان!!!

أغنيه من الذاكرة ... مرة حضرت فرح جماعة فلاحين و انا صغيرة و كانوا بيزفوا العروسة و يغنوا ... ادحرج و اجرى يارمان وتعالى على حجرى يا رمان !!!!

يعنى ايه علاقة الرمان بالعروسة و العريس ؟؟ مش عارفة و لو حد يعرف يا ريت يقول لى و يعمل معروف....

طيب ايه علاقة اغنية الفرح باللى بعمله او بكتب عنه ... الاغنية افتكرتها و انا غرقانه فى المطبخ وسط الرمان و خايفة مووووت يوسخ مريلة المطبخ المفضلة عندى.... سيبت الاغنية و قعدت اصور بذور الرمان الجميلة .. لا يسعك فى هذه اللحظة الا انك تقول .. سبحان الله !!!!

خلق كل حاجة جميلة و خلق الانسان ليعمر الارض بس افسدها و دمرها و اخل بتوازنها .. يعنى تبص من الشباك و الا تمسك ثمرة رمان احسن و تتأمل فى بديع صنعه؟؟؟؟




طبعا ثمرة الرمان .. يالا بينا على الصور...

اهداء الى اليمان!! صديقتى السوريه!!!

صديقتى اليمان السوريه .. و اللى احب اعرفكم عليها ... شخصية محترمة و نشيطة و غايه فى الذكاء و لديها مواهب متعددة.. يعنى هانم من هوانم الزمن القديم... لأتى بشوف ان اى ست فى بيتها بتنتج و ترعى اهل بيتها و دايما تتعلم جديد علشان تعود بالفايدة على اهل بيتها... بشوفها هااااااااااااااااااااانم و تستاهل لقب باشا بجدارة!!!

اليمان أولا بتعمل حاجات حلوة اوى مخبوزات و اكل شامى حكايه ,, هى هنا جربت وصفة الكيك بتاعى و عجبتها و انا الصراحة عجبنى تطبيقها جدا و علشان كده حبيت اشارككم بالصورة بتاعتها ده بعد اذنها طبعا!!

كمان عملت فطيرة الخاتم بس على حادق يعنى حشيتها جبنه و زعتر و سبانخ.... يمى يمى يمى!!!

يالا نسألها عملتها ازاى؟؟؟

الصور حكاااااااااااااااااية !!مش كده؟؟؟؟

البطاطس دى فيها ايه ؟؟؟ ايه الحكمة يعنى من الصورة !!مسابقة كله يدخل و يجاوب!

البطاطس دى فيها ايه؟؟؟
و ليه مصوراها؟؟؟
و اللى عارف منى شخصيا قبل كده ما يسيحش يعنى ما يقولش و يدى فرصة لاخواته يجاوبوا... يالا يا ولاد و يالا يا بنات و اللى هيجاوب صح , ليه جائزة قيمة

لأول مرة بالاسكندرية!!مدرسة لتعليم فن الطهى و الخبز بس !!!

بسم الله الرحمن الرحيم

- دورات المطبخ المتكاملة تشتمل على سبع دورات:-الاولى:دورة هاى تى.

الثانية:دورة المخبوزات.

الثالثة:دورة سهل /صحى/سريع.

الرابعة: دورة طهى للمبتدئين.

الخامسة: دورة طهى متقدمة.

السادسة:دورة هديتك من مطبخك.

السابعة:دورة مطبخ للاطفال.

أولا:- دورة high tea

الموضوع:- اعداد بوفيه كامل للمناسبات المختلفة يشمل حلو و حادق.

عدد المحاضرات:-5 محاضراتالاولى: الاسفنجية + التغطية

الثانية: الكيك بأنواعه + Quick bread

الثالثة:التارت ( حادق ساليزون + حلو)

الرابعة: الشو (حادق ساليزون + حلو-بروفيترول,اكلير,كروك اون بوش)

الخامسة:بسكويت و كوكيز (حلو و حادق)عدد الساعات:- 3 ساعات لكل محاضرة باجمالى 15 ساعة للدورة .

ثانيا:- دورة المخبوزات :-

الموضوع:- التدرب على الخبز عن طريق ممارسة تكنيك العجن و الخبز أكثر من مرة عمليا.

عدد المحاضرات:-4محاضرات.

الاولى: خبز فرنسى .

الثانية:بريوش.

الثالثة: دانش.

الرابعة:بيتزا و فطائر.

عدد الساعات:- 3 ساعات و نصف لكل محاضرة.

ثالثا:- دورة سهل / صحى / سريع :-

الموضوع:- مع وقع الحياة المتسارع ، تنامت الحاجة الماسة لدى ربة المنزل فى إختصار الوقت الذى تقضيه فى المطبخ و على الرغم من ذلك ترغب فى إعداد وجبات صحية متوازنة لأبناءها ، هذه الدورة تحقق هذه المعادلة الصعبة .

عدد المحاضرات:-4محاضرات

الاولى: مكرونة و أرز

الثانية: سلطة .

الثالثة: لحمة .

الرابعة: دجاج .

عدد الساعات:- 3 ساعات لكل محاضرة.

رابعا:- دورة طهى للمبتدئين:

-الموضوع:- هذه الدورة تخاطب أى انسان لديه الرغبة فى الالمام بأصول الطهى الأساسية و تقترح مفردات عديدة بغرض اعداد مأدبة أنيقة و راقية تمثل وجبة متكاملة و متوازنة .

عدد المحاضرات:-5 محاضرات.

الأولى:- سلطات.

الثانية:- شوربات.

الثالثة:- لحم و دجاج.

الرابعة:- أرز و مكرونة.

الخامسة:- مأكولات بحرية.

الساعات:-3 ساعات لكل محاضرة.

خامسا:- دورة طهى متقدمة:

-الموضوع:- خلال المحاضرات سنقوم بجولة حول موائد العالم ,نعد معا أشهر أطباقها.

عدد المحاضرات:- 4 محاضرات.

الأولى: مقتطفات من المطبخ اللبنانى ,

الثانية: مقتطفات من المطبخ الأمريكى و المكسيكى ,

الثالثة: مقتطفات من مطبخ البحر المتوسط ,

الرابعة: أسيوى.

عدد الساعات:-3 ساعات و نصف لكل محاضرة.

سادسا:- هدية من مطبخى:

-الموضوع:- مشكلة دائما ما نواجهها ألا و هى البحث عن فكرة لهدية جديدة , هذه المشكلة سوف تنتهى تماما . اصنع هديتك فى مطبخك و قدمها بشكل أنيق و متفرد.

عدد المحاضرات:-4 محاضرات

الأولى:كيك أنيق و مبتكر+ طريقة انيقة للتغليف و التقديم.

الثانية:truffes + طريقة تغليف و تقديم .

الثالثة:نوجة و توفى راقى مع التقديم و التغليف.

الرابعة: مربى و مارملاد رائع من مطبخك.

عدد الساعات:-3 ساعات لكل محاضرة.

.سابعا :-دورة مطبخ للأطفال:

-الموضوع:- المطبخ ايه؟ معمل كيمياء, يعنى ممكن نعمل اختراعات و نبتكر. ممكن نبسط العلوم فى المطبخ ! و ننمى قدرات أولادنا الجسمانية و الذهنية و نعلمه ازاى يشغل مخه مع ايديه .

عدد المحاضرات:-4 محاضرات.

الأولى : فراشات و ورود.

الثانية:shake the milk+jello fruit salad

الثالثة: chocolate honey bees

الرابعة:snowy men

ملحوظة: تدرس المحاضرات باللغات الانجليزية أو الفرنسية أو العربية حسب رغبة الوالدين.

- هذه المحاضرات موجهة للأطفال من سن 8 الى 12 سنة يتم تعريف الأطفال من خلالها على أصل الخامات المستخدمة , التعريف بكيمياء الخبز , فائدة الطعام الصحى المتوازن بالاضافة الى تناسق الألوان و توزيعها فى طبق التقديم.

- عدد الساعات:- 3 ساعات لكل محاضرة.

ملحوظات هامة:-

- كل دورة تتعرض فى المقدمة الى اجراءات الأمن و السلامة الواجب اتباعها بالمطبخ .

-على المتدربين الالتزام التام بمواعيد المحاضرات لأنها تبدأ تماما بالموعد المحدد.

- على المتدربين احضار apron أو المريلة الخاصة بهم.

شهيره داود