مطبخ شهيرة الخبيرة!!!!

ااااخر الافتكاسات

yassinmalika@gmail.com (Chahira Daoud) — Mon, 14 Dec 2009 01:05:00 +0000

أتمنى ان تنال اخر افتكاساتى اعجابكم و شكراااااااااااااااااااااااا

سااااااااامحونى

yassinmalika@gmail.com (Chahira Daoud) — Thu, 26 Nov 2009 03:41:00 +0000

سامحونى..ايوه كلكم سامحونى...كنت متغيبه و سأظل متغيبه يمكن كمان شهر
ادعوا يكون أقل
اسفه لكل واحد دخل البلوج و كان عايز يشوف حاجه جديده و انا جبت له احباط
اسفه اسفه
هذه الفتره كنت بتعلم تصويرو لا زلت و كمان فى مفاجأة حلوة.انا بحضر لاول كتاب ليا...ممكن نقول انه كتيب من 60 صفحه.. و محتواه ايه؟؟ لا دى بقه لما ربنا يكرمنى و ينزل...انا بعمل فيه مجهود كبير و يا رب يطلع زى ما انا حابه انه يكون....علشان افضل دايما عند حسن ظنكم.
ان شاء الله الفتره المقبله...شكل البلوج هيتغير و محتواه هيبقى افضل بكتير و هحاااول انى اخصص له وقت زياده شويه
دعواتكم و كل سنه و انتوا كلكم طيبين :)))

عمر ماكويين !!!

yassinmalika@gmail.com (Chahira Daoud) — Thu, 17 Sep 2009 22:15:00 +0000

يا ترى مين عمر ده ؟؟؟

عمر ده طفل لذيذ و قمور و بيسمع الكلام " و بزياده شويه الاسبوع اللى سبق يوم الاحتفال بيه" :)))

عمر ابن بسنت صاحبتى كانت مامته عامله له احتفال لأنه ولد شاطر و بيسمع الكلام... و ده طبعا علشان تشجعه يكمل مسيرة الادب و الاخلاق العاليه. عمر بيعشق كل العربيات و بالذااات عربيه "lightening macqueen" و العربيه دى من شخصيات ديزنى و اللى ظهرت من خلال فيلم " cars".

لو رحتوا زرتوا عمر هتلاقوا فى اوضه نومه بوستر للعربيه ..حتى ادوات مدرسته و شنطته كمان للعربيه دى بالذات و مامته علشان تكرمه زياده حبتين طلبت منى انى اعمل لعمر تورته على شكل العربيه.....شغلت الفهامه و حبيت ان التورته تكون ثلاثيه ألأبعاد يعنى مجسمه مش مجرد رسمه على تورته او شكل للعربيه مسطح... و كانت اول مره اعمل حاجه كده يعنى شغاااله عميانى و من قالب كيك ضخم و مستطيل كانت المهمه انى انحت العربيه بكامل انحناءاتها و ابعادها و النت شغال طول الوقت و متثبت على صوره العربيه و امكانيه لفها 360 درجه علشان اشوفها من كل الزوايا و حاولت على اد ما اقدر انى احاكى الشكل الاصلى و كانت مهمه صعبه لانى للاسف ما اديلكمش اماره فى اى ماركه عربيه خااالص و لازم اسأل حد معايا عن ماركه اى عربيه معديه هى ايه دى او نوعها ايه و يعنى سعرها يطلع بكام كده يعنى... من الاخر عندى جهل تااام بالعربيات رغم انى بسوق مثلا من 6 سنين الا ان اخرى عربيتى حبيبتى 127

اصيله و الله...ههههههه

المهم التورته اتعملت و نالت اعجاب عمر باشا و كل المدعوين... و عقبال كل سنه يا عمر ..انت تعقدنا بعربياتك و انا اجرب ايدى فى كل الماركات و اهى منها ثقافه برضه.....هههههه

و كل سنه و انت طيب و مؤدب و شاطر و حلو و تسمع كلام ماما على طوووووووووول "فاكرين انتوا طبعا برامج الاطفال العتيقه و المقولات المأثوره بتاعتها"" هيييه كانت ايام !! القناه الاولى و التانيه من امامكم و الملل من وراءكم فكنا بنستسلم و ليس لنا خيار اخر :)))

هسيبكم مع الصور يا حلوييين.....

و العجله اهه يا عم كمان منفوخه و متظبطه على الاخر...:))))

yassinmalika@gmail.com (Chahira Daoud) — Tue, 18 Aug 2009 21:53:00 +0000

خارج الخدمه
خارج الخدمه
خارج الخدمه

عيد ميلاد يشار و محمد ..لا محمد و بعدين يشار !!

yassinmalika@gmail.com (Chahira Daoud) — Fri, 17 Jul 2009 19:15:00 +0000

ميكى و مينى فى نزهه خلويه و المكان...نقول فى حدائق المنتزه.....!!!

مينى بتخرج مع ميكى علشان بتحبه و فاكره انه هيجوزها !!!

بس فى الحقيقه ميكى مش بتاع جواااز خاالص و فيه ميت الف حاجه فى دماغه..يعنى ميكى بتاع خروج و بس....

مينى مش مستوعبه الفكره دى و لسه بتحبه و هتفضل تحبه..بس لحد امتى؟؟؟ لازم الصابونه هو اللى يديهالها......لازم فيها عرق مصرى !!!

ميكى مفيش فى دماغه غير حاجه واحده بس و كلنا عارفينها و هى...عينيها مغميه و مش شايفه حاجه غير انها برضه بتحبه !!!

جاتها خيبه..بصوا بتبص له بهبل ازاى؟؟؟.... مينى يا حبيبتى ...ميكى مش سرحان فيكى ده بيفكر ازاى يلاقى " الموسكاداة الغامضه" يعنى من الاخر ميكى مقضيها موسكاداوات......

فهمتوا حاجه ..اتفرجوا على ديزنى شانيل و انتوا تفهموا و تقدروا حجم المأساه

ده صنف حادق لزوم العيد ميلاد و اسمه كاسادييلو...ايطالى يا مرسى و محشى سلامى و جبنه شيدر.

اه عاجبانى الارضيه حبيت افرجهالكم !!

أول حاجه هتتسائلوا يعنى ايه يشار و ده السؤال اللى سألته لمامتهم بعد ما عملت التورته طبعا ..لأن مامتهم طلبت التورته قبلها بيومين و لما اعترضت.....قالت لى ايه يا شهيره؟؟؟ ..دى تورته!! و كأنى اضربها فى الخلاط و تطلع تورته...هههه و بما انها صاحبتى فى المدرسه يعنى معرفه كده ييجى من.....سنه علشان بس ما تعدوش ورايا..مارضيتش اكح معاها و توكلت على الله !!

مامتهم كانت معايا فى نفس المدرسه و فى نفس الفصل يعنى ابو زمل فطبعا ماقدرتش اكح معاها ..بس اعلنت الطوارئ و طبقت 48 ساعة و انا صاحيه..علشان انجز المهمه لأن كان فى تورته تانيه كمان.

تورته محمد و يشار او يشار و محمد من احلى التورت اللى عملتها و انا شخصيا عاجبانى رغم انى صعب ارضى عن حاجت و اللى عجبنى فيها ان الكاراكتر طلعوا بالضبط الكراكترز الاصليين و الاهم انى عملتهم بدون اى استعانه بكتب او اى ماده علميه لان كتاب علشان يتعمل و يعلم فيه طرق كراكترز شخصيات ديزنى لازم تكون شركة ديزنى تحديدا هى اللى عاملاه و الا يصبح تعدى على الملكيه الفكريه ليهم مش السطه اللى عندنا و اللى مخليانى اتردد الف مره من اصدار كتاب و ده لانى عارفه مصيره هو التداول المجانى على الانترنت و تضيع حقوق الناس اللى طلع بوزها علشان تعمله..المهم خلينا فى العيد ميلاد ..يشار يعنى يحى او عائشه باللغه التركيه..يالا اتثقفوا بقه.. ...كل سنه و محمد و يشار طيبين و عقبال تورتة الفرح!!!

....................................................................................................................................................................................................................................................................

طيب خلاصة القصه يا حلوين و السؤال اللى بيطرح نفسه ..هل مامت مينى كانت عارفه انها خارجه مع ميكى و الا العمليه كلها فى الخباثه و انا بالصور الخطيره دى أكون عكيت الدنيا ؟؟؟؟؟؟؟

أستر يا رب....

أنا مش قصدى غير كل خير والله !!!

أه أنا قلت تورته تانيه...ثانيه واحده أجيبها و أجى ماتمشوش يا حلوين.....

بس خلاص !!!

كل سنه و انتى طيبه يا جنا !!

yassinmalika@gmail.com (Chahira Daoud) — Fri, 17 Jul 2009 18:56:00 +0000

عيد ميلاد جنا...

مامة جنا كانت عايزة تورتة كريمه و كمان كاب كيك شوكولا بالفوندان مخصوص علشان جنا...

و حبيت اشارككم بالصور و حبيت مخصوص اهنى جنا الصغيره جدا بعيد ميلادها .

تحدى يونيو لوليمه...يالا بينا !!

yassinmalika@gmail.com (Chahira Daoud) — Fri, 03 Jul 2009 17:12:00 +0000

تحدى الشهر ده قصدى اللى كان ده ...متأخره يومين بقه و مش طايقه نفسى..يالا سماح النوبه.

تحدى الشهر كان عن البحرين..و طبعا احنا احتفالنا بيبقى بطبق...طبق المره دى كان سمك..هو فى الحقيقه كان فيه اختيارين..طبق سمك و طبق تانى اسمه خبيصه..الصراحه و رغم جرأتى فى خوض تجارب مطبخيه جديده الا انى مش عايزة اعمل الخبيصه و لو فى حد يقدر يقنعنى بالعكس فليبدأ بالمحاوله و انا اسيب له نفسى خاااالص ....هههه ...خبيصه يا جماعه ..دى مش اى حاجه ...

المهم عملت طبق السمك و كان حلو بس اللى غاظنى فيه و اللى بيغيظنى فى اى مطبخ هندى او ايرانى هو احتقارهم للملح و الفلفل ..معرفش ليه..يعنى يولعوا الدنيا ب ييجى خمسين نوع تابل و ييجوا عند الملح و الفلفل ..لا طب بلاش الفلفل ..الملح يا جماااعه ؟؟ فين الملح؟؟؟

المهم الطبق المره دى طبقى يعنى طبقى و انا حرة فيه ..طبقى أغسله و أكويه..فطبعا حطيت ملح و لزوم الانحراف كمان حطيت فلفل ..بس ابيض علشان ماحدش يا خد باله...ششششش ..سر ..ماشى؟؟

من الكلام كده و الخلاصه عايزة اقول ان المطبخ البحرينى و بحكم موقعه متأثر كتيير بالمطبخ الهندى و الفارسى و مطبخ منطقة الخليج العربى ببهاراته و توابله المشهورة !!

وصفة السمك...

المقادير:-

1 م.ص من الكركم

2 م.ك زيت نباتى

1كيلو سمك فيليه..انا اخترت سمك لوت من ولاد عم الوقار كده

2 وحدة فلفل اخضر حار او ممكن حلو زى ما تحبه

1 م.ك من الجنزبيل الطازج

4 فصوص توم

2 حبه بصل

2 حبة طماطم

1و نص م.ص مسطرده

مرقه سمك او ماء فقط حوالى 2 كوب

الطريقه:-

نخلط الكركم مع الزيت و نتبل بيه السمك طبعا فى هذه اللحظه الحاسمه اضفت الملح و الفلفل فى الخباثة و من غير ما حد يشوفنى من الاخوة اهل البحرين..ههه

حطيتهم فى طاجن و دخلته الفرن على حراره عاليه علشان يتحمر و فى هذه الاثناء..ضربت باقى المكونات فى الخلاط.. و فى طاسه و بملعقه زيت كثفتهم لحد ما بقوا زى الصوص التقيل شويه ..حطيتهم على السمك و سيبته يكمل سوى, بس خلاص...قدمت الاكله مع الرز البسمتى بالشبت و السلطه الخضراء كمان .

و بالهنا و الشفا... جربوها و لن تندموا .

استنونى الشهر ده ..التحدى هيبقى من المطبخ المصرى.. و هنولع فى البلوجات بتاعة وليمه كلها باذن الله ......هههههه

يا ترى عندكم اقتراحات ايه؟؟؟؟؟

نديها كشرى و الا ممبار و الا كوارع و الا محشى و الا فته و الا مسقعه و الا بصاره

دبرنى يا وزييييير !!!!

أشوفكم على خير ان شاء الله مع يوم مصر الشهر القادم .

علاء الدين و المصباح السحرى !!

yassinmalika@gmail.com (Chahira Daoud) — Fri, 26 Jun 2009 16:09:00 +0000

علاء الدين و المصباح السحرى !! بس خلاص !!

بسسسسسس خلااااااااااااااص !!!

قصة الأمير الضفدع !! مين عارفها؟؟؟

yassinmalika@gmail.com (Chahira Daoud) — Fri, 19 Jun 2009 20:15:00 +0000

The Princess and Frog

There was once a princess who had a golden ball. She loved to play with her ball near a pool in the garden.في قديم الزمان كانت هناك أميرة لديها كرة ذهبية تحب أن تلعب بها قرب بحيرة الحديقة.One day, the ball bounced into the pool and sank in to the bottom. She started to cry.في احد الأيام تدحرجت الكرة إلى البحيرة و غرقت إلى أسفل و أصبحت الأميرة تبكي.Suddenly, she heard a voice saying, "why are you crying, dear princess? " she look up and saw ugly frog.فجأة سمعت صوتا يناديها لماذا تبكي أيتها الأميرة ؟! فلتفتت الأميرة لتجد أن الذي يخاطبها لم يكن الا ضفدعا قبيحا .She told hem about her ball. The frog said, "I can get it for you if you grant me my wish."روت الأميرة للضفدع سبب حزنها فقال: لها الضفدع سيحضر لها الكرة إن هيحققت له أمنية."What do you want from me?" she ask, "my jewels or my crown?"سالت الأميرة: ماذا تريد مني هل تريد مجوهراتي ؟ أم تاجي الذهبي ؟"No dear princess," said the frog, "I only ask you that you let me eat with you and sleep in your bed."اجب الضفدع لا أيتها الأميرة كل ما اريدة أن تدعيني أكل معك و أن أنام في فراشك.The princess thought the frog was joking, so she said, "Yes, I promise."ظنت الأميرة أن الضفدع يمزح معها فأجابت : نعم أعدك بذلكThe frog dived into the water and soon come up with the golden ball. The princess it and ran a way.غطس الضفدع في البحيرة وسرعان ما عاد بالكرة الذهبية. أخذت الأميرة الكرة وفرت هاربة.The frog called out, "Wait, take me whit you!" She did not even look back at him.صاح الضفدع: انتظري خذيني معك؟ ولكنها لم تلتفت إلى الوراء! .That evening, when she was having dinner with her father, there was a knock at the door. She opened the door and there was the frog!وفي المساء عندما كانت تتناول العشاء مع والدها سمعت طرقا على الباب. فتحت الباب فإذا بها تجد الضفدع !!.She quickly shut the door but the king asked about the visitor. She had to tell him what happened that.أغلقت الباب بسرعة , ولكن والدها الملك تساءل عن الضيف فاضطرت لاخبارة بماحدث لها ذلك اليوم! ."You must keep your promise," said her father. "Let him in."فقال لها والدها: عليك أن تحفظي وعدك ! و ادخليه إلى الداخل .The frog followed her to the table and ate from plate!تبعها الضفدع إلى الطاولة و أكل من طبقها .After that, she took him to her bed. As he touched the pillow, he changed into a prince!بعد ذلك أخذته إلى فراشها و ما أن لمس الوسادة حتى تحول الضفدع إلى أمير وسيم الشكل! .He said an evil which had cast a spell on him; witch only a king*s daughter could break granting him his wish.واخبرها أن ساحرا قد سحرة على هيئة ضفدع وانه يمكن لابنة الملك أن تعيده إلى حالته أن هي حققت له امنيتة.He ask her to marry him and they lived happily ever after.طلب منها الأمير أن تتزوجه فوافقت وعاشا في سعادة و هناء.

كل سنة و أحمد و سنا طيبين...و عقبال مئة سنه !!

كل سنه و انتى طيبه يا منه !!!

yassinmalika@gmail.com (Chahira Daoud) — Thu, 11 Jun 2009 21:37:00 +0000

تورته منه بنت تامر ...كل سنه و انتى طيبه يا منه.. و ربنا يتمم شفاكى على خير ,,,منه حبك معاها الجديرى يوم عيد ميلادها..يالا يا منه علقه تفوت و كلنا اخدنا الدور ده...كل سنه و انتى طيبه

Waffles , esp. For Nancy !!

yassinmalika@gmail.com (Chahira Daoud) — Sun, 07 Jun 2009 20:46:00 +0000

وصفة الوافلز اهداء لنانسى اللى صبرت معايا كتييير....معلش يا نانسى...أنا وحشه..يالا زغرطى بقه !!

انا عملت وصفتين الأولى اهه:-

المقادير:-

2 بيضه

نص كوب زيت نباتى او زبده مذابه

كوب و تلاته ارباع لبن

ملعقه كبيره سكر او ملعقتين حسب الرغبه

4 ملعقه صغيره من البيكنج باودر

ربع ملعقه صغيره ملح او اقل حسب الرغبه

الطريقه:-

يضرب البيض بالمضرب حتى نحصل على رغوه

تضاف باقى المقادير و تقلب حتى التجانس ...نبدأ نشتغل بيه او نستنى ساعتين ..أنا افضل الانتظار

تسخن ماكينة الوافلز حتى نرى النور الاخضر. و نصب الوافلز و نتركه 5 دقايق فى المكنه بتاعتنا هيطول شويه يا نانسى.

قدميه مع العسل أو المربى و الزبده او مع فروت سلاد او ايس كريم او حتى مع فسيخ لو حبيتى ...ههههه

ملحوظه خاصه بنانسى..علشان الدقيق بتاعنا و الجلوتين اللى فيه قدامك حل هو انك تقللى مقدار الدقيق اللى فى الوصفه يعنى هتنزليه لكوب و نص.. أو انك تستخدمى دقيق متعدد الاغراض العادى اللى فى السوق

او الدقيق بتاعنا كوب و نص و تحطى له ملعقه نشا.

يالا اعملى و و رينى الانتاج و ان حصل عطل هاجى اعمله بنفسى و اريحك و ارتاح و ترتاح البشريه كلها الى الأبد ...هههههه

و فى وصفه تانيه عند ليلى ..أنا جربتها و طلعت حلوة اوى ..ده لو بتحبى جوز الهند.... وصفة ليلى هنا

http://lailablogs.com/?p=823&lang=ar

بالتوفيق نانسى هاااانم !!

!! Boules au chocolat" A la mode de chez nous

yassinmalika@gmail.com (Chahira Daoud) — Sat, 06 Jun 2009 21:19:00 +0000

و لأن الخبازين و الطباخين ما بيرموش حاجه...كنت عامله كيكه اسفنجيه لتورته و ما عجبتنيش...فكرت و قلت هقلبها لبوول او شوكولا.

ولادى بيحبوه و لأنهم بيحبوا يطبخوا بس انا على طول مستعجله و مش فاضيه ..قررت انى اسلمهم زمام الامور.

كان عندى كريم جاناش و الكيكه و زودنا شوية بندق...بقولكم ايه...مليكه و يا سين هيشرحوا ليكم الباقى !!

فخورين جدا بالانتاج !!

اخر تورته...بمبى بمبى !!!

yassinmalika@gmail.com (Chahira Daoud) — Fri, 05 Jun 2009 21:48:00 +0000

تورتة هبه....

...هكمل بعدين علشان خلصانه !!

أول تحدى ل "وليمه " .. الى الجزائر..أربطوا الأحزمه !!

yassinmalika@gmail.com (Chahira Daoud) — Sat, 30 May 2009 01:19:00 +0000

قصينا الشريط و نسيت احط الشغل بتاعى..شفتوا التفانى.....

طبقى الدجاج بالزيتون :-

تأملوا الصوره و على أنغام الراى..مدوا ايدكم و قولوا بسم الله...طبق حلو بالزاااااااااااااف...

طبق الحلو:- سليلة العروس:-

و هنا شويه سليلات و زودت عليهم شويه قلوب لزوم الليله العرايسى على الألوانات البمبى المسخسخ و الفوشيا...مش عرايسى بقه...

جوزى اتصل بيا من الشغل و قاللى باين الجماعه بتوع الجزائر دول كان عندهم حق..الطبق طعمه حلو بجد..داق الصبح قبل ما يطلع على الشغل و ده لأن انتاجى دايما بيبقى وش الفجر.....صبرنى و صبره عليا يا رب !!

عيشوا شويه فى مووود الجزائر يا حلوين.....

تا تا تا تا....اليوم نقص الشرييييييييط !!!

yassinmalika@gmail.com (Chahira Daoud) — Fri, 29 May 2009 23:59:00 +0000

يا سلااااااااااااااام !!
اتفق العرب ..اه والله....اليوم هو التحدى الاول للمنظمه الاولى من نوعها....طفلنا الوليد.....!!!
"وليمه" أو "Walima" هى أول منظمه بتضم البلوجرز العرب أو المدونين العرب و كمان كل مدونين المطبخ المهتمين بالاكل العربى و الشرق أوسطى..
..بس استنوا مش أى مدونين لو سمحتم دول مدونين من مطابخهم...يعنى ناس من فصيلتى.. حلو اوى اننا نتلم على بعض... و الطيور على أشكالها تقع !!!
احنا مش بس هنحصر العضويه فى العرب لا احنا قلبنا كبيييير هيدخل اى حد مهتم بالأكل العربى و الشرق اوسطى يعنى بيحبنا و من قلبه كمان !!
ناس جامده بجد...
قررنا ان شهر مايو ندشن فيه أول تحدى للعصابه و هنمشى بترتيب هجائى للبلاد العربيه و علشان اللى متابعيننا فى الاوساط العالميه أغلبهم من الغرب فترتيبنا الهجائى هيكون غربى !!
يعنى هنبدأ ب الجزائر أو "Algeria"
و التحدى حضرته لنا سفيره الجزائر القمرايه...خديجه..
Our First Challenge is brought to us by Khadidja from http://www.dessert-world.blogspot.com/.

أول طبق كان حادق و الست كانت طيبه خيرتنا نطبق واحد من اتنين..الحلو او الحادق..انا بقه مفتريه فقلت اجرب مش هخسر حاجة و خاصه انى ما اكلتش جزائرى قبل كده.
الطبق الحادق كان دجاج بالزيتون:-
و وصفته اهه

This dish could be made with chicken or lamb or both. I personally mix the two meats in the same dishThis recipe has some added meat balls and this is optional. If not using both meats, keep the exact same recipe.Ingredients:1 whole chicken cut into pieces2 lbs of lamb1 large onion1 Tbsp butter or oil2 cups pitted green olives2 medium carrots, cut into circles1 tsp salt + 1/2 tsp cinnamon + 1/2 tsp black pepper1 chicken cubewater & parsleyMeat balls (optional)1/2 lb ground beef1 small onion1 small egg1/4 cup bread crumbs1/4 cup chopped parsley1/2 tsp salt1/4 tsp black pepper1/4 tsp cinnamonFlour to dredge the meat ballsTo thicken the sauce: 1 Tbsp soft butter + 2 tbsp flourDirection1) In a pot / pressure cooker put the butter /oil, chicken pieces, lamb pieces (if using), the onion, salt, pepper cinnamon. Cook over medium heat until the onionsare translucent. Add the chicken cube and enough water to cover the meat. Bring the mixture to a boil then cover and cook until the meat is tender. If using both meats, half way through cooking, remove the chicken pieces and continue to cook until the lamb is tender.2) In a sauce pan, put the olives and cover with water. Bring to a boil and let the olives boil for 3 to 5 mn. Drain and repeat the same process 2 to 3 times until the olives are no longer bitter.They should not be too salty neither. Set the olives aside.3) Prepare the meat balls: mix all the ingredients and make balls. Put about 1/2 in of oil in a frying pan and heat over medium heat. Dredge each meat ball in flour and fry until golden brown. Drain on a paper towel and set aside.4) Once the meat pieces are cooked, add the olives, the sliced carrots and the meat balls. Bring the sauce to a boil, cover the pot and cook until the carrots and the olives are tender, and the meat balls are cooked through.5)To finish the dish, mix the butter and flour to form a smooth paste. Bring the sauce to a boil and gradually add the butter/ flour mixture, stirring continuously. Let the sauce boil for 3 to 5 minutes. The sauce should be slightly thick. Add 2 tbsp chopped parsley. Serve the dish accompanied with lemon wedges

و الطبق التانى حلو يا حلوين و اسمه :" سليلة العروس"
و وصفته كمان هتلاقوها هنا...http://dessert-world.blogspot.com/2009/01/almonds-in-surprise.html
و هتشوفوا التطبيق ..يا سيدى على شغل الفنانه خديجه من الناس اللى بتعقدنى بجد..
يالا بقه على صور تطبيقى بس ما تضحكوش عليا......
الطعم كان خيااااال بالنسبه للطبقين و كانت فرصه جميله جدا اننا ندوق مطبخ جديد علينا....يالا انصحكم تجربوه و ما تقلقوووووش على ضمانتى الخاصه !!!!
قبل ما امشى عايزة اعرفكم بفريق وليمه الجامد...
أولا:- تونى طحان....شاب وسيييم مجتهد و طالب جامعى بأمريكا و لبنانى أصيل...هتحسوا بده من أطباقه و طبعا بدأت بيه باعتباره هو السيد الأول و الوحيد فى الجروب بس لسه حاطين عنينا على كام واحد و هنوقعهم يعنى هنوقعهم...هههههههه
بلوج تونى هنا:-

http://www.antoniotahhan.com/blog/
نيجى بعد كده لأرليت الحلوة...قمراية الجروب و الريسه الكبيييره أوى أوى و أرليت لبنانيه و عايشه فى الصقيع فى كندا...بس ست زى العسل و من أعز صديقاتى كمان...ست الستات كمان.
و بلوج أرليت اهه:-
http://www.phoeniciangourmet.blogspot.com/

نيجى بقه للحبوبه بتاعتنا.. و دى سمر هانم الجميله عمرى ما شفت حد لما تكلمه يشحنك بشحنة تفاؤل كفيله تخلى يومك مشرق و جميل و لو شفت فى اليوم ده بلاوى الدنيا ..سمر تخليهولك مشرق و سعيد و كمان بمبى...سمر ده اسمها و اسم موقعها "ميمى " ده على اسم حفيدتها ربنا يبارك لها فيها , سمر من الاردن بس رحاااله زى عم أبو بطوطه بالضبط و بتمووووت فى حاجه اسمها تصوير الأفلام و وصفاتها اغلبها ان ماكانش كلها مصورة
و بلوج سمر هنا:-
http://mimicooks.com/

طيب الدور على مين على الحلوة صديقتى الصدوقه نسرين و هى سوريه أو اليمان زى ما كتير عارفها..نسرين بقه مش هقدر اقول حاجه عنها غير اننا اصبحنا "لا نفترق" هى فى دبى و أنا فى مصر....و لكن لا نفترق...اعرفوا بقه مدى توثق العلاقه الطيبه بيننا...حبيبتى يا نوسه !!
بلوج نوسه هنا:-
http://alyaman2002.blogspot.com/

اللى بعده بقه سوسو القمورة..والله قمورة بجد...و بتحب تنزل الوصفات صوت و صوره و كمان بتكتب الوصفه بالنجليزى و الفرنساوى علشان تحل الازمه..أنا تعرضت لها بس ما عالجتهاش لأن اخواننا الفرنساويين اشتكوا لى انهم عايزين اترجم و أنا وقتى فى الدمار..سوسو بقى يا جدعان ريحت كل الاطراف و اللى مش بيعرف يقرا يشوف الوصفه على اليوتيوب و عندها كمان فى البلوج...مجهود جبار و تفانى لتوصيل المعلومه و كرم غير معقول.
بلوج سوسو اهه:-
http://sousoukitchen.blogspot.com/

و بلوج تريا المغربيه العسووووله..فى شعوب تبقى واخد فكره عنهم و لما تشوف ناس منهم تتصدم..تريا من المغرب و انا بقه طول عمرى احس ان اهل المغرب دول ولاد ناس و لما عرفت تريا زودت عندى الفكره دول مش بس ولاد نا دول بشوااات و هواااانم كمان.
بلوج تريا اسمه جهينه معرفش ليه...هى بقه تبقى تقول لنا
http://jouhayna.canalblog.com/

نيجى بقه للجامده اوى.. و هى مضيفه الحدث هذا الشهى و هى خديجه...كله تعظيم سلام..خديجه لما تزوروا بلوجها هتتعقدوا..قمه فى الفن فن الباتيسيرى و فن التصوير..عبقريه بجد و بيربط بينى و ما بينها قاسم مشترك..احنا الاتنين دارسين اقتصاد بس عشقنا الاول و الاخير هو الطبخ و الخبز و كتب المطبخ...مره اتكلمت خديجه و قالت انها ماكانتش زى البنات اللى بيحلموا بالمجوهرات و الموضه كل اللى بتفكر فيه هو ده...حسيت وقتها ان انا اللى بتكلم
بلوج خديجه العبقرى هنا...
http://dessert-world.blogspot.com/

و كمان سوسكا الحلوة اللى اسمها على اسم مامتى"ادينى قلت كده اسم مامتى الدلع"...يا كسوووفى..سوسكا البلوج بتاعها حلو اوى و هتلاقوه هنا
http://souska.canalblog.com/

و دى بقى العبقريه اللى ضبطت لنا اللوجو و خدمت الجروب الوليد باخلاص..
و بلوجها من احلى البلوجات كمان..
http://hommuswtabbouli.blogspot.com/

و كمان نور الجميله..عملت لنا مأوى نتلم فيه..منتدى محترم..كتر خيرك يا نور..
بلوجها اهه:-
http://themiddleeasterncook.blogspot.com/
و طبعا حبايبنا كتااااااااااااار جدا جدا منهم
http://yumeezy.blogspot.com/
و كمان
http://culinaryinfatuation.blogspot.com/
و كمان
http://amour-des-saveurs.over-blog.com/
و كمان
http://www.tasteofbeirut.com/
و كمان
http://lailablogs.com/
و كمان
http://bbacuisine.canalblog.com/
و كمان بلوج المدعوه شهيره بس بالعنجليزى ده لأنكم قاعدين فى العربى حاليا
http://www.chahirakitchen.blogspot.com/

و الله كلهم احبابى و لو نسيت حد اعذرونى..كلهم اكلهم حلو اوى و بلوجاتهم لذيذه و حتى اللى ما تكلمتش عنه كتير فده لأنى حديثه العهد بيهم و مازرتش بلوجاتهم لانشغالى بس والله بحبهم كلهم علشان احنا جروب واحد و لسه هنكبر و هنكبر.
و للجروب الهايل ده اهدى لهم أولا هذه الأغنيه....
" كل شويه نكبر
نكبر حبه حبه
نكبر أد الحبه
حبة القمحايه
و السنه اللى جايه
هنزود شمعايه
على راس التورتايه"
بس خلااااص

تورتة بابا نانسى !!

yassinmalika@gmail.com (Chahira Daoud) — Fri, 29 May 2009 16:23:00 +0000

الا قوللى ده البحر الأحمر و الا الأبيض؟؟؟

ايه بس الدماغ العاليه دى..مش متخيله ابدا انى أقعد القعده دى و قال ايه.."بصطاد"....!!

نحضر الشوايه يا عمو....أنا شايفه فيه بوادر اهه طالعه...

قعده بمليون جنيه.....اهداء لكل محبى الصيد...

- خلصت فى يومين..!!

- ماكانش عندى معلومات عن صاحب العيد ميلاد غير انه بابا صاحبتى من ايام المدرسه, تختوخ "شويه", بيحب الصيد...!!!

- مش قادره اقول و لا كلمه زياده لأنى همووووت من التعب...أفوق و هرجع تانى....!!

يا رب تعجبكم ....بس نانسى كانت عندها حالة فزع من الفرحه !!! بالهنا و الشفا و كل سنه و عمو نبيل بألف خير !!!

علا.....تلميذتى النجيبه !!

yassinmalika@gmail.com (Chahira Daoud) — Mon, 25 May 2009 22:59:00 +0000

علا ...تلميذه نجيبه من تلاميذ مدرسة الطهى و الخبز...علا من نوعية البنات اللى ماما بتحب تسميهم "اخر البنات المحترمين"!!
صعب اننا نلاقى بنت بالتميز ده اليومين دول !!
علا معيده فى كلية تربيه و بدأت معايا الكورسات يمكن من حوالى 3 شهور و قربت تقريبا تخلص بس لسه عندها شراهه غير طبيعيه للتعلم "بتفكرنى بواحده صاحبتى ما تعرفوهاش" !!
أخدت كورس الهاى تى و دخلت على المخبوزات و خلصت الكرواسون و دلوقتى شغاله فى كورس الطهى..شاطره و دؤوبه و "تعمل فى صمت" يعنى اثناء المحاضرات هااااااديه بس ايه اول ما تروح تشمر و تدخل على التطبيق و تعمل كل واجباتها على اكمل وجه ..يا ريت كل البنات يبقوا حتى نصها.
دى صور لبعض تطبيقاتها...لسه فى كتير بس أنا اليومين دول...مشغووووله
عندى تحضير لتحدى الديرينج بيكرز و كمان اول تحدى ل" وليمه" و ده الحدث الاهم بالنسبه لى باعتبار ان "وليمه" طفلنا الجديد و "أول منظمه عربيه بحق و حقيق"!!
ده غير كورسات الطهى و الخبز اللى مخليانى مش قادره ارمش.
اسفه لكل حد بيحبنى و بيحب يقرا المدونه انى تأخرت بس يومين و هتشوفوا الجديد اللى كان شاغلنى.
نرجع لعلا...يا ريت تصفيق حاد !!!
ست البنات والله !!
أشوفكم على خير قريباااااا ان شاء الله !!

أكل الخيار برضه..له ناااسه !!!

yassinmalika@gmail.com (Chahira Daoud) — Sat, 16 May 2009 00:09:00 +0000

يا سيييدى..مش أى حد ياكل خيار..اكل الخيار ده فن و ذوق...تأملوا !!. يمكن تغيروا طريقتكم القديمه !!!

الكرواسون و سنينه !!!

yassinmalika@gmail.com (Chahira Daoud) — Fri, 15 May 2009 22:16:00 +0000

أه والله..زى ما بقولكم كده !!!

نزولا على رغبة الجماهير من التلامذة تبعى ..نظمت و لأول مرة دورة للكرواسون..و طبعا كنت عارفه العواقب الوخيمه!!

عمل الكرواسون ده علم و مش اى علم ده كمان هندسه يعنى لما قلت للمتدربات ان احنا هنشتغل بمسطره طولها متر ما كانوش مصدقين لحد ما شافوا بنفسهم !!

و كانت تحدى ليا و ليهم..ليا علشان اقدر اوصلهم خلال يومين مراحل اعداده من طقطق لسلام عليكم و ده ترتب عليه انى كان لازم اعمل 4 نسخ من العجينه علشان يشوفوا و يلمسوا كل خطوة اثناء المحاضره من غير ما يضطروا يستنوا فترات الانتظار الشهيره للكرواسون و هى 4 فترات !!

و تحدى ليهم ..عارفين ليه..فى الأول كان شرط اساسى ان اللى يتقدم للدوره يكون درس دوره المخبوزات اولا و ده طبعا علشان يكونوا اتعودوا على اللت و العجن و شربوا تكنيك الخبز و التخمير كويس و بعد كده يبقوا يفكروا يعملوا كرواسون..المهم و اللى كان حلو اوى ان كان لازم ياخدوا المحاضره و يروحوا يطبقوا فى البيت ..الأحلى يا جماعه انهم كلهم "هديل - بسنت- نانسى و كمان علا" عملوا الكرواسون و بنجاح منقطع النظير..كرواسون بتاع بلده صحيح ..و عارفين المفاجأة ان نسرين او اليمان اخدت الدورة اونلاين و عملت الكرواسون و طلع فى نفس الوقت اللى كنا بنطلعه احنا من الفرن فى مصر و نسرين شغاله معانا و من دبى.بجد أنا فخورة بيكم جدا جدا جدا.

...المهم هما مشيوا و انا اتدبست فى اربع عجاين..بس فى الاخر و على رأى المثل "صبرت و نلت" عمرت الديب فريزر بتاعى بأحلى كرواسون و كمان دانش و كمان باتيه بالشوكولا !!

يالا على الصور..دى صوره الانتاج يوم الدوره.

و دى صورة كرواسون نسرين او اليمان..

يا سلام يا نسرين يا فنانه...تسلم ايدك حبيبتى..تحيه لأحلى سوريه !!

و على ما باقى البنات يبعتوا صورهم ""أنا مستنيه يا حلوين ..حاطه ايدى على خدى و مستنيه""

برافوبجد ,,بجد برافو!!!

تحدى ال DB الرابع..مهرجان التشيز كيك !!!

yassinmalika@gmail.com (Chahira Daoud) — Fri, 15 May 2009 21:49:00 +0000

بالنسبه ليا كان فعلا مهرجان...كان التحدى اننا نعمل تشيز كيك و اللى عايز يبدع هيبدع.

وسعت معايا....اولا عملت بسكويت التشيز كيك فى البيت. و الحلو فى البسكويت ده ان كله معمول من الدقيق الاسمر بس طبعا مقدار الزبده مش قليل !!

ثانيا عملت 3 اصناف من التشيز كيك الأولى كانت بالكركرديه و مربى الورد. و التشيز كيك كانت طبقتين الاولى بنكهة الفانيليا و التانيه نكهتها بماء الورد و الكركديه و التوبينج كان مربى ورد و كركديه و كل ده يا جماعه علشان اكون استخدمت مكون من بلدنا الجميله و هو الكركديه و اعمل حاجه مختلفه عن كل الديرينج بيكرز التانيين بس المضحك بقه ان فى اخر لحظه و قبل تسليم التحدى لقيت واحده من سنغافوره عملت برضه بالكركديه..اه أموت و اعرف جالها الكركديه منين؟؟؟؟ههههه,, عموما مربى الورد هى اللى فرقت.

الصنف التانى كان تشيز كيك 3 طبقات.الأولى فانيليا و التانيه موكا و التالته شيكولاته سوداء, و التوبينج يا كتاكيت كان عبارة عن جاناش شوكولا و صوص باتر سكوتش و فوق ضحيت بشوية المكاديميا اللى عندى..و المكاديميا نوع من المكسرات غااااالى جدا..غالى بعبط يعنى ..عارفين السبب ايه؟ انه محتاج خبراء علشان يفصلوا الثمره عن القشرة الخارجيه دون ان يتضرر قلب حبة المكاديميا..شفتوا بقه الهنا اللى احنا فيه.

طيب الصنف التالت كان ايه..كان تشيز كيك عادى خالص بس على الوش حطيت كريمه جوز الهند و فاكهه من كل نوع..تديكم انطباع انكم قاعدين على احدى شواطئ شرق اسيا و كام قرد كده بيتنطط حواليكم..هههه..الفاكهه كانت بشمله.نكتارين و موز و فراوله .

الوصفه بالتفصيل هتلاقوها هنا....

http://chahirakitchen.blogspot.com/2009/04/cheese-cake-festival-4th-db-challenge.html

و لو فى حد مزنوق فى ترجمة حاجه يقوللى و انا ان شاء الله هحاول اساعد.

كل تحدى و كلكم و كل الديرينج بيكرز طيبين !!

و الى تحدى جديد ان شاء الله !!

استدراك:- طلع فى حد مزنوق فى الانجليزى هنزل الترجمه الفوريه و أمرى الى الله.

لطبقة الكراست:-

2 كوب بسكويت مطحون-120 جرام زبده- 2م.ك سكر بودرة و فانيليا.

تخلط المقادير دى مع بعضها كويس و يتم كبسها فى قاع صينية التشيز كيك كويس جدا.

لطبقه التشيز كيك:-

750 جرام جبنه كريمه بدرجة حرارة الغرفه

كوب سكر بودرة

3 بيضات

1 كوب كريمه لبانى

2 ملعقه كبيره من عصير اليمون

فانيليا حسب الرغبه

تضرب الجبن مع السكر جيد ثم نقوم باضافة بيضه بيضه للمزيج مع الضرب جيدا بين كل اضافه و التانيه.

نقوم باضافة كوب الكريمه مع المنكهات و المتمثله فى الليمون و الفانيليا.

يمكن استخدام نصف المقار للتشيز كيك بس الكراست ثابت. لأن الجماعه الامريكان مفتريين و عندهم الكريم تشيز ببلاش فبيفتروا و يحطوا براحتهم ..كمان بتبقى دسمه جدا لذا انصح باستخدام نص المقدار مع الحفاظ على نفس مقدار الطبقه السفلى.

تطهى فى حمام مائى على درجة حرارة 180 ..كمان انتبهوا الى عدم الافراط فى التقليب.. و شكرااا و أى خدمه !!

تجربتى مع قناة فتافيت !!! مع فتافيت الحياه مش احلى و لا حاجه !!

yassinmalika@gmail.com (Chahira Daoud) — Mon, 04 May 2009 15:34:00 +0000

Hello guys, I am not going to talk in english, I will write to you my story with Fatafeat in arabic

, I'll express better in arabic how this experience "star chef" was fake and hurted all these kind people who joined it !أنا اسمى شهيره داود,مجنونه بالخبز و الطهى و علمت نفسى بنفسى و اشتغلت على حالى من 15 سنه من ايام ما كنت فى الكليه..و علمت نفسى من خلال شراء امهات الكتب اللى بتدرس فى المدارس الفندقيه باوروبا و امريكا لحد ما بقيت الى حد كبير عندى ثقه انى ابدأ ادرس هذا العلم.

انا حبيت ده علشان كده اشتغلت بحب و ليالى كتييير قضيتها فى تجارب ..دلوقتى كمان ليا وصفاتى الخاصه..المهم الناس اللى حواليا شافوا الاعلان اللى على فتافيت و قالوا لى ليه ما تقدميش ..انتى كفء.. و لو انتى ما قدمتيش مين هيقدم..المهم قدمت عن طريق الانترنت و نسيت الموضوع .انا بطبعى شخصيه هاديه و بحب اشتغل اكتر من انى مجرد استعرض او اشتغل مذيعه..

و نسيت الموضوع لكن لقيت القناه بتتصل بيا و بتطلب منى انى ابعت و بسرعه لانهم كتيير مهتمين..قلت لهم انا محجبه "لابسه ايشارب" و ما اعتقدش انكم هتقبلونى.قالوا لى لا احنا بنعطى فرص متكافئه للجميع..قلت حلو ..كنت وقتها فى نايل كروز ..فى اسوان..قلت لهم انا مش فى البيت قالوا ادخلى المطعم فى الباخره و اطبخى اى حاجه و ابعتى...رجعت البيت بسرعه و حسيت فى لحظه ان تعبى و خبرتى طول السنين اللى فاتت ربنا هيجازينى عليها و اقدر اشتغل و اوصل علمى اللى بحبه لناااس كتيير كمان بتحبنىرحت و خليت جوزى يصورنى رغم ان عمرنا ما صورنا افلام و لا الكلام ده و بعت الشريطه و يالا بسرعه مافيش وقت.

و يا سلاام على الفرحه لما تم اختيارى..و دخلنا التصويت و طبعا كنت اتكسف انى اقول لحد صوت لى حتى انى استغربت ازاى تم اختيارى و مش عارفه برضه مين صوت لى بس ناس صحابى عملوا جروب باسمى على الفيس بووك حتى انا ما شفتهوش الا مؤخرا لما دخلت هذا العالم.

و طلعت من التوب 20 و يا سلام على الفرحه و كانت دارين بتعلق على فقرتى و تقول "شهيره الخبيرة" و بقت لازمه .. و لادى كانوا بيهذروا معايا و سمونى شهيره الخبيره..و اتعرفت على غادة التالى ..شخصيه لذيذه جدا و من الناس اللى اتصعدوا للتوب 10 و فرحت لها كتييير اولا لانها تستحق و انا ما زعلتش خاالص على نفسى لسبب هو انى ما حضرتش كويس او حتى لو كنت حضرت كويس كان هيحصل ايه يعنى؟؟

و فضلنا متابعين مع غاده و لا جديد و لحد دلوقتى لا جديد حتى غاده حاولت تتصل بيهم مرااات كتييير ما عبروهاش و كانهم ما يعرفوهاش..اما انا و حالى حال ال20 كلنا مضينا عقود احتكار لمدة سنه و وجهونى البعض الى عرض من احدى القنوات الغلبانه الفضائيه و اتصلت بيهم فى فتافيت علشان اسألهم الموقف القانونى ..مطوحونى شمال و يمين و دفعت مكالمات لدبى على الفاضى و دارين مش راضيه ترد ....

المهم قلت انا هرمى الموضوع ده ورا ظهرى و اركز فى شغلى بلا مذيعه بلا هبل...و انشأت قناتى الخاصه...ههههه...ايوه عملت 2 بلوج "الله يستر شركة جوجل" واحد بالانجليزى و واحد بالعربى و اشتركت فى مواقع انجليزيه و فرنسيه للهواه و المحترفين اللى بجد ..نظمنا احداث و تحديات و مباريات و قضيت وقت جميل مع ناس من كل الجنسيات و كل الملل..و بيجمعنا حب واحد و عشق واحد و بدأت اكتب فى منتدى لكى و الحسنه الوحيده من تجربه فتافيت هو انى اتعرفت باسم شهيره الخبيره

حابه اعرفكم على البلوجات بتاعتى:-

.http://chahirakitchen.blogspot.com/و ده انجليزى يا مرسىhttp://chahiraelkhabira.blogspot.com/و ده عربى و كمان ليا بلوج خاص على اضخم موقع للخبيز فى العالم و هو هناhttp://www.thefreshloaf.com/blog/chahira-daoudو عند الناس دى فعلا هتحس فعلا بتكافؤ الفرص لا فى كوسه و لا محسوبيه و الناس بتبص لشغلك قبل ما تبص عليك انت مين و معاك كام و هتدفع اد ايه..و بعيد عن كل الدوشه دى بدى كورسات فى اسكندريه و بطبخ و بخبز كل يوم و باكل كل الناس اللى بحبهم...و

بشكر دارين على لقب شهيره الخبيره و بشكرهم على التجربه و بشكر كمان الزمن و التطور اللى خلى فيه فيس بووك نقدر نتكلم فيه بحريه عن تجاربنا و نحاول نغير و نجمل حياتنا..بس ما كنتش اعتقد ان للاعلام وجه قبيح على الاقل فى مجتمعاتنا العربيه و ان لو تجربه زى كده حصلت بره اكيد هيكون فيه مساءله على الاقل مننا احنا المتفرجين.نسيت اقولكم ان اعظم و اكبر كاتب فى مجال الخبز و اعظم مدرس بجامعات امريكا لهذا العلم اختارنى و كأول عربيه و ليا الشرف انى اكون من ضمن فريق العمل اللى اختاره لاختبار وصفات كتابه الجديد

العمل كان تطوع الا انى تعرفت بشخص غايه فى الجمال و رغم من انه مشهووور جدا و اكثر شهره من ناااس كتير اوى الا ان رسائله لى كانت تولى اهتمام و عنايه فائقه بشخصى و بشغلى اللى كان بيعجبه بل و يدهشه فى كثير من الاوقات

دلوقت فتافيت عامله اعلان تانى و عايزة الناس الحلوة و اللى بتعرف تطبخ تبعت..ايه رأيكم ابعت و الا ما بعتش..هههههه...حكايه طويله بس ظريفه مش كده؟؟؟اسفه انى طولت عليكم بس كنت محتاجه افضفض مع حد و بما انى لما دخلت لقيتكم فاكرين و مش ناسيين ستار شيف ..و كمان بتتسائلوا و كان الارض انشقت و بلعت الناس اللى اشتركوا و كمان اللى صوتوا و شاركوا قلت من الذوق انى اوصل لكم الحقيقه و احكى تجربتى كاملة

بس عايزة اقلكم انى مبسوطه و كمان فخوره بالبلوجات بتاعتى و الخبر الحلو ان فى بعض الشركات الامريكيه بتفاوضنى أنا العبد الفقير علشان تحط اعلاناتها على البلوج بتاعى الغلبان مقابل فلوس هما صحيح حبه صغيرين بس مش بذمتكم حاجه تفرح؟؟؟

شهيره داود أو شهيره الخبيره .

لرواد و زباين بلوجى المحترمين ..هذا كان نص رسالتى على حائط جروب قناة فتافيت على الفيس بووك ..تقدروا تقولوا انها فضفضه لموضوع كان مضايقنى حته صغيره "بحجم السمسمه"..هههههه

حبيت بس اشارككم فيه !!!

Happy birthday ya Mariam !!

yassinmalika@gmail.com (Chahira Daoud) — Fri, 01 May 2009 17:10:00 +0000

كل سنه و انتى طيبه يا مريم و عقبال ما اعمل لك تورته الفرح بس ساعتها اسألوا عليا فى دار المسنين..ههههههه

مامت و بابا مريم كل سنه و انتوا طيبين و عقبال ما تشوفوها عروووسه.

حسنه هانم حرم حسن باشا شرفت يا بنات!!!!

yassinmalika@gmail.com (Chahira Daoud) — Tue, 21 Apr 2009 00:59:00 +0000

فرمان عثمانى عااااااجل !!!

حضرة حسنه هانم حرم حسن باشا شرفت ... كله يكون فى شرف استقبالها يا هوانم و يا بهوات...روزا هانم نزلت كفته من فترة اسمها حسن باشا... هذا الطبق اوحى لى بفكرة طبق تااانى!!! شوفوا الصورة و بعدين اقولكم عملتوا ازاى؟؟؟؟

ندخل على الطريقة:- اولا اللحمة انا حطيت نص كيلو لحمة و عليهم بصلة كبيرة + 2 بيضة +كوب الا ربع بقسماط و اضفت عليها صوص باربكيو و ملعقة صلصة. و عجنتها و فرشت قالب التارت اللى قاعدته متحركة بالفويل. و بدأت افرد اللحمة اللى اصبح كفته متماسكة على ارض القالب و جوانبه.. و بعدين حضرت البطاطس..البطاطس للحشو:- 1 كيلو بطاطس سلقتهم بقشرهم و بعدين هرستها يدوى و اضفت لها ملعقة كبيرة زبدة توم و 2 بيضة و ملح و فلفل و ملعقة مستردة.. و وضعتها فى كيس الحلوانى و عملت وردات و خبزت القالب بالفرن على نار متوسطة اميل للارتفاع...و فى الاخر شوحت شويه فلفل احمر فى قليل من زيت الزيتون و بعد ما طفيت النار اضفت 2 ملعقة بقدونس و رشيت الكل على قالب التارت بتاعى... و بس كده..بهدى الطبق ده لروزا هانم لأنها فعلا ست الهوانم و طبقها الجميل اوحى لى بفكرة الطبق ده اللى قعدنا ناكل فيه تلاته ايام ...قدمت الطبق ده مع سلطة بنجر و بسكويتس امريكى بالجبن الشيدر و صلطة خضراء..جربوه هيعجبكم جدا!!!

يالا على لانشون الفراخ!!!

yassinmalika@gmail.com (Chahira Daoud) — Tue, 21 Apr 2009 00:41:00 +0000

اللانشون اللى بنشتريه من السوق تقريبا مافيهوش لحمه سواء كانت فراخ او لحم بقرى..ده فيه هبااااااااااابه..على رأى مش عارفه مين..يعنى لحسة لحمه و الباقى خدااااع بصر و خداع لحاسة تذوق المستهلك المسكين....انا توصلت لطريقه لعمل شبيه للانشون الفراخ....هيعجبكم ..جربوه و ولادكم هيحبوه جدا..كمان العجيب انه لانشون فراخ و كمان معمول بالفراخ...ههههه
يالا على المقادير يا كتاكيت
نص كيلو صدور فراخ بصله كبيرة بيضه كبيرة كوب بقسماط 2 ملعقه كريمه لبانى توابل..قرفه ,قرنفل ,جنزبيل.فلفل ابيض.جوزة الطيب..و طبعا ملحطيب فيكى تنوعى ممكن ,اعشااب ..ممكن بابريكا ممكن مستطردة..حسب النكهه اللى بتحبيها ..اخترعى يا ستى نكهه خاصه بيكى و سجلى ليها براءة اختراع..ما المصانع كل يوم بتتحفنا بس الفرق انك لما تحطى اعشاب هتحطى اعشاب مش "طعم اعشاب مضاهى للطبيعه"...هكذا يكتبون على منتجاتهم و المستهلك الغلبان مش فاضى يقرأ ..بياكل و خلاص.طيب افرمى لحم الدجاج كويس و ضيفى عليه البصل و كله فى المفرمه و اديها و ابدئى ضيفى باقى المقادير لحد ما تتشكل عندك العجينه.شيليها من المفرمه..او الفوود بروسيسور.و انا هنا خلطت عليه شويه زيتون اسود...مفصص طبعا ماحدش يحطه ببذره...ههههههنشكل اسطوانه و نقفل عليها كويس بالفويل.نغلى حله ميه و نحط فيها مكعب مرقه بس للتنكيه مش اكتر و ننزل فيها القالب بتاعنا... و نتركه يستوى.بعد تلت ساعه او نص كل حاجه هتكون تمام.طيب ..بعد ما خلص سيبته يبرد كويس و قشرت الورقه من عليه...و حبيت اديله نكهه مدخنه....و ده علشان اقوم بالواجب معاكم رغم ان الطبيب محذرنى لأنى يا حلوين مريضه بالربو و الحساسيه..يعنى اى صنف حساسيه تلاقوه عندى.. و الدكاتره بيقولولى :انتى كل المنهج اللى خدناه فى الكليه...هههه يالا بلاش رغى...المهم حضرت عده التدخين...فى صينيه اى صينيه...افرشى فويل و حطى عليه..شويه شاى و سكر و قرفه خشب و ملعقه عسل اسود..و حطيت شبكه و حطيت عليها اسطوانه الانشون..و غطيتها بفويل و ولعت النارو عينكم ما تشوف الا النور هتشوفوا بث حى دلوقتى...عادى يا بنات ..بس لا انصح ضعاف القلوب و ضعاف الصدور بخوض تلك التجربه...طبعا اخد قالب اللانشون لون جميل و ريحه مدخنه حلوة... و بس خلاص ,,,شيليه فى التلاجه و قطعى و اعملى سندوتشات و ابقى ادعيلى و فهمى عيالك أو كل حبايبك اللى هيدوقوه ان ده هو اللانشون و ان اللى بيعمله المصنع "ضحك على الدقون"...ابقوا اسألوا عليا فقد اتعرض للاغتيال فى أى لحظه.....الحقووووووووووووووونى!!!!!يالا على الصور

يالا مين هيتطوع و يعمل السندوتشااااااااات...اه يااااانى....و أشوفكم المره اللى جايه يا حلوين...استنووووووونى و ما تمشووووش...بنات ان شاء الله ارد اكيد على اسئلتكم بخصوص الجبنه...بس اروح اخد البخاخه...ههههههه

ملحوظه هاااااامه....أرجو الحفاظ على حقوق الملكيه الفكريه....

التلاجه من غير بسطرمه مالهاش لازمه !!! صح و لا لا؟؟؟

yassinmalika@gmail.com (Chahira Daoud) — Tue, 21 Apr 2009 00:26:00 +0000

طيب يا كتاكيت هنبدأ فى البسطرمه بس قبل ما ندخل عايزاكو برضه تطلعوا على موضوع ام مريم العراقيه بمنتدى لكى و اللى اتكلمت باستفاضه عن الجبنه ..موضوع فعلا قيم و لو افردنا للجبنه ملف خاص هنحتاج لمجهود كبيرفخلونا نحطه فى خطه العمل القادمه و نبدع و نطلع موتزاريلا و جبنه كريمى و و فيتا كمان...
يالا بسطرمه
Pastrami او بسطرمه نوع من انواع اللحم المقدد و تختلف طريقه تصنيعه بين الغرب و الشرقيعن البسطرمه على الطريقه الغربيه غير الطريقه الشرقيه اللى اتعودنا عليها و على ريحتها الحلوة .فى مصر ..وطنى و موطنى و همى الاكبر....بنموت فى البسطرمه و بنحب دايما ان تلاجتنا ما تفضاش منها...و الان و رغم اسعرها اللى اصبحت تطاول العناء بنروح برضه و نشترى حتى و لو تمن كيلو ..الكيلو يا حلوين وصل الى 87 جنيه...اه ياااانىو البسطرمه ليها طرق كتير للتقديم و بنحب ناكل البيتزا بيها و يا سلام على طاسه بيض بالبسطرمه ..الصبح أو بالليل ..كله حلو و رغم تعدد طرق طهيها الا انى لن اخفى عنكم سراااااااانا عندى حته بسطرمه محترمه و نيه من غير تجهيز او طهى فى رغيف عيش فينو مقرمش و سخن ..الفيلم ده بالنسبه لى قمه المراد..و مش عايزه اقولكم الادمان و بالذات و انا حامل و طبعا مش المفروض انى اكل اى حاجه نيه فكنت بحمرها و بنفرد بيها لوحدى.طيب بنعمل بيها ايه...بيض بالبسطرمه ..بيتزا و كمان عيش بالبسطرمه و اصناف ساليزونات لا اول لها من اخر.
طيب ندخل على الطريقه الشرقيه للبسطرمه
قطعه لحم من عرق التلبيانكو ""بتاع الروزبيف و اللحمه البارده" ووزنه طبعا بيكون لحد 3 كيلو انا عملت قطعه وزنها 2 كيلو .نص كيلو حلبه حصى4 رؤؤس ثوم.4 ملاعق كبيره بابريكا او فلفل بقالى ملح للغرض الذى سوف اذكره فقط الطريقه..اولا تغسل قطعه اللحم بس لا تغالى فى الغسل مجرد شطف..ضعى قطعه اللحم على شبكة و نشفيها بفوطه نظيفه ..انا استخدمت فانله قديمه من بتوع زوجى ههههههه اسرااااار عائليه نشفى قطعه اللحم جيدا و غطيها بقطعه قماش اخرى جافه..و بعد ساعه كده هاتى ملح كتيييير و ابدئى دلكى قطعه اللحم بها جيد و رشى ملح كويس على كل الجهات...غطيها بحته تل... و حطى عليها الهون او تقل اى تقل حتى و لو حله مليانه ميهسيبيها يوم...هتلاقيها بتنزل ميه لونها روز شويه صفيها ..المرحله دى تستغرق يومتانى يوم قومى بغسل العرق الفلتو.... و نشفيه كويس و غطيه و هو برضه على شبكه يوم كمان....ما تخافوش مش هتشموا اى روائح و لا العمليه دى فيها اى حاجه تقرف او تضايق...بعد مرور اليومهتاخدى الحلبه و تطحنيها ناعم او لو قدرتى تشترى الحلبه مطحونه يبقى اسهل لك...طيب الحلبه بودرة و عليها التوم الطحون او المدقوق ناعم جدا و عليهم البابريكا و بس مش مطلوب و لا ملح و لا شطه و لا اى اضافات تانيهو اعجنى المكونات بشويه ميه لحد ما تحسى ان المزيج ده تقدرى "تجبسى " بيه عرق اللحمه...هههههههكان نفسى ابقى دكتوره و فشلت... هههههههه..انا بهذر مش بقدر حتى اشوف الدم... ركيكه المشاعر.ماشى جبسوا اللحمه و تعالوا بعد التجبيس اعملوا خرم او فتحه فى اعلى العرق و دخلوا جواها دباره لو عندك ابره منجد تقدرى تعملى الشغلانه دى...و ده علشان نقدر نعلقها يا حلوين.طيب لا انصح ابدا بغسل اليدين بعد هذه المرحله ..روحى و بمنتهى الرقه حطى ايدك على انف زوجك و اللى نايم غلبان ان ما قام مذعور ما بقاش انا شهيره....ههههههههه...و يا سلام الجيران هيحسوا ان فيه بقال فتح فى العمارة او ان معمل بسطرمه برضه فتح تحت العماره..مالهاش حل يا نااااس ريحه حلوة انا بحبها..طيب هنعلق العرق جنب الشباك فى المطبخ و بعد اسبوع....اعزمى العيله و عيلة العيله و اختارى ضيف شرف يقص الشريط ههههههه و بألف هنا و شفا...يالا على الصور يا كتاكيت..

.تمت و كمان كام يوم لما تستوى هنقطع و نذوق و نفرق كمان على الحبايب ..ههههه...انا هنا استخدمت سمانه علشان مالقيتش عرق فلتو و كله ماشى بس انا بفضل العرق ...يالا اشوفكم على خير يا كتاكيت.