الثلاثاء، 25 نوفمبر، 2008

Bagels وصل يا جدعان , اخد نفسى و اقولكم عملته ازااااااااااااااى!!!


السبت، 22 نوفمبر، 2008

تطبيقات , تطبيقات ,تطبيقات,,ااااه يا ايدى!!!!!كييييييك و بس!!!















































































و لا كلمة ششششش , صور و بس...

الكيك الليلة , الليلة , الليلة , ليلة عيده!!!!!ترالا ترالا ترالا


بنات ,, ولاد ... كله يجمع انهاردة محاضرة ,, بقالنا كتير بنرغى ,, يالا بقه نخش فى الجد ...
الجايه دى محاضرتى فى الكيك هنزلهالكم مجانا و exclusive على رأى عمرو أديب باشا...فلما تلقونى قلبت لغة عربية مش عايزاكم تتخضوا لأنها محاضرة و زى ما انتوا عارفين لازم نلم الدور , يالا بينا...
الوصفة الأساسية للكيك البسيط:-
المقادير:
- 3 كوب دقيق متعدد الإستخدام
- 1 كوب: زيت / سمن + زيت / زبد + زيت / زبد
- 4 بيض أحمر / أبيض أو 5 بيض بلدى
- 1باكو B.P. (Baking Powder )
- 3 /4 1 كوب سكر بودرة أو 2 كوب حسب الرغبة
- 1 كوب لبن /لبن + عصير برتقال /عصير برتقال
- بشر برتقالة كاملة
الخطوات:
- يجب قبل البدء مراعاة أن تكون كافة المكونات بدرجة حرارة الغرفة / نخل الدقيق و إضافة الB.P. عليه ،تسخين الفرن قبل وضع الكيك ب 10 دقائق.
- يضرب الزبد مع السكر البودرة حتى يصبح الخليط كالكريمة و فاتح اللون
- يضاف البيض بيضة تلو الأخرىمع الضرب جيدا
- تضاف الفانيليا + بشر البرتقال مع أخربيضةلإضفاء نكهة للكيك
- يضاف 1/2 مقدار الدقيق يليه1/2 مقدار اللبن(السائل) و يقلب بملعقة معدنية حتى يتجانس
- يضاف النصف الأخر من الدقيق و اللبن و يقلب الخليط مرة أخرى
- يتم تبطين القالب بدهنه جيدا بالزيت أو السمن و رشه بالدقيق
- يصب الخليط على ألا يتجاوز 2/3 حجم الإناء
- يدخل فى فرن درجة حرارته 180 o م سابق التسخين
تنويعات:
1- شكل الكيك:
يمكن التنويع فى شكل الكيك حسب شكل الإناء قد يكون مستدير ring mould أو قالب pound cake أو قوالب فردية cup cakes و يوجد أشكال أخرى فى السوق


2- الطعم و النكهة:
- نكهة البرتقال و الليمون و نحصل عليها من خلال بشر قشرة الثمرة و إضافة عصيرها مع الإلتزام بالمقادير السابقة
- فانيليا / كاكاو حيث يضاف الفانيليا على العجينة الأساسية أثناء ضرب البيض وبعد الإنتهاء من خلط الدقيق تقسم العجينة إلى قسمين ،قسم يخلط ب 2 م.ك كاكاو غامق أو حسب الرغبة مع إضافة م. ك لبن إضافية للخليط المضاف له الكاكاو و تصب العجينتين بالتوالى و يمكن تبديل الكاكاو بالقهوة سريعة الذوبان
- القرفة وتضاف أثناء خفق الزبد مع السكر حوالى 1 م.ك قرفة
- عين جمل مطحون / أو بندق لكيك الشيكولاتة
3- الشكل و الطعم:
وذلك بإضافة شكل جديد من خلال مكونات فرعية تعطى طعم مختلف فى كل مرة مثل :
الشيكولاتة الحرارية chocolate chips ،الزبيب ،الكريز المسكر ،الفواكه المسكرة المشمشية و القراصيا، المكسرات المجروشة خشن.
يراعى قبل وضع هذه الإضافات رشها بالدقيق و نخلها للتخلص من الدقيق الزائد و تضاف مع الدقيق و فى هذه الحالة يراعى التقليب برفق حتى لا تهبط المكونات أسفل القالب.

وصفة ال Olive Quick Bread :
وهى وصفة مبتكرة لكيك حادق يصلح للإفطار أو كصنف حادق على بوفية شاى High Tea .
المقادير:
- 315 جرام دقيق - 2 م.ك B.P - 2 م.ك سكر
- ذرة ملح - 2 بيضة كبيرة - 170 مل لبن
- 2 م.ك نعناع طازج أو مجفف مطحون - 90مل زيت نباتى
- 155 جرام زيتون أسود شرائح أو (50 جرام زيتون أسود + 50 جرام بسطرمة أو سلامى مقطع رفيع جدا + 50 جرام رومى مبشور)
الخطوات:
- ينخل الدقيق و يضاف له ال B.P و السكر و الملح و تقلب المكونات
- نعمل حفرة فى الوسط و نضيف البيض و اللبن و الزيت ثم نقلب مع إضافة الزيتون
- تصب فى قالب الكيك المبطن و تدخل فى الفرن سابق التسخين 180 o م.

ملحوظات هامة:
- لا يفتح الفرن اطلاقا أثناء عملية طهى الكيك
- للتأكد من تمام نضج الكيك نضع Skewer أو سكين إذا خرج نظيفا يكون الكيك قد نضج
- يترك الكيك ليبرد بعد خروجه من الفرن حوالى 5 دقائق ثم يقلب على الwire rack شبكة لكى يبرد
- يمكن حفظ الكيك فى علبة محكمة داخل الثلاجة لفترة طويلة
- يمكن حفظ الكيك فى الفريزر بلفه فى ورق فويل و وضعه فى كيس محكم حتى لا تتسرب له أى روائح أخرى.


مدام شهيرة عبد الفتاح

يالا محاضرة ببلاش , استغلوا الفرصة و ذاكروا كويس و اعملوا ال !!!Devoir

فى البوست اللى جاى مفيش غير صور تطبيق الكيكة دى ,, يالا كله يدخل فورا!!!

ايه حكايه شهيرة الخبيرة دى؟؟؟؟؟

انا يا جماعة شهيرة الخبيرة و الخبيرة دى والله مش انا اللى اطلقتها على نفسى ,, يعنى مش فذلكة و غرور و العياذ بالله ,, انا كنت اتقدمت لمسابقة ستار شيف العرب على قناة فتافيت و تم اختيارى ضمن التوب 22 مش دى القضية ,القضية هى ان المذيعة الله يعزها كانت بتقول عليا و تعلق و تأكد :"شهيرة الخبيرة " و من ساعتها و عيالى بيزفونى " شهيرة الخبيرة , شهيرة الخبيرة " و لزق اللقب يا جدعان.انا ست بيييييت مصرية و بركز اوى على ست بيت دى , لأنى اعلن الان و على الملأ انى قررت ابقى ست بيت و اتكلم بلسان حال ست البيت و ادافع كمان عن حقوق ست البيت , و ست البيت اللى بكلم عنها مش الهانم اللى بتروح للكوافير كل يوم و شغلها الشاغل ضافرها اللى اتقطم ,,لا انا بتكلم عن ست البيت اللى انضربت بالرصاص!!!!انا و خلال كل الفترة اللى فاتت و هى تقريبا 10 سنين , بحاول و بحاول , كان هدفى انى اساهم فى دفع عجلة التنمية , بس للأسف طلعت التنمية مالهاش عجلة و كأنى كنت بفحت فى الرملة,, اتخرجت من كليه الاقتصاد و العلوم السياسية و ومعايا درجتين بكالوريوس , و بتكلم تلات لغات بطلاقة" الفرنسية , الانجليزيه و اليابانية" اه والله يابانى , بس للأسف لابسة ايشارب و الله بس ايشارب و كمان فيا عيب تانى , متجوزة و عندى عيلين و العيب الأسوأ ان عندى طموح و دى طبعا كارثة تانية... خلاص هفضل ست بيت و ابقوا افتكرووووونى!!!







وابقى افتكرها يا أوباما !!!!!!من عند خالد الصاوى!!!!!!

وابقى افتكرها يا أوباما !!!!!!
أسوان بتنده ع المنياوالندهة واصلة لآخر الكون.
وبيرقصوله قوي ف كينيا مستبشرين بسمار اللون.
حاسيينه حيداوي المطحون.
وتبقى بَرْداً وسلاما
الناس أهِه.. حابّاك بجنون.
وعشمانين خير يا أوباما------
--بيقولوا: "صح ديمقراطي وواد جدع صاحب صاحبه.
بيحب عمرو دياب وشيرين .
ولو تعاشره حتحبه واكمنه راضي عليه ربّه.
خلصنا من بوش الواطي الناس أهِه.. حابّاك بجنون وعشمانين فيك يا أوباما-------
--قعدت شارد ومسهّم تقول يا واد ولا تخبي؟؟
ساكت وسري المتلجم بيفط من عيني وغلبي لا تقوللي أسمر ولا أبيض.
ده لو ملاك بجناح أبيض وحلّ في البيت الأبيض لازم حيكشفلك نابُه .
ومهما حط احمر وابيض في الجد.. راح يقفل­­ بابه ويسوق عليك كل كلابه ويحرمك من أسلابه ويهَمَّلك برضه جنابه..
لا حيلتك اسود.. ولا أبيض وان طيروا ألف يمامة وان فرقعوا مليون بمبة.
وان فرقعوا مليون بمبة
والله لناخد فيك بمبة وابقى افتكرها يا أوباما

يا جماعة كرهت السياسة و كرهت الفن.... ايوه كرهت الاتنين ,, بيخلوك تحلم و توصل لأعلى سما.... فوق , فوق , فوق....
و فجأة تلاقى نفسك تحت ... يقولوا بنتجمل , يقولوا بنتمكيج!!!! تجميل ايه و مكياج ايه؟؟؟ اخلاق ايه , مثل ايه و بالذات السياسة ,, اه و اه من السياسة , و الكلام ده من واحدة متخرجة من الكليه اليتيمة" الاقتصاد و العلوم السياسية", لو عملنا احصائية شفنا كده كام واحد اتخرج من السياسة و اشتغل بها ..... قله قله... و ذوى مواهب خااااصة جدا....
سبت السياسة لناسها المتفصلين عليها و على اخلاقها.... و دخلت المطبخ.... لو عندى شحنه غضب .... هقولكم سرى و امرى لله ... بطلعه فى شويه دقيق و ميه و خميرة و لما يطلع الانتاج من الفرن ... الاقيه بيضحك لى و يقولى " ايوه يا شهيرة ,, من جد وجد ,, تعبت معايا و طلعت لك احلى عيش ,, احلى ثمرة لأحلى شغل" 10 سنين و انا و الدقيق و المطبخ و المذهل انى انا ست البيت صاحبة الهوايه اصبح لى و الحمد لله شعبية بين اهل الهوايه و كأن شغل ايدى بيقولى " من جد وجد" و بيأكد عليا ,, و كل ده و انا ما طلعتش من بيتنا,,, ما دفعتش تمن اخلاقى علشان ابقى ,, ابقى على الاقل راضية عن نفسى.....
عارفين خالد الصاوى , الفنان ,, بحبه والله , بحس فى عينيه معاناة ,, حاسة فيها بواحد شايل هم , بس اللى كان بالنسبة لى اكتشاف هو انه كمان بيفرج عن همه و بيحكى و بيكتب , خالد , اكتشفت انه شخصية ظريفة ,, عنده بلوج و كمان اصحاااب كتير من Bloggers , و لما زرت مدونته لقيته كاتب كلام جميل و رغم ان بلوجى اكل و طبخ و خبز مع شويه اسقاطات الا انى حبيت احط شعره او نثره او سموه زى ما انتوا عايزين ,, كلامه جميل بيعبر عن لسان حالى ,, بس خالد ... يا رب اوباما يكبسنا احنا الاتنين و يبقى اول خروج عن القاعدة ,, و تدمع عينينا لما نشوفه فى اول زيارة ليه فى المنطقة و نستناه بالورد على باب المطار و اول ما نشوفه نهتف و نقول"yes, we can"
فيلم حلو و لا حلم حلو؟؟؟؟مش كده !!!!
خالد بحبك بس بكره السياسة و الافلام و كمان الاحلام!!!!
جماعة , مدونة خالد عنوانها اهه.....
زوروها فهى حقا حلوة تستحق الزيارة.......





عيش من القرع العسلى؟؟!؟؟!؟ اوعى وشك!!بوووووووم!!!!!

ايه الأخبار ؟ عاملين ايه ؟ وحشتكوا و لا زهقانين منى !!!!
ماشى نخش فى الموضوع.....اليوم هحكى ليكم قصتى مع الخميرة ,,
-بينى و بين الخميرة غرام و حكايات من 15 سنة من يومى و انا فى مطبخ امى اعجن و ابوظ و اجرب تانى لحد ما انجح و طبعا كله على دماغ بابا و ماما و الشغالة "و هنا احب اقولكم ان احنا كان عندنا شغاله -كان-.
بينى و بين الخميرة عشرة طويلة و احترام متبادل ,, هتقولوا عليا مجنونة ؟؟؟ ماشى انا مبسوطة ,, حكايتنا زى اسطورة The beauty & the beast بس احنا لينا اسم تانى و هو The beauty & the yeastشايفاكوا بتضحكوا !!! ماشى !!المهم يعنى بكلمها و بتكلمنى و قد ما بديها بتدينى ,, فيه علاقة فى الدنيا احلى من كده؟؟؟؟
يالا نخش على المفيد.أنا جهزت القرع العسلى ,قطعته و شويته فى الفرن و صفيته كويس علشان ينزل الميه اللى فيه , و بعدين عملت بوريه من القرع علشان استخدمه فى الوصفة دى !!!!
الوصفة دى سهلة جدا و نتايجها مش معقولة و مقاديرها بسيطة للغاية :-
يالا بينا-قطعة خميرة فى حجم عين الجمل او ما يوازيها بالخميرة البودرة " لا استخدمها نهائيا علشان بكرهها".
- ربع كوب ماء من الماء الناتج عن تصفية القرع.
- م. ص سكر.- م. ملح
-4 الى 4 و نص كوب دقيق مخبوزات منخول
- كوب من بيوريه القرع " اليقطين" .
-من ربع الى نص كوب من ماء القرع او ماء عادى .-بيضة مخفوقة.
- قلب لب القرع .

يالاااااا على الطريقة:-و دى مرحلة" تربية الخميرة"و ده تعبير امى و جدتى !! , ايوه بنربيها بنأكلها سكر و نشربها ميه و ندلكها و نغطيها زى ما هتشوفوا,









و ده علشان تنام و تكبر و تعطينى احلى خبز.اكلت السكر و مبسوطة و دلوقتى هتنام!!!!!شششششش نايييمة!!!بعد 5 دقائق !!! ما شاء الله !!

كبرت و بقت عروسة.











فى هذه الأثناء , حضرت اناء العجن و حطيت فيه الدقيق و الملح و اليقطين و ايه تانى الميه ,, فى حاجة تانية ؟؟؟ لأ لألأ كله تمام .









و نبدأ نعجن و بعدين نلت العجين 10 دقائق يعنى نخدمه كويس.و نلتها حتى نحصل على عجينة ملساء زى بشرة البيبى .











هنا دهنتها بشوية زيت خفيف علشان ما تلزقش فى طبق العجين.













و هغطيها!!!!ششششششش !!! نايمة.















"ما شاء الله عليكى يا حلوة , كبرتى يا قمرة و نورتى .










نيجى للتشكيل .....دهنت صينية sponge cake بشوية زبدة على الخفيف و رشيت شوية دقيق درة أصفر, و حضرت لعيشى أحلى سرير.














حطيت العجينة , بس مش كلها , احتفظت بجزء صغير فى حجم كرة الجولف و دهنت الجزء ده .واضحة الصور يا بنات و يا ولاد؟؟

و عملت عقدة!!!!!! يا ساتر يا رب !!!

















و دهنتها كمان بالبيض و رشيت عليها قلب البذر و سيبتها تخمر نصف ساعة .














كله يوعى وشه هتنفجر دلوقتى و أنا مش مسئوله عن النتائج!!





و ده شكلها قولوا بسم الله و جاهزة تدخل الفرن على درجة 200 .يا سيييدى ايه الجمال ده !!!بعد الخبز ...... كان ده شكلها,,,بسم الله و ده شكل تانى:-و خلااااص كل خبزة و انتوا طيبين , يالا قولولى تسلم ايدك يا شوشوالعيش جميييييل اوى و هش بشكل رهيب.يالا عليكم انتوا بقه الأجبان و المشروبات , كفاية عليا انا كده.سلااام و أشوفكم فى حكاية جديدة بكرة مع القرع العسلى








الأربعاء، 12 نوفمبر، 2008

الصين قادمه!!!


الصين؟؟ و ما أدراك ما الصين!!! طغيان كامل و شامل يسيطر علينا من كل اتجاه, كل حاجة حواليك Made in China

يعنى هنروح منها فين مش عارفة؟؟؟

طيب جربتوا الاكل الصينى؟؟ اكيد أه,, شفتوا جماله؟؟ الصراحة انا بحب اطبخه لسبب وجيه جدا , خفيف جدا و بنقوم من على الاكل و كأننا ماكلناش حاجة,, و كمان سهل جدا سواء طبخناه فى الووك الصينى او بطريقتى الجديدة!!

أنا اشتريت اختراع رهيييييب!!! مقلاة البطاطس اللى بتقلى كيلو بطاطس ب ملعقة زيت واحدة تصوروا ؟؟؟ انا اشتريتها و انا كلى ثقة فى الشركة المنتجة بس ماكنتش مصدقة لحد ما جربت , حاجة زى السحر , طبعا كان مهم بالنسبة لى جدا هذا الاختراع لأن عندى حساسية و بتعب جدا من القلى علشان كده كنت بتجنب اقلى خالص,, بس فى نفس الوقت بنحن للبطاطس المقليه.

المهم انا طبخت الاكلة الصينى دى بالماكينة الجديدة و قدمت الطبق مع نودلز الارز الصينى و كانت حلوة اوى.

انا الاول حمرت اللحمة البتلو مع نص ملعقة زيت و بدأت اضيف لها البصل و التوم و الجنزبيل و الصويا صوص و الطماطم و فى الاخر اضفت الافوكادو و كله اتحمر مع بعضه و قدمته مع النودلز.

و كانت اكله فعلا حلوة و خفيفة.

بيسكوتى الينسون على الطريقة الايطاليه"Anise biscotti"


اليوم جايبالكم وصفة كنت منزلاها على لكى و ده منتدى رائع و جميل و اكيد كل اللى هيشترك فيه هيستفيد , الوصفة دى ايطالية بس انا طبعا اضفت عليها من لمساتى, يالا بينا!!

بيسكوتى او بسكويت او بسكوت ثلاثة مسميات لنوع واحد من الحلوى , البسكويت كلمة اصلها فرنسى biscuit أو ايطالى biscotti , و معناهما واحد:"طهى مرتين " و هو ما تتطلبه عملية طهى البسكويت فهو عادة ما يدخل فى مرحلتين للطهى , و البسكويت من اقدم انواع الغذاء و كان يمثل عنصر هام فى تغذية الجنود و البحارة لأنه يتحمل الظروف الصعبة فى التنقل كما انه يمد الجسم بالطاقة نظرا لاحتواءه على السكريات و النشويات اللازمة لتغذية جسم الجندى او البحار اثناء السفر و الترحال .طيب ندخل فى الموضوع , اليوم بقدم لكم وصفة بسكوت اليانسون , anise biscotti و هو وصفة مشهورة من كلاسيكيات المطبخ الايطالى.هذا النوع له عدة طرق منها الطريقة الاسفنجية لهذا النوع و منها طريقة اليوم , و هى كتييير لذيذة و مختلفة شوية عن اى نوع جربتوه من قبل لأنى أضفت عليها من لمساتى, جربوها و اتمنى انها تعجبكم :


-المقادير :-2 كوب سكر ابيض مطحون - 1 كوب زبد طرى بدرجة حرارة الغرفة -4 بيض كبير - 4و نص كوب دقيق منخول-4 م.ص بيكنج باودر-نص م. ص ملح -ثلث كوب عصير برتقال -كوب لوز مطحون خشن -2 م.ك ينسون حب -1 م.ص فانيليا.


الطريقة :-يضرب الزبد و السكر ضربا جيدا حتى تصير كالكريمة , نضيف البيض بيضة بيضة و نضرب جيدا بين كل اضافة حتى يتجانس الخليط ,مع اضافة الفانيليا , يخلط الدقيق مع الخميرة و الملح و اليانسون و اللوز و يضاف الى الخليط السابق على دفعتين و بالتناوب مع عصير البرتقال . و يقلب جيدا بالملعقة حتى يتجانس .انا اضيف عادة ملعقة كبيرة بشر برتقال , يصب فى صينية الخبز و ندخله فرن حرارته 180 سابق التسخين .


و بعد ما يستوى يترك ليبرد و يقطع بحرص بسكين الخبز و يرص فى صاج و يدخل الفرن مرة تانية على درجة حرارة منخفضة حتى يصير مقرمشا " حلوة مقرمشا دى ".نحفظه فى علبة محكمة الغلق للحفاظ على قرمشته من الرطوبة, و بالهنا و الشفا حلو اوى عندما يقدم مع كوب اللبن و لو بتحبى الحلو قدميه كمان مع مرملاد البرتقال , نكهة البرتقال تتماشى بامتياز مع نكهة اليانسون , انصحكم تجربوه فهو لذيذ اوى اوىىىىىى .

تعالوا شوفوا عملت ايه فى عيد ميلاد" سنسن" حبيبى!!!!

عارفين سنسن"ياسين" كان عايز ايه هديه فى عيد ميلاده؟؟؟؟
ياسين عجبه توستر ديزنى!!! ايوه توستر لما تحط فيه شريحة التوست تطلع لك مطبوع عليها رسمة شكل ميكى ماوس!!!!
نقدر نقول انه استطاع ان يثبت لى ان ابن الوز عوام!!!!
ليله عيد ميلاده أخبرنى برغبته بالأحتفال بعيده بين اصحابه فى المدرسة,, يعنى التحدى كان تحضير 55 واحدة كاب كيك" و هقولكم ليه اخترت الكاب كيك", بالاضافة الى تحضير صنف حادق محبب للاطفال و هو طبعا البيتزا!
ده غير ان كان لازم انى اعمل تورته الاحتفال الخاصة بالبيت.
طيب يعنى الدنيا اتقلبت فوق دماغى و عندى بقه شغل فظيع!!! طبعا اتوترت و كنت بتخانق مع دبان وشى و ده حتى الانتهاء من المهمة. اللى نرفزنى اكتر هو انى كنت بشتغل بالفوندان و عجينة اللوز , المفروض ان مفيش مشكله فى كده , بس الفوندان كان بيسيح بسرعة و كانت السيطرة عليه غايه فى الصعوبه, بس الحمد لله خلصت المهمة و رحت المدرسة و انبسطوا الولاد و المدرسين و المهم و قبل كل شئ انبسط ياسين , بس عارفين رد فعله كان ايه لما شافنى انا و باباه داخلين عليه الفصل؟؟؟؟ بكى ؟؟!!؟!؟ تصورورا و الله بكى , و كأنه كان بيبكى من الفرحة او المفاجأة مش عارفة, يالا ادعوا لى ربنا يهديه هو و اخته و يخليهم و يبارك فيهم يا رب.
و يالا على الصور!!!!
ياسين و هو محرج فى الفصل!!! ليه معرفش؟؟؟؟؟و الصورة كمان لأصحابه الحلوين و المؤدبين!!!!
يالا الحمد لله المهمة انتهت و عملنا اللى علينا و كل سنه و سنسن بألف خير







الأحد، 9 نوفمبر، 2008

طيب!! كل اللى فات كان بث تجريبى و هنبدأ فى الجد!!

كل اللى فات ده كان بث تجريبى !! يعنى لعب عيال و من الاخر بجرب فيكم , بس اللى جاى مهم كتيييير!!
انا ليه عملت بلوج بالعربى بعد ما عملت واحد بالعنجليزى ,, ببساطة كده و على بلاطة , عايزة ارغى معاكم على راحتى , ناخد و ندى بس مش هنجيب فى سيرة الناس !!! أولا عايزين نحتفل بمناسبة الشقة الجديدة"قصدى البلوج" الحمد لله دخلت النور و الميه و كان لسه فاضل التليفون ,بس جبت واسطة و برضه دخلته, لذا اعلن انا شهيرة عن عنوانى الجديد,
و ده العنوان الرئيسى ليا بس استنوا فيه كمان شقة مصيف محندقة كده على قدى.
يعنى يا هكون هنا يا هنا بس اوعوا تبلغوا عنى الضرايب!!! عايزة بقه الحاجة الحلوة بتاعة الشقة الجديدة, و انا برضه عاملة حاجة حلوة
ومستنيااااكم!!!







ياسيدى عل القشطة اللى على البسبوووووسة!!! عيشوا بقه!!

ممكن كمان تعجبك المواضيع دى...يالا بينا ...

Related Posts with Thumbnails